Bonjbauq siusik (gicej Cau Dwzfeih Liengz Cingz) Ndwen 9 ngoenz 8 banhaemh, Cunghvaz Yinzminz Gunghozgoz Gaiq Daihcib- it Siujsoq Minzcuz Cienzdoengj Dijyuz Yindungvei haimuqsik youq Hoznanz Swngj Cwngcouh Si Aulinz Bizgwz Dijyuz Cungsim banh, guekcoj gak dieg 56 aen minzcuz beixnuengx doxcomz gizhaenx, caez caeuqfaenh aen hoihhoengh minzcuz 4 bi gvaq baez haenx. Gwnz haimuqsik Gvangjsih Daibyaujdonz dwg aen doih haeujciengz daihnduj, yungh “Gvangjsih 30 miux” dinj- detdet haenx langhbaij aen Gvangjsih gyaeundei lai yiengh、yiedcingz ndeu hawj bouxyawj daengx guek.

“Gvangjsih gak cuz lwgminz ciengzgeiz doxdaeuj doxndiep dox- gyaez lum ranz vunz, minzcuz gvanhaeh ndei raixcaix……” riengz dwk gaisau, Gvangjsih yindungyenz daibyauj、gizsouj caezcingj yamqdin, cingsaenz gvaekgvaek okdaeuj hoihciengz. Dingz youq biujyienj daengx gij hothoh daegsaek daengx guek minzcuz yindungvei haimuqsik, moix aen daibyaujdonz yungh 30 miux biujyienj, aeu gij yenzsu aen minzcuz ceiq miz daegsaek haenx langhbaij okdaeuj. Gvangjsih 50 boux dingz youq biujyienj bouxyienj ndang daenj buhvaq Bouxcuengh, cuengq gij go 《Gvangjsih Ndei Lai Lo》, fwngz gaem aennyenz caeuq aen dingzdingj, yinx ndaej bouxyawj yienhciengz dopfwngz haenh. Daengz doeklaeng, bouxyienj caez hemq “Cauxlaeb Aen Gvangjsih Gyaeu- ndei, Saedyienh Aen Loqsiengj Fukhwng”, daengx ciengz yaepyet nauhyied hwnjdaeuj.

20 diemj 58 faen, riengz dwk daengx ciengz hemq dauqgeq seizgan, haimuqsik yienjheiq aeu “Cunghvaz Minzcuz ranz vunz ndeu·dazfwngz haenqguh seizdaih moq” guh cawjdaez haenx hainduj lo. Gyong’aemq Cangcuz daj gwnz mbwn menhmenh gyangq roengz- daeuj, bouxyienj youq gyang fwj diuqfoux, caezgya heux gyong angq- yangz diuq hwnjdaeuj. Seizgan riuz- cienj, mbaw damjmbin cang boux diuqfoux Veizvuzwjcuz riengz mbwn roengzdaeuj, dinbya Denh- sanh, gak minzcuz beixnuengx angqyangz ciengqgo diuqfoux, ciengzmienh doxgiet huzndei.

Daengx guek siujsoq minzcuz cienzdoengj dijyuz yindungvei dwg aen hoihhoengh minzcuz cienzdoengj dijyuz cunghabsingq guek raeuz gveihgwz ceiq sang、gveihmoz ceiq hung、ceiq yinx vunz yawjngonz, dwg aen bingzdaiz youqgaenj langhbaij gij cingzcik minzcuz cienzdoengj dijyuz caeuq yindung gisuz suijbingz、fatyiengz minzcuz vwnzva maenh- ndei. Gaiq siujsoq minzcuz yin- dungvei neix gungh miz daengx guek 31 aen sengj(swcigih、cizyazsi)、Sinhgyangh Swnghcanj Gensez Binghdonz、Cungguek Yinzminz Gaijfangginh caeuq Daizvanh siujsoq minzcuz gapbaenz 34 aen daibyauj- donz gungh 7009 vunz conhciz yindungyenz caeuqfaenh, gungh laeb 17 aen hanghmoeg hung doxdax, 140 aen hanghmoeg iq doxdax, caeuq 194 aen hanghmoeg biujyienj.