“Suenq lo, gven dou ba.” Bohgeng coh bakdou byaij bae. Mehyah doq uet daiz doq han:“Gaenj maz, maranz cix mbouj youq ndwi.” Bohgeng naeuz:“Fwn doeksobsob, haemh lai lo, mbouj miz hek lo.” “Deq yaep dem.”

Deq daengz 10 diemj cung, Bohgeng ngamq rag dougienj doxroengz, yawjraen bakdou ndwn miz daegmbauq oiqnumnnum ndeu. “Lauxbanj, lij miz faenj lwi?” Bohgeng riuhehe cingj de haeuj naengh, coh baihndaw hemq naeuz:“Vaiq caq faenj hawj bouxhek!” Mehyah Bohgeng han:“W, daeuj lo!” Daegmbauq nyaenqndemndem, nienzgeij mbouj daengz 20 bi. Baihlaj daenj diuz vaqraez ndaem- mong, baihgwnz daenj buhgendinj haugaeuq. “Lauxbanj, cawj vanj faenjbyaekheu ndaej lo.” Bohgeng riu naeuz:“Mbouj miz faenjbyaekheu bw, caenh miz faenjnoh.” “Yienghneix, cawj 4 maenz cienz faenj.” Bohgeng cienq ndang haeuj ranzcauq. Mehyah hozgaemz naeuz:“4 maenz baenzlawz cawj, vanj ceiq noix cungj 5 maenz lo.” Bohgeng naeuz:“Cawj vanj ndeu hawj de ba, mwngz mbouj raen de buh mbaeq vaq mbaeq, ndang saenzdwddwd ha.”

Bohgeng dawz vanjfaenj ngamq cuengq gwnz daiz, daegmbauq doq ndaek gaemz ndaek gaemz soekgwn. Bohgeng naeuz:“Menh di gwn, ndat bak bw.” Daegmbauq ngaemgyaeuj gwn faenj:“Iek lo.” Gwn sat, daegmbauq ndenq 4 maenz cienz hawj Bohgeng, mbajmbwdmbwd naeuz:“Doiq……mbouj hwnj, gou……caenh miz di neix lo.” Bohgeng riunyumnyum cam:“Gwn imq caengz? Mbouj imq gwn vanj dem.” Daegmbauq ndwn hwnjdaeuj:“Imq lo, imq lo.” Naeuz sat, ndonj haeuj ndaw fwn, coh roggai buet bae lo.

Mehyah hongzgvaiq Bohgeng:“Mwngz baenz- lawz ngamq sou de 4 maenz, raeuz mbouj caem bae maenz ndeu la.” Bohgeng naeuz:“Lwgnyez vunz lauxsaed, de caen mbouj miz cienz, miz cienz de mbouj hawj ha.”

Bohgeng caeuq mehyah youq yienhsingz hai aen bouqfaenjcaq neix, gaenq ndaej 5 bi lai lo. Aenvih gvanbaz dinfwngz gaenx guh, bakmbaeu simsoh, bouqfaenjcaq ciengzseiz bouxhek rim ranz. Gvanbaz haetcaeux ranz caengz rongh couh hwnq mbonq, haemhlaep 10 diemj cung cij ndaej gven dou yietnaiq. Couh yienghneix, baez vanj baez vanj gai faenj, baez gak baez maenz sou cienz, aen bouqfaenjcaq cij cengqgengz hai daengz ngoenzneix, caemhcaiq youq ndaw yienhsingz okmingz. Caen mbouj ndaej gvaiq mehyah damzbyoedbyoed lo.

Daegmbauq neix ca mbouj lai haemhhaemh cungj daeuj gwn faenj. Moix baez, Bohgeng cungj sou de 4 maenz cienz. Ciemhciemh, Bohgeng caeuq daegmbauq couh sugnaj, hix rox de heuhguh Daeggoek, ranz youq diegbya lajmbanj, ndawranz ciq cienz ciq caiq soengq de doeg sat giyau le, couh louz youq ndaw yienhsingz ra hong. Hoeng, vunz oiq najmbang, mbouj raen gvaq seiqmienh, ra bae ra dauq, gig mbouj yungzheih ra ndaej faenh hong youq aen gvangjgau gunghswh ndeu. Byawz rox, youh deng vunz yaeuh. Lauxbanj deuzdag, Daeggoek faen cienz mbouj ndaej, gij cienz bohmeh geiq hawj de gaenq ciemh ngoenz ciemh noix, de ngoenznaengz caenh ndaej gwn vanj faenh ndeu ciengx dungx.

Miz ngoenz he, Bohgeng yawjraen Daeggoek naj haiyabyab byaij haeuj bouq daeuj, couh riuhehe cam de:“Daeggoek, saeknaj rongh lumj mbwn- gvengq, gip ndaej maz dijbauj la?” Daeggoek angqfwngfwng naeuz:“Bohlungz, cawj vanj faenjga- mou ndeu,” youh naeuz:“Dwg ha, ra ndaej faenh hong soengq huq he.” Bohgeng riunyumnyum naeuz:“Miz hong guh couh baenz.” Gwn sat, Daeggoek darongh ndaengriu naeuz:“Bohlungz, gij faenj mwngz baenz gwn raixcaix.”

Gvaq ndwen lai, miz ngoenz ndeu, Daeggoek ga’gvez ga’ndiengq byaij haeuj bouq daeuj, Boh- geng baez yawjraen, doq cuengq aen vanj ndaw fwngz bae rex de, cam:“Baenzlawz baenz yienghneix lo? In mbouj in?” Daeggoek riumbw naeuz:“Caen boihseiz, ngoenzlwenz bae soengq huq, deng ci bungq lo. Caeklaiq mbouj deng ndoekraek,” Daeggoek doeknaiq nueknuek danq naeuz:“Hong biq lo.” Bohgeng nai de naeuz:“Gaej simgaenj, deq ga ndei caiq bae ra hong. Bohlungz miz vanj faenj hawj mwngz gwn.”

Gwn faenj sat, Daeggoek naj hoengzgoedgoed cam:“Bohlungz, ciq……ciq di cienz hawj gou, ndaej lwi?” “Ndaej ha, mwngz yaek aeu geijlai?” Bohgeng sangjswt han de. “Song……song cien maenz.” “Mwngz baez deq he.” Bohgeng cienq ndang haeuj ranzndaw, mehyah ragdawz de:“Mwngz caen hawj de dahraix ha, mwngz rox de dwg mbouj dwg yaeuh vunz?” Bohgeng hix miz di yaemhywx, hoeng de baez yawjraen fouq da hojlienz Daeggoek, couh sim’unq lo. De riengjret daj ndaw hazbau yut ok 2000 maenz, oet hawj Daeggoek. Daeggoek naeuz:“Bohlungz, 3 ndwen, gou couh daeuj boiz mwngz.”

“Daeggoek boiz cienz hawj mwngz la?” Haemhneix gven dou ndei, mehyah cam Bohgeng. Ngoenznaengz caq faenj gai faenj nyaengqnyinyi, Bohgeng cungj lumzlag Daeggoek ciq cienz gienh saeh neix lo. Seizneix mehyah baez dwen, de cij geiq hwnjdaeuj. Caen bw, 3 ndwen gvaq lo, caengz raen naj Daeggoek. “Raen lwi, deng yaeuh luba.” Mehyah mboensebseb. Bohgeng hozraez naeuz:“Daeggoek mbouj dwg cungj vunz neix. De guh ndaej cienz, itdingh rox soengq daeuj.”

Saedceij gvaq ndaej lumj raemx lae doxbae, song bi gvaqbae lo, Daeggoek lienz ngaeuz cungj mbouj raen. Mehyah ngoenzngoenz damzbyoed- byoed. Bohgeng hozfod fok de:“Gaej raemh lo. Nyok hawj de 2000 cien maenz youh baenzlawz yiengh? Ndaej bienq gungz bae ha.”

Bouqfaenjcaq ngoenz ciemh ngoenz bienq ndei, cienz ciemh rom ciemh lai. Bohgeng gvanbaz angq loh gwnz naj. Byawz liuh, raq feizcoemh ndeu dawz gij fangzhwnzloq Bohgeng coemh bae seuqsad. Yawj ndaw bouq seiqlengq remjradrad, ndaemndadndad, Bohgeng sim’in lumj deng nou gaet.

Ngoenzneix, Bohgeng caeuq mehyah cingq youq ndaw bouq sousib rek vanj hongdawz, rara lij miz maz ndaej yungh dem. Yaephe, caenh raen bakdou ndwn miz daeg vunz ndeu, yawj de nienzgeij ndaej 30 bi baedauq, daenj dauq sihcangh habndang ndeu, cingsaenz gvaekgvaek, gwnz din haiznaeng ronghsagsag. Raen de dinghdingh ngonz ndaw bouq, Bohgeng ngauzgyaeuj sigsig naeuz:“Daegmbauq, mbouj miz faenj gwn lo. Mwngz bae gizwnq ba.”

“Bohlungz, mwngz mbouj ndaejgeiq gou la?” Bohgeng da dinghsaesae cim de yaephe, fwngz fwt daj gagoek iet angq hemq:“O, dwg mwngz ya. Daeggoek,” riuhoho cam:“Mwngz caen dwg cungq- roeg vuenh bauq lo. Seizneix youq gizlawz fatcaiz ha?” Daeggoek lwnh Bohgeng nyi, de seizneix youq Nanzningz hai diemqdaeqgyaeuj, lienz hai 3 aen lenzsojden. Bohgeng bak dajcubcub haenh naeuz:“Mwngz caen miz bonjsaeh lo, rox ra rox cauh.” Daeggoek naeuz:“Geij bi neix gou dauqcawq ra mwngz mbouj raen, bineix maranz gvaqcieng, cij damqdingq rox mwngz gaenq senj bouq daeuj gizneix. Caen doiq mbouj hwnj, 2000 maenz cienz daengz seizneix caengz ndaej boiz.” Bohgeng riuriu naeuz:“Hai, di saeh iq neix, gaej venjsim.” Bohgeng vixvix ndaw bouq naeuz:“Ngoenzneix caen mbouj habseiz, mbouj miz faenj daih mwngz lo.” Daeggoek nai de naeuz:“Bohlungz, gij saeh mwngz gou cungj rox lo, gaej simduix, daj daeuz dauq guh.” Bohgeng naj mbwng’yauyau:“Vah dwg yienghneix gangj, hoeng, hoj lo, mbouj miz baenzlai cienz dauq guh lo.” “Bohlungz, ndaw fwngz gou miz di cienz yawz, mwngz dawz bae gouqgip gonq.” Naeuz sat, ndenq hawj Bohgeng mbaw gaj, ndawde miz 5 fanh maenz. Bohgeng bibi fwngz, doiswz naeuz:“Mbouj ndaej, mbouj ndaej. Mwngz lij miz bohmeh youq lajmbanj ciengxlaux.” Daeggoek naeuz:“Bohlungz, mwngz caeuq gou gaej guhhek lo.”

Yaemz yaephe, Daeggoek doenghcingz naeuz:“Bohlungz, bihaenx, danghnaeuz mbouj miz vanj faenj mwngz, gou seizneix gaenq baenz fangz lu.” Daeggoek raemxda gvaengxloekloek:“Bihaenx deng ci bungq le, hong mbouj miz, cienz mbouj miz, gou saetmuengh lo, siengj dai bae suenq lo. Caeklaiq mwngz ciq cienz hawj gou, mboujnex, gou couh……” Daeggoek daejsaekwk, de nunu raemx- da, youh naeuz:“Bohlungz, 2000 maenz cienz mwngz, caemh dwg diuzcag gouqmingh gou ha……”

Mehyah mbouj rox seizlawz hix ndwn youq henz ndang Bohgeng, raemxda rihnangnang.