Fwengeq Mulaujcuz youq Ciuzyenzcauz mboengq doeksat caeuq Ciuzmingzcauz mboengq hainduj couh baenz fwen lo, hix dwg cungj gyonj heuh ndeu, heuh gij fwen vunz Mulaujcuz youq dajndaem dajciengx gvaqngoenz ndawde guh baenz cienz roengzdaeuj haenx, ndaej dangguh yiengh maenhndei gven- daengz vwnzyoz ndawbiengz Mulauj- cuz. Fwengeq Mulaujcuz daih- bouhfaenh cienzlah youq Lozcwngz Mulaujcuz Swciyen, gyoengqvunz Mulaujcuz youq seiz gvaqciet、ngoenzhaw doxcomz giz ndeu doiq fwen, hix youq seiz banh ciengzfwen cojcienz haenx eu fwen.

Fwengeq Mulaujcuz baihndaw miz“doenghyiengh”lai、coenz fwen maenhndei、gangj ndaej sengdoengh、yiengh lai dangqmaz, miz 90 lai cit cienzlah haemq gvangq, gungh miz 90 lai cungj yienghsing; daihgaiq faen baenz“fwen hai daiz”“fwen lwnh saeh”“fwenyoux”“fwen doxbeij”“fwen guhleix”caeuq“fwen Vah- mulauj”“fwenyoux Bouxcuengh”“fwen wnq”daengj. Doenghgij fwengeq neix ca’mboujlai cungj miz gij gyaq dijbauj gvendaengz lizjsij、minzsuz、yisuz daengj lai fuengmienh.

Haujlai bi gvaqdaeuj, vihliux swnjcienz henhoh fwengeq Mulaujcuz ndaej lai ndei, ndawbiengz gyoengq vunz mizsim miz dungxcaiz haenx haenqrengz vatgud、cingjleix、bien saw okbanj fwengeq Mulaujcuz. Bi 2008, bouxsughangz Mulaujcuz heuhguh Lungz Denbauj haenx cawjbien bonj saw《Fwengeq Mulaujcuz》le ndaej Gvangjsih Minzcuz Cuzbanjse okbanj fathengz. Bonj saw neix gungh 89 fanh cih. Ndawde faen baenz bet gyaengh.

《Fwengeq Mulaujcuz》ndawde miz“doxgaiq”lailai, yiengh fwen lailai. Daegbied dwg yiengh fwengeq Mulaujcuz, miz fwencoenz ciuq daengx cit fwen miz geijlai coenz daeuj anmingz; miz fwensoqcih ciuq coenz miz geijlai cih daeuj anmingz; vanzlij miz fwensoqcih ciuq daengx cit fwen miz geijlai cih daeuj anmingz, neix gungh miz 90 lai cungj; neix hix dwg naeuz eu fwen seizhaenx miz 90 lai cungj yienghsing. Daengx guek miz 56 aen minzcuz, ndawde daihgaiq mbouj miz aen minzcuz lawz miz cungj fwen neix lo.

Bi 2009, 《Fwengeq Mulaujcuz》ndaej“Daihgouj Gaiq Cungguek Ndawbiengz Vwnzyi Sanhvah Ciengj”(aen ciengj cozbinj vwnzyoz ndaw- biengz), neix hix dwg naeuz youq gih raeuz vwnzyi ndawbiengz ndawde aen cozbinj neix aeu ndaej aen ciengj ceiq sang gvendaengz cungj ciengj daengx guek vwnzyi ndawbiengz.

Fwengeq Mulaujcuz ndaej swnjcienz roengzdaeuj, cungj aeu miz gyoengq vunzsughangz ndawbiengz Mulaujcuz daeuj laemxsim dingjguh caeuq haenqrengz. Bouxswnjcienz fwengeq Mulaujcuz Lungz Gvanghli ok goengrengz liuxcaez、dingjguh mbouj duenh, baenzneix swnjcienz fwengeq Mulaujcuz. Mboengq“Vwnz- gwz”, vihliux swnjcienz ndei doenghgij fwengeq cojcienz roengz- daeuj haenx, vihliux lienh eu fwen ndaej sugseg bae, Lungz Gvanghli ngoenzngoenz cungj buet hwnj gwnz bya bae, ra aen gamj ndeu, ndoj haeuj ndawde bae eu fwen. Mizseiz, banngoenz hwnj bya mbouj fueng- bienh, de couh banhaemh hwnj bya. Neix baez eu couh baenz haemh nanz bae, ngoenz daihngeih ranz baez rongh couh roengz bya, soh bae guh hong dajndaem dajciengx lo. Couh yienghneix“baenz haemh haenq guh”, Lungz Gvanghli lienh ndaej dungxcaiz maenhndei dangqmaz bae, de boih doenghgij fwen ndaw sawgeq cojcienz haenx ndaej sugseg bae, eu ndaej sengdoengh dangqmaz, vanzlij guhdaengz baez eu fwen le couh mbouj roxnyinh naetnaiq, yied eu vunz yied cingsaenz.

Bi 2010, fwengeq Mulaujcuz ginggvaq Gvangjsih Bouxcuengh Swcigih Yinzminz Cwngfuj doengz- eiq, ndaej lied haeuj daihsam buek swcigih gaep feihvuzciz vwnzva yizcanj mingzloeg.