Auseiq youq henz dongfeiz naeuz:“Duicangj, mbouj vuenh lo! Raeuz mbouj ndaej ok hong laebdaeb rubrub rabrab ndaem naz lo. Mwngz mbouj miz gingniemh, dou caezgya bangbang de.”

Auseiq couh caeuq geij boux dawz cae mwngz song rongh gou sam rongh bang Bohminj dauqcungz cae ndei naz.

Haemhde, ndaw dui couh hai hoih, dawz doenghgij dauq ngeix faen swliuzdi gangj ndei lo. Ndaw dui couh ciemhciemh doxgiet hwnjdaeuj, caez- sim guhhong lo.

Doxdax Ndaem Naz

Youq doenghnaz Dahbyayieng dou, liglaiz cungj dwg vunzsai cae naz rauq naz, mehmbwk ciemz gyaj ndaem naz. Mbanjbicanh dou caemh mbouj linghvaih. Youq ndaw swnghcanjdui, mehmbwk couh baenz le cawjlig swnghcanjdui ciemz gyaj ndaem naz. Gyoengqde cungj dwg boux caixhangz ciemz gyaj ndaem naz.

60 nienzdaih cunggeiz, ndaw yienh dou doigvangq sawjyungh cazyanghgih. Ndaw dui dou caemh cawx ma geij gyaq. Yiengh caz- yanghgih neix, aeu vunz doiqdauq rag dwk baez mbat baez mbat daj ndaw sienggyaj beng gyaj okdaeuj cijndaej ndaem roengz naz bae, caemh dwgrengz lai, gyoengqdou cungj mbouj haengj yungh geijlai.

Gunghse ganbu cap youq Mbanj- bicanh, heuhguh Laujmoz. De vihliux yungh cazyanghgih ok haujlai rengz. De naemj guh mbat doxdax ndaem naz he, hawj caezgya cungj haengj yungh cazyanghgih, couh daeuj dungyenz Simjngeih caeuq cazyanghgih doxdax ndaem naz mbat he.

Simjngeih mwhhaenx ndaej 40 lai bi, youq ndaw dui dou dwg boux ciemz gyaj ndaem naz lauxhangz he. Dou yawj de ndaem naz, fwngz seuq caenh lumj gaeq dot haeuxnaed nei.

Laujmoz ngamq dwen baez he, Simjngeih couh doi sam doi seiq:“Gou laux lo! Caih hauxseng guh ndaej lo!”

Laujmoz naeuz:“Byawz mbouj rox mwngz ndaem naz lauxhangz.”

Simjngeih naeuz:“Daxniq caemh lauxhangz bw!”

Laujmoz naeuz:“Daxniq yaek hai cazyanghgih.”

Simjngeih naeuz:“Mwngz gaej aeu gou ma guh maxlaeuz!”

Laujmoz naeuz:“Mbouj gangjriu. Gijneix dwg gij yinvu gvendaengz cwngci!”

Simjngeih cij ndaej dapwngq lo.

Laujmoz naeuz:“Mwngz hix bae cimh Mehgyauz——”

Simjngeih:“Gij doih gou gag ra.”

Aen doxdax neix youq doenghnaz Vujcueng gawjbanh. Ngoenzhaenx, daengx aen dadui gak boux siuj- duicangj caeuq gyoengq mehmbwk cungj daeuj camgya.

“Simjngeih, ngoenzneix daeuj yawj mwngz ndaem naz lo.”

Simjngeih angq naeuz:“Ngoenz- neix aeu gij yakyawj hawj faenh sou yawj lo.

Naz gaenq rauq ndei lo. Aen cazyanghgih 3 boux hauxseng. Simj- ngeih caemh 3 mehmbwk, song boux mehmbwk de gag ra daeuj gap baenz aen dui, doengh boux mehmbwk neix cungj dwg ndaw dui ndaem naz caix- hangz. Gyoengq hauxseng dou fucwz hawj song mbiengj vunz rap gyaj.

Ngoenzde ndit caemh mengx. Ae! Hah sou hah ndaem, seizlawz mbouj hwngq!

Gyoengq hauxseng dou rap gyaj gvaqbae, couh raen song gyoengqde hainduj ndaem naz lo.

Baihneix 3 boux hauxseng aeu cazyanghgih ndaem. Gyoengqde sam boux vunz doxlwnz dwk, vunz dingz gihgi mbouj dingz. Boux ndeu doiq- dauq dwk rag gihgi ndaem, “gaca gaca” gij sing cazyanghgih rwenz- rubrub. Go’gyaj couh daj “laj dungx” cazyanghgih duengh okdaeuj ndaem roengz naz bae. Boux ndeu couh aeu gauqcienj daet raggyaj, coux sieng. Boux ndeu comj gyaj, ndaejhoengq couh bang daet raggyaj. Gyoengqde ndaem dwk mbouj vueng mbouj nyaengq, doxlwnz dwk ndaem, baenz- neix couh ndaej doxlwnz yietnaiq.

Simjngeih baihde 3 boux meh- mbwk, gag vunz gag ciemq gaiq naz ndeu, gag vunz gag vanq gyaj. Yienzhaeuh gag vunz gag gungj hwet roengz ndaem naz.

Gyoengqdou rap gyaj gvaqbae, yawjraen Simjngeih gwnz gyaeuj daenj aen gyaepgoknyaenz; gwnz ndang daenj diuz buhdox he, gaenq deng hanh cimq dumz lo; laj ndang daenj diuz vaq ndaem he, doengzvaq vid daengz giz gyaeujhoq.

Simjngeih aj ga cik lai gvangq, cap roengz namh bae, gungj hwet goemzgingq. Song fwngz iet dep henz namh, couh yienghneix lwgmeh caeuq lwgyinx fwngzswix baez dawz sam seiq dug gyaj faen okdaeuj, fwngzgvaz couh swnhfwngz ciep gvaq ma ndaem roengzbae, seuqdangq dangqmaz. Mbat yaep da he, song fwngz daj swix daengz gvaz mbat vad, coij gyaj ndeu couh youq dangqnaj heuseuseu lo. Ga’gvaz mbat doenq laeng baez nod, song fwngz caiq daj gvaz daengz swix mbat vad, coij gyaj daihngeih couh ndaem roengzbae seuqset lo.

Buenq ngoenz seizgan, gyoengq- dou caen boiqfug lo: Aen cazyanghgih mbouj dingz. Gaca! Gaca! Gij sing cazyanghgih yiengj dwk rwenzrubrub, caen lumj ciengq go nei. 3 boux mehmbwk de mbouj vueng mbouj muengz, mwngz ndaem sat le daengz gou, gou comj ndaej le daengz de. Yienznaeuz nditndat mengx, hoeng ndaem ndaej caemh cwxcaih.

Dou caemh boiqfug Simjngeih 3 boux mehmbwk neix: Ndaem baenz gaiq naz mbouj iet hwet, vanq roggyaj vanq ndaej cinj, roggyaj ndaem le daihngeih rog ngamqngamq couh youq baihlaeng ga, mbouj aeu yaek iet fwngz bae vax. Dienheiq baenzlai hwngq, hoeng mbouj raen gyoengqde yaek gwn saek gaemz raemx.

Banringz, doxdax sat lo. Daihgya hwnj daengz henz doenghnaz laj goyouzgyaeuq hai hoih cungjgez.

Laujmoz sing hung naeuz:“Haetneix ndaem naz, aeu caz- yanghgih ndaem ndaej song moux, aeu fwngz ndaem ndaej moux bet. Cazyanghgih ndaem ndaej gveihgwz ndei, doxhab biucinj; dan aeu vunz ndaem, gveihgwz ca di. Gij ndei cazyanghgih daihgya cungj caenda yawjraen lo. Ndaem ndaej riengjret caemhcaiq soengset. Daihgya doengz- eiq le, dawz cazyanghgih okdaeuj, baij roengz naz bae ndaem, doeklaeng daihgya fwngz sug le, ndaem ndaej engqgya vaiq. Aeu gihgi ma ndaem beij dan aeu vunz ndaem ndwi engq fuengbienh!（caengz sat）