Genjaeu: Dwkgeiz dwg loh hozdung haifat ukgyaeuj ngeixnaemj ndeu, engq dwg loh hanghmoeg ciliz dijyuz comz gohyoz、vwnzva、yisuz、doxdax doxhab itheij he, caemh dwg gij vwnzva ceiqndei ciuhgeq Cungguek caeuq seiqgyaiq gak guek. Geizloih doxdax yindung youq haifat caizganq yinhsu caeuq mbouj dwg caizganq yinhsu song fuengmienh neix miz ndeicawq gig lai. Raeuz doenggvaq yenzgiu gak cungj geizloih hozdung, daj gij saedsaeh aen hag bonjfaenh hwnj- din, cingjhab gij sonhag neiyungz gak yozgoh lingjyiz, caeuq bonjdieg doxangq hozdung dox giethab, daj gikfat gij yinxdaeuz camgya geizloih hozdung hagseng hwnjdin, sawq damqra bonjdieg geizloih youzhi caeuq bonjdieg hagseng sonhag hozdung dox cingjhab gij guhfap sikhab lwgnyez bonjdieg simndang fazcanj gvilwd haenx, yienghneix doiq beizyangj gij yinxdaeuz hagsib、yisiz gapguh、 binjciz sibgvenq caeuq nyinhrox naengzlig hagseng gig miz yungh, caemh doiq coicaenh huz- ndei fazcanj simndang hagseng miz ndeicawq lai lo. Aen yenzgiu neix daj gij daegdiemj caeuq goeng- naengz bonjdieg geizloih youzhi yamqdin, dajdaej gij gihbwnj roenngeix caeuq gihbwnj yenzcwz “swnjcienz minzcuz vwnzva, son- ganq vunzmoq Mbanjcuengh”caeuq Cuengh Gun song saw vah, ndaej mizyauq dienzbouj le giz hoengq hingzsik、neiyungz caeuq yinxdaeuz Cuengh Gun song saw vah sonhag hozdung.

Aenswz gvanhgen: Bonjdieg geizloih youzhi mizyinx sizcenj Cuengh Gun song saw vah

It、Dakbaengh geizloih youzhi bonjdieg, hawj Cuengh Gun song saw vah sonhag ndaej youq mwh damqra mboujduenh cauhmoq

Vujmingz Gih Daibingz Cin Gingloz Siujyoz youq bi 1950 nienz cauhlaeb, ciemqdieg 95 moux, youq Daibingz Cin mbiengj saebaek, Mbanjgingloz dwg aenmbanj gwz- ming laujgih he, vwnzva giekdaej laegna, soqlaiz couh miz gij mingzdaeuz ndei “aen mbanj vwnz dij, vunz maenh dieg lingz”. Hagdangz baijbouh hableix、vanzging gyaeundei, gak cungj gyauyuz gyauyoz sezsih sezbei caezcienz. Bi 1981 hagdangz haiguh Cuengh Gun song saw vah sonhag, dwg gizdieg sawqniemh daengx gih Cuengh Gun song saw vah sonhag. Hagdangz mboujdan aeu“swnjcienz minzcuz vwnzva, songanq vunzmoq Mbanj- cuengh” daeuj guh gij muzbyauh son vunz, dwg yaek beizyangj seizdaih moq Mbanjcuengh boux ciepban cienzmienh fazcanj he, yaek miz minzcuz cingzvaiz、miz fouqda yawj lajbiengz、vaiqvued、gyaez hag maenh’ak. Hagdangz daihdamj sawq guh dawz doenghgij conzdungj minzcuz vwnzva lumj eu fwen、bonjdieg geizloih doxangq、minzcuz dijyuz doxdax、minzcuz diuqfoux daengj daiq haeuj ndaw dangz, iemqhaeuj gak monz yozgoh caeuq gak cungj hozdung ndawde, daezsang yauqlwd conzdungj vwnzva sonhag,sawj lauxsae hagseng roxnyinh gig najrongh. Youq diuzloh swnjcienz, loh lij dwg gyae’gyanggyang, youq gwnz swnjcienz giekdaej cauhmoq, baenzlawz mboujduenh guenqhaeuj gij rengzhoengh, demgya engq lai yinxdaeuz, hagdangz raeuz yaek dawz “geiz bonjdieg vwnzva” gensez dangguh vwnzva Bouxcuengh daeuj ca, cizgiz damqra aeu hozdung “geiz bonjdieg” daeuj gikfat lwgnyez gij yinx hagsib de, coicaenh lwgnyez ndaej cienzmienh fazcanj. “Gimz、geiz、 saw、 veh” dwg “seiq yaj” lizsij guek raeuz, youq vwnzva lizsij gyaeraez guek raeuz cwkrom liux gij vwnzva giekdaej laegna. Geizloih, dwg ndaej hawj vunz bienq gvai, dwg loh hozdung yungzhab liux swhsiengjsing、yizlozsing、dijyuzsing、cilizsing youq ndawde lo. Doengz- seiz, geiz lij dwg loh vwnzva miz gikcoi、saemjgyaeu goengnaengz he, ndigah bietdingh yaekaeu dawz geizloih hozdung yinxhaeuj swnj- cienz vwnzva son’gyauq ndawde bae.

Ginggvaq geij bi damqra caeuq saedhengz, raeuz cugciemh fatyienh “geiz sam” daiq cingqsik, gveihcwz haemq fukcab, mauh ok aen’gvaengh dingzlai lwgnyez ciepsouh, mbouj ndaej engq ndei gikfat gij yinxdaeuz lwgnyez, caemh mbouj ndaej engq ndei daejyienh aen hag raeuz daeznaeuz gij sonhag leixniemh “youq ndaw doxangq bae hagsib” haenx. Danghnaeuz raeuz ndaej dawz geiz haj hangz、geiz sanhhoz、geiz doiqhauh doengh yiengh geizloih neix yungzhab youq itheij, hagseng caeuq bohranz couh yungzheih ciep- souh, aenvih doenghgij geizloih neix cungj dwg daj bonjdieg gwnz- biengz ra okdaeuj, haujlai bohranz cungj rox angq doengh yiengh geiz neix, ndigah couh yungzheih doi- gvangq. Youq saedsaeh yenzgiu seiz, gyoengqraeuz fatyienh Cuengh Gun song saw vah sonhag lingjyiz yungzhaeuj bonjdieg geizloih youzhi le, mboujdan ndaej haemq ndei dienzbouj gij hoengq lwgnyez hag geiz, caemhcaiq ndaej daejyienh gij sonhag leixniemh “youq ndaw doxangq bae hagsib”，neix couhdwg gyoengqraeuz geij bi daeuj haiguh Cuengh Gun song saw vah sonhag diuzloh damqra haenx guh ok cauhmoq.

Ngeih、Dakbaengh geizloih youzhi bonjdieg, gikfat gij yinx hagsib Sawcuengh

Riengz lajmbanj bienq yiengh hawsingz, caeuq gak cungj doengh- yiengh saensien dox saegbungq, gyoengqvunz cugciemh dawz gij vwnzva minzcuz bonjfaenh bienqdamh bae lo, doiq minzcuz vwnzva swnj- cienz yingjyangj gig youqgaenj. Yied daeuj yied lai lwgnyez gaenq mbouj rox gangj Vahcuengh, hag Sawcuengh roxnyinh gig dwgrengz youh mbwqmbangmbang. Geizloih dwg loh hanghmoeg ciliz dijyuz comz gohyoz、vwnzva、yisuz、doxdax doxhab itheij he, ndigah hagdangz raeuz couh dawz geizloih bonjdieg youzhi yungzhab daengz yaubwnj gocwngz sonhag bae, geizloih hozdung haeuj godangz ndaej gyagiengz youzhising、yinxdaeuzsingq, gaijbienq sonhag fuengsik doiq gikfat gij yinx hagsib lwgnyez gig mizik, daegbied dwg doiq hagsib Sawcuengh mizik, hag ndaej mizyinx cihsiz gaemdawz ndaej engq maenh. Gyoengqraeuz gaenxmaenx cauhlaeb aen vanzging hawj lwgnyez dwkgeiz guh’angq, cienmonz hai aen geizloih hoz- dungsiz. Geizloih youzhi daj laj- biengz daeuj, seizbienh couh ndaej angq, gyoengq lwgnyez ndaej leih- yungh seizgan roengzdangz roxnaeuz gij hozdung rogdangz seiz doxiu geij boux couh youq lajroq gyausiz、cauhcangz daengj deihfueng veh geizbuenz okdaeuj couh ndaej dwkgeiz doxangq lo. Aenvih hoz- dung gig seizbienh, ndigah youq ndaw dangz Sawcuengh cab doengh- gij hozdung neix haeujbae, mbouj- dan ndaej diuzcez godangz heiq- faenh, caiqlij ndaej diuhdoengh hagseng hagsib cizgizsing dem.

（caengz sat）