Mwhgonq miz boux canghdeurin mizmingz ndeu, dinfwngz deurin de ak gvaq vunz, gij rin de deu, lumjnaeuz muhrin、 rumrin、batrin daengjdaengj cungj beij bouxwnq guh ndaej ndei, byawz raen cungj haenh, bouxgyawj bouxgyae cungj maij cingj de bae deu doxgaiq.

Canghdeurin miz 8 dah lwgmbwk caeuq daeglwg ndeu. Yah de gvaqseiq caeux, de baengh dinfwngz ak bonjfaenh bouxdog gag ciengx 8 boux lwg majhung caemhcaiq gak boux gag baenzranz.

8 dah mbwk cungj haq youq gyawj mbanj, gyoengqde haq gvan baenzranz le, noix maranz yawj boh, mbouj dawz daxboh haeujsim geij lai. Daxboh vihneix siengsim lai lo, ciengzciengz gag nam naeuz:“Haq gvan le dawz daxboh lumz bae, neix mbouj dwg gvaq giuz vut dwngx ha?”

Ngoenzseng bisouh 61 canghdeurin, daeglwg de hawj de banh laeuj hoh souh. Caencik baengzyoux cungj daeuj hoh de, 8 dah lwg hix ciuq fungsug dangdieg dawz noh dawz laeuj daeuj hoh daxboh, ciengzmienh nauhyied dangqmaz. Hoeng, cangh- deurin cix najhai simliengz.

Fungsug dangdieg dwg yienghneix: Bisouh 61 guhsouh hawj bohmeh, mboujdan dwg hoh bohmeh ndangcangq gyaeu ndaej geq, guh lwg youq ngoenzneix lij aeu bwh ndei buhsouh vaqsouh haizsouh doenghgij daenj neix hawj bohmeh, gij buhvaqsouh neix ce daengz ngoenz gvaqseiq bohmeh hawj gyoengqde daenj bae lajyaem. Miz lwgmbwk youz lwgmbwk bwh, mbouj miz lwgmbwk couh youz lwgbawx bwh. Boux gyaeu ndaej 61 bi cij ndaej daenj buhsouh bae lajyaem.

Guhsouh ngoenzde, yienznaeuz miz 8 dah lwg, hoeng, canghdeurin cix mbouj sou ndaej saek geu buhvaqsouh, de saetmuengh lai lo, ndawsim gag naeuz:“Ngoenzlaeng gou dai le mbouj miz buhsouh daenj bae lajyaem, youq baihde deng vunz yawjsiuj lo! Simcieg ha!” Ngeix daengz neix, de hozndat caemh simliengz, mboujgvaq ngoenzneix dwg ngoenzndei, de mbouj ndei fatheiq, cij ndaej nyaenx dwk.

Gvaq le mboengq he, ngoenz ndeu haetromh, canghdeurin siengj sawqdamq 8 dah lwg doiq de baenzlawz yiengh, couh gonqlaeng bae daengz ranz gyoengqde.

Canghdeurin bae daengz ranz dahdaih, dahdaih naeuz:“Boh, youq neix gwn haeux nw.” Gangj sat couh swiq rek swiq byaek. Daxboh naeuz:“Mbouj gwn lo.” Dahdaih dingq le, swiq rek swiq daengz dingz ndeu couh mbouj swiq lo.

Canghdeurin bae daengz ranz dahngeih, dahngeih naeuz:“Boh, youq neix gwn haeux nw.” Gangj sat couh bae gaeb gaeq yaek gaj gwn. Daxboh naeuz:“Mbouj gwn lo.” Dahngeih dingq le couh cuengq duz gaeq gyangfwngz bae lo.

Canghdeurin bae daengz ranz dahsam, dahsam naeuz:“Boh, youq neix gwn haeux nw.” Gangj sat couh daj ndaw ringj dawz geij aen gyaeqgaeq okdaeuj yaek cawj hawj canghdeurin gwn. Daxboh naeuz:“Mbouj gwn lo.” Dahsam dingq le youh dawz gyaeqgaeq coq dauq ndaw ringj bae.

Canghdeurin bae daengz ranz dahseiq seiz, dahseiq cingq guh ceiz. Dahseiq naeuz:“Boh, youq neix gwn ceiz nw.” Gangj sat couh dawz fwnz haeuj cauq caux feiz naengj ceiz. Daxboh naeuz:“Mbouj gwn lo.” Dahseiq dingq le couh nengh gij fwnz ndaw cauq okdaeuj lo.

Canghdeurin bae daengz ranz dahhaj、dahroek、dahcaet、dahbet, geij dah neix hix lumj geij dahcej gyoengqde nei dakdaih daxboh.

Canghdeurin daengx ngoenz mbouj ndaej gwn yiengh maz roengz dungx, dungx iek cixbah, simdaeuz lij lumj miz maz doxgaiq saekdimz nei, diemheiq hoj raeuh.

Banhaemh de maranz, naiqnoknok yamq haeuj dou, daeglwg naeuz:“Boh, dou gaenq gwn caeuz gvaq lo. Dou laihnaeuz mwngz haemhneix mbouj dauq gwn dem, couh mbouj ce haeux byaek hawj mwngz ne. Mboujgvaq, mwngz deq yaep ndeu, dou cawj caeuz hawj mwngz gwn.” Daeglwg gangj sat, caeuq lwgbawx sikhaek boux he swiq rek, boux he swiq byaek. Daxboh naeuz:“Mbouj gwn lo, gou youq ranz geij dahcej sou gaenq gwn gvaq lo.” Lwgbawx naeuz:“Byaij roen baenzlai gyae, haxbaenh gwn gvaq seizneix hix iek lo.”

Canghdeurin dingq le ndawsim raeujrubrub. Yaepyet, daeglwg caeuq lwgbawx cawj haeux byaek ndei lo, canghdeurin gwn imq ndoet doh le doiq songde naeuz:“Haetcog sou bae bauq hawj 8 dahcej sou naeuz gou dai lo, heuh gyoengqde daeuj soujhauq.”

Daeglwg gvanbaz yienznaeuz geizheih, hoeng, hix ciuq gij vah daxboh bae guh. Haetromh couh bae bauq 8 dahcej naeuz daxboh gvaqseiq lo.

Canghdeurin aeu youzdongz daeuj nyumx naj, saeknaj aeuj lumj nohdai nei, song gen song ga yiet sohrwdrwd ninz gwnz mbinj gyang ranz, gwnz ndang hoemq moeg, gwnz naj hoemq baengzhau, cangguh gaenq dai.

Mbouj geij nanz, 8 dah lwg daeuj daengz lo. Ciuq dangdieg fungsug, gyoengqde sien biengj hwnj mbaw gaenhau hoemq naj, yawj vunzcaen baez naj doeksat, caiq dawz mbaw gaenhau goemq ndei dauq le, couh cuengqsing daej lo. Gyoengqde humx naengh youq henz “seihaiz” daxboh daejnganga.

Dahdaih daej naeuz:“Boh, mwngz vihmaz biek gou bae baenz vaiq? Ngoenzlwenz mwngz lij youq ranz gou gwn haeux ne……”

Dahngeih daej naeuz:“Boh, mwngz vihmaz biek gou bae baenz vaiq? Ngoenzlwenz mwngz youq ranz gou, gou lij gaj gaeq hawj mwngz gwn ne……”

Dahsam daej naeuz:“Boh, mwngz vihmaz biek gou bae baenz vaiq? Ngoenzlwenz mwngz youq ranz gou, gou lij cien gyaeqgaeq hawj mwngz gwn ne……”

Dahseiq daej naeuz:“Boh, mwngz vihmaz biek gou bae baenz vaiq? Ngoenzlwenz mwngz youq ranz gou, gou lij naengj ceiz hawj mwngz gwn ne……”

Dahhaj、dahroek、dahcaet、dahbet cungj doq daej doq naeuz ngoenzlwenz daxboh youq ranz gyoengqde ndaej gwn maz gwn maz.

Caj geij dahlwg daej sat le, canghdeurin fwt naengh hwnq, geij dahlwg raen le, laihnaeuz raen fangz, lau dwk hoenz mbouj youq ndang bae, loemxlaengx dajciengj buet ok rog dou bae.

Canghdeurin yawjyawj seiqhenz, gyajcang fatmoengx dwk cam:“Ok maz saeh ne? Haemhlwenz gou mbouj dwg gaenq dai gvaq la? Baenzlawz youh lix dauq moq? Seizheiq gou ndei lai lo, hw hw.” De daegdaengq gangj sing sang, hawj geij dah lwg cungj ndaej nyi:“Geij dah sou haeuj ranz daeuj, gou caengz dai, gou dwg vunz, mbouj dwg fangz! Sou lau maz ne?”

Geij dahlwg dingq le suksuk yonjyonj dauq gyang ranz, sijsaeq cim daxboh, raen daxboh caen lij lix dahraix, cij bouxboux bongx aek byoebbyoeb, hawj cihgeij simdingh.

Canghdeurin laebdaeb naeuz:“Haxbaenh gij vah sou, gou dingq ndaej cingcing cujcuj, mbouj yungh gou naeuz, sou hix rox, gij vah sou dwg vahgyaj, sou gangj vahgyaj mbouj lau deng byajbag ha? Ngoenzlwenz gou bae daengz ranz gyoengqsou, sou bouxboux heuh gou gwn haeux, hoeng, mbouj miz byawz caen caux feiz doengh rek, gou cij ndaej dungx iek dauqma.”

8 dah lwg dingq le, bouxboux ngaemgyaeuj mbouj gamj cingqda yawj daxboh.

Canghdeurin yawj gij buhvaq gwnz ndang cihgeij, naeuz:“Sou yawjyawj buhvaq gwnz ndang gou, danghnaeuz haxbaenh gou caen dai bae, sou couh hawj gou daenj buhvaq bingzciengz bae lajyaem la? Gou miz 8 dah lwg, lienz geu buhsouh ndeu cungj mbouj miz daenj bae lajyaem, gou……gou……” Canghdeurin nanzgvaq ndaej gangj mbouj ok vah lo.

Dahdaih sing daemq naeuz:“Ngoenz guhsouh 61, gou laihnaeuz 7 dah nuengx haengjdingh miz byawz guh buhsouh hawj daxboh, ndigah gou couh mbouj guh lo.” Gangj sat yawj coh geij dah nuengx.

Dahngeih naeuz:“Gou hix laihnaeuz cejnuengx 7 boux, haengjdingh miz byawz guh buhsouh hawj daxboh, ndigah gou……”

Geij dah lwgmbwk bouxboux cungj dwg yienghneix naemj. Ndigah ngoenzseng canghdeurin bi 61, de dauqdaej mbouj sou ndaej saek geu buhsouh.

Caj geij dahlwg gangj sat le, canghdeurin haeujaw gag eu fwen:

“Gyoengq lwg bohmeh seng,

Seng gonq youh ciengx laeng.

Guh lwg aeu rox aen,

Boiz aen youh boiz cingz.”

Eu sat le, de bibi fwngz naeuz:“Sou ma ranz sou ba!”

Geij dah lwg mbouj guhsing, najgaejyat gag ma ranzgvan lo.