Aen Mbanjbicanh dou, dieg youq Dahbyayieng hamq baihnamz, dangq- naj mbanj couhdwg doenghnaz Dah- byayieng riengzmingz neix. Gyoengq vunzmbanj dou seiqseiq daihdaih aeu guh naz guh reih, it bi seiqgeiq, caecae rauqrauq, ndaemndaem ndai- ndai, gvejgvej raemjraemj, gij dwg- rengz sinhoj gangj cungj gangj mbouj sat. Daengz 20 sigij caet betcib nienzdaih, gyoengq vunzmbanj guh hong, yienznaeuz bingzbingz ciengz- ciengz, hoeng caemh dwg diuz saeu dingj ranz swnghcanjdui. Gyoengqdou miz haujlai gojgaeq, gangj hwnjdaeuj, caen hawj vunz boiqfug dahraix. Seizneix dawz gij gojgaeq gyoengq vunzmbanj dou gangj okdaeuj hawj caezgya nyi.

Auseiq cae naz rauq naz

Auseiq 60 lai bi vunz, youq ndaw swnghcanjdui dou suenq boux vunzgeq he. Gyoengqdou hauxseng riengz daxboh daxmeh caemh heuh de Auseiq.

De boux vunz sangseuq ndeu, lij coekcangq. Binaengz mbouj haengj daenj buh lai, caenh seiznit daenj saek song diuz buhdox sat lo, hoeng haengj caux feiz. Ngoenznaengz guhhong sat le yietbaeg, de couh gag ndoj haeuj ndaek gok ndeu bae caux dong feiz hoenzngaungau ndeu, doq cit ien doq bangh feiz.

Gyoengq dawz vaiz youq ndaw swnghcanjdui, suenq de nienzgeij ceiq laux, hoeng mbouj saek boux bae naeuz de. De guhhong lauxsaed, ndaw dui mbouj miz vunz bae dikdeuq.

Mwhhaenx, gyoengqdou haux- seng dawz cazyanghgih, cungj haengj bae ciengj gij naz Auseiq rauq. Gij naz de rauq youh bingz youh yungz, mbouj miz goenqfiengz camz hwnj naez daeuj.

Miz bi ndeu ndaemnaz, gunghse ganbu Laujmoz youq ndaw dui dou faen swnghcanj siujcuj. Gyoengq bazmeh bouxboux cungj yaek ciengj caeuq Auseiq doxgaep guh aen cuj ndeu, ceng dwk mbouj hwnj mbouj roengz. Laujmoz riu dwk naeuz:“Caih Auseiq gag genj aeu, haengj byawz couh aeu byawz.” Auseiq naengh youq goxdou, gag cit ien vauqvauq, mbouj riu hix mbouj aeuqheiq, mbouj gangj saek coenz vah, hawj Laujmoz ndwn mbouj dwg caemhcaiq naengh mbouj dwg.

Auseiq baeznaengz mbouj haengj gangj vah geijlai, hoeng miz ngoenz ndeu gyoengqdou raen de caeuq Bohminj doxcwngq dwk najhoengz rwzdit.

Mwhde gaenq haeuj seizdoeng, haeuxlaeng gaenq gvej sat, doek raq fwn he, ndaw dui couh nyaengq cae doeng lo.

Ngoenzde, gyoengqvunz dawz vaiz youq Vujcueng dawz cae. Gyoengqdou caeuq bang bazmeh hix youq gizhaenx sauq mieng.

Gyoengqdou ngamq guh ndaej can hong ndeu, gyoengq dawz cae couh yiet vaiz cit ien lo.

Sawqmwh youq henz naz Boh- minj cae gvaq, Auseiq caeuq Bohminj doxcwngq hwnjdaeuj.

Gyoengq mehbaz cungj mbouj leixlangh haeuj rwz. Hoeng gyoengq hauxseng dou baeznaengz raen rumz couhdwg fwn, seizneix ndwn ndaej gyae couh rag faggvat comz gvaqbae yawjyawj.

Auseiq hongz:“Yienghneix heuh cae naz ha?”

Gyoengqdou mbat baez yawj, cingqcaen coegda lo. Gij naz ngamq veu di caengz ndeu, goenqfiengz youq gwnznamh ngengngaungau, vanzlij mbouj caengz gat rag.

Bohminj miz di najsaep han:“Hawj gou baezlawz cae?”

Auseiq dap:“Raeuz mbouj vei naz, naz mbouj vei raeuz.”

Bohminj hat:“Bak mwngz caen rox gangj.”

Auseiq mbouj caiq gangj saek coenz, cienq ndang gag byaij haeuj gok lingh bae lo.

Bohminj deng vunz hongzndaq le, miz di hozhwnj naeuz:“Mwngz cix cae ndaej baenzlawz yiengh?”

Gyoengq hauxseng dou caiq yawjyawj. Gij naz Auseiq cae gvaq, gij riz cae sohrwdrwd, buenqcae dawz goekhaeux goemq roengz lajde bae. Daejdoemnaz fan hwnjdaeuj baizcece. Yawj hwnjdaeuj, sangj da dangqmaz.

Duicangj haenh naeuz: “Auseiq naeuz ndaej deng lo. Raeuz guhhong lanxgyanj, gag yaeuh bonjfaenh.”

Liglaiz vunz dawz cae youq ndaw dui gangj vah couh miznaj baenz soq. Bohminj youq ndaw dui guhhong cungj haengj rubrab. Duicangj dwg hauxseng, ngamq guh mbouj ndaej geijlai nanz. Gyoengq dawz vaiz aenvih de oiq cungj yawj de mbouj hwnj da. Bohminj deng duicangj miq le, fajnaj hoemj mbouj ndaej roengz. De sing hung dek naeuz:“Gokbak caengz miz mumh, couh daeuj hat vunz lo. Ndaw da mwngz lij miz bangeq lwi?”

Seizneix, gyoengq mehbaz caemh comz gvaqdaeuj lo, caemh yawj mbouj gvaq da.

Cae naz cae ndaej caemh lanx- gyanj lai lo.

Bohminj raen vunz yied humx yied lai, euq naeuz:“Couh yienghneix cae, ndaem ndaej naz couh baenz lo.”

Duicangj fouznaih naeuz:“Aeu goengfaen mbouj dwg yienghneix aeu.”

Duicangj ndaej 30 bi baedauq. Gaxgonq duicangj dailix cungj mbouj nyienh guh, baihgwnz cix naemj hawj de guh. Mbangjvunz raen de oiq, laihnaeuz doeklaeng miz maz saeh cungj mbouj lau de naeuz, ndigah couh swngz raemx cauh ruz senj de lo. Duicangj caengz miz saekdi ging- niemh guenj gij saeh ndaw dui, caemhcaiq gangj vah gyoengqvunz cungj mbouj daiq dingq, ndigah ndaw dui maqhuz luenhbyub.

Auseiq youq henz danq naeuz:“Swnghcanjdui dangq duz vaiz ndeu. Raeuz seizneix cungj duengh diuz rieng de gwn haeux lo.”

Gyoengqdou cix ngeixlwnh foenxfoenx.

Miz vunz naeuz:“Youq ndaw dui guhhong, de guh ndaej rubrab, bouxwnq guh ndaej haeujsim dwg- rengz, doeklaeng aeu goengfaen doxdoengz, mbouj ndaej yienghneix bw!”

Miz vunz naeuz:“Caezgya caez youq ndaw dui gwn haeux, lij caeuq ndaw dui mbouj caemh aen sim. Baenzlawz ndaej?”

Bohminj deng vunz naeuz le, sim cungj mbouj angq, de hix naeuz:“Seizneix rox daeuj naeuz gou? Faenh sou ne? Gyoengq mehbaz haetnaengz maeuq youq swliuzdi cungj mbouj siengj ok hong, couh caeuq ndaw dui caez sim la?”

Caezgya caiq ngeixlwnh hwnj- daeuj.

Miz vunz naeuz:“Swliuzdi liz ranz gyae lai lo.”

Miz vunz gangj:“Ma henz mbanj faen sat lo.”

Miz vunz sek:“Gangj ndaej deng! Ma henz mbanj faen, ma henz mbanj faen.”（caengz sat）