Gaenq byonghhwnz gvaq lo, Liengz cujyin ninz gwnz mbonq fonj bae caiq fonj dauq cungj ninz mbouj ndaek, de simsaeh naekdumdum. Doengx- hwnz caemdingh dwk miz di dwglau, Liengz cujyin ceiq lau soujgih yiengj, de lau miz vunz ra de. “Gag rox hangx uq haex, damyou saeh haeuj ndang, ndwn youq henz dat sang, dan lau fangz daeuj gyaep.”

De caen siengj gven’gvak soujgih bae cij moek gyaeuj moek rwz ninz, hoeng ndaw yangh miz gvidingh, bouxdaeuz cunhveij ngoenznaengz aeu baujciz 24 diemjcung dienhvah dwk ndaej doeng. Liengz cujyin soqlaiz dwg bouxdaeuz ndaw mbanj maenhndei, yawj mbawbuengj nem youq aen senhconzlanz rog hongh cunhveij, de miznaj ndaej baihgwnz bingzguh bineix “bouxdaeuz lajmbanj maenhndei” ne. De gaenq lienzdaemh geij bi ndaej aen ciengj neix lo. Doenghbaez de cungj haengjheiq vunz dwk dienhvah hawj de, mboujguenj saeh angq naeuz saeh you, de cungj mbouj mbwq saekdi, daegbied dwg bouxdaeuz baihgwnz dwk daeuj, baezbaez de cungj angqfwngfwng. Hoeng seizneix de cix gig lau soujgih yiengj, lumj rox dingh miz fangzgvij yaek ra de nei.

“Dud dud dud……” Soujgih sawqmwh yiengj hwnjdaeuj, Liengz cujyin doeksaet yat bae, caen dwg “mbeiiq roeb deng fangz, lau nit nyangz rumzbaek”. De sim diuqbubbub, saeknaj fwt heu fwt hau, fwngz saenzdwddwd gaem aen soujgih daeuj ciep.

“Vei! Bohdahniq ha, dou haemhneix aeu ndaej ciengj daeuzdaengj lo……” Laxlawz dwg yah de daj diegrog dwk dauqma, yah de ngoenzneix riengz doih okbae doxdax guhfwen, nyaenx hwnz lo lij dwk dienhvah, haih ndaej Liengz cujyin mbei yaek dek.

Haemhneix mbouj miz ronghndwen, hix mbouj miz saek aen ndaundeiq, yawj ok rog cueng bae laepngaungau, seiqlengq caemrwgrwg. Hoeng ndawsim Liengz cujyin cix caem mbouj roengzdaeuj.

Gyanghwnz raezrangrang, gvaq haemh dangq gvaq bi.

Rox seizlawz, Liengz cujyin moengjmoengj doengjdoengj loqraen geij boux daenj buhcifuz cingqcaep daeuj ra de. “Mwngz dwg Liengz Soujfaz lwi?”

Liengz cujyin hwk dwk nyouh yaek yaet, mbajdwddwd dwk dap:“W, dwg……dwg ha, sou ra……ra gou miz……miz maz saeh lwi?”

“Dou dwg gijveij genhcazgiz ndaw yienh, miz vunz gawjbauq mwngz gwn ngaenzoet bouxranzhoj, cingj mwngz riengz dou baema ndaw giz guh diucaz……” Liengz cujyin fwt roxnyinh najda laep- dik roengzdaeuj, daengx ndang fouzvangvang cengdi ngunhlaemx gvaqbae.

“Dud dud dud……” Soujgih sawqmwh yiengj ndaej gip lailai, Liengz cujyin doeksaet dwk ndiu gvaqdaeuj, baez yawj ok baihrog raen ranz gaenq ronghrag. De sim diuqbubbub.

“Vei, daxboh……” Dwg dahlwg de doegsaw youq aen hagdangz cungdenj gauhcungh ndaw yienh dwk dauqma cam aeu ngaenzgwnngaiz. Liengz cujyin soeng le gaemz heiq ndeu, mbouj miz maz saeh, dwg de gag ngeix lai lo, canh ndaej lau ndwi.

Bineix ngamq gvaq cieng, ranz hojndoq Cadoz nda cek aen ranzgaeuq vaihvadvad de bae, yaek gaij hwnq ranzmoq, vihliux ceng ndaej aen cijbyauh ngaenz bangbouj “gaijcauh ranz yiemj”, gag oet 5000 maenz “ngaenz dwgrengz” hawj Liengz cujyin. Haidaeuz Liengz cujyin mbouj gamj aeu. Hoeng, Cadoz lau de mbouj hawj cijbyauh nyengh oet hawj de. Ep geij mbat le, Liengz cujyin couh mbouj guhsing lo, fanjcingq ranz Cadoz gaenq gaeuq diuzgienh lo, couhsuenq ngenggonz hawj aen cijbyauh neix hawj de, hix mbouj miz vunz gangj maz. “Ndaek gvai rox guh vunz, dangj fwn roengz rumdoiq, raen ma lai haex noix, ciengj gwn goiq(gonq) cij baenz.”

Liengz cujyin roxnyinh gyaeujdot, miz di daraiz, de genjdan anbaiz gij hong ndaw cunhveij le couh gag bae yangh veiswnghyen hawj canghyw genjcaz. Canghyw bang de dag lwedat le naeuz de lwedat sang lai lo, simdiuq hix diuq ndaej yoeng lai lo, gienq de daj song bingz cimvenj.

Youq ndaw rug dajcim, bangxciengz aen densi ndeu cingq cuengq gij densi conhdizben “cienhangh ceihleix gij guhfap rwix hong banggungz”. Gwnz eijraez caemh miz haujlai vunzbingh naengh dajcim, gyoengqde miz boux ngonz densi, miz boux loengh soujgih, engqlai vunz dwg ing’ai laepda baiqninz. Liengz cujyin cix gag naengh gok ndeu, de miz di baegnaiq, cix mbouj gamj laepda, de lau laepda ninz ndaek youh loqraen aen fangzhwnzloq ndeilau haemhlwenz haenx.

Bingz yw ndeu ndik liux lo, dah husw he gaem lingh bingz daeuj bang Liengz cujyin vuenh hwnjbae. Cingq youq mwhneix, soujgih Liengz cujyin youh fwt yiengj “dud dud dud” hwnjdaeuj, de doeksaet dwk fwngz baez baetdoengh, bakcim lwednding dauqlae lo. Dah husw doq bang de yot cim lingh camz gvaq, bak nambedbed ienq naeuz:“Hw, mbouj rox mwngz lau maz ne, mbouj rox mwngz lau maz ne.” Liengz cujyin mbouj raen lai ndeiyouq saekdi, couh cam naeuz:“Husw, gou dauqdaej baenz maz bingh?” Dah husw haenx riu han naeuz:“Mwngz dwg baenz ‘bingh lau soujgih yiengj’.”

“Daengngoenz roengz youh hwnj, ronghndwen hwnj youh roengz, hoj gvaq ngoenz doek ngoenz, naengh lumj oen camz hangx.” Liengz cujyin couh yienghneix rubrub lablab gvaq le song ndwen. Ngoenzneix ciep ndaej baihgwnz aen dunghcih ndeu, heuh doengh boux cunhganbu baen song buek bae dangjyau ndaw yienh hagsib, Liengz cujyin deng anbaiz haeuj buek daih’it bae. “Bibi bae hagsib, hix mbouj gip gijmaz, dou doengh boux guhnaz, caenh ngeix ra gwndaenj.” Liengz cujyin roxnyinh ndang mbouj cwxcaih geijlai yaek cingjgyaj mbouj bae, hoeng yanghdangjveij mbouj baecinj, cijndei cengqgengz riengz doih bae lo.

Youq dangjyau ndaw yienh 3 ngoenz, ngoenz daih’it ngoenz daihngeih cungj dwg gangj gij hong “cauxguh lajmbanj vuenyungz” caeuq “hong dangjgen”, Liengz cujyin dangzdangz goq haidaeuz cungj dingq mbouj daengz buenq aen cungdaeuz couh maezmaez muenhmuenh baiqninz youh mbouj gamj ninz. Ngoenz daihsam dwg goq fapceih ——“Baenzlawz Fuengzre Cizvu Famhcoih”, boux genjcazgvanh daeuj gangj goq. Ngoenzde Liengz cujyin cungj mbouj gamj baiqninz saekdi, boux genjcazgvanh gangj goq ciengzsaeq gej gangj le gij cwngcwz fazgveih gven daengz yiemzceih doengh- boux guhdaeuz leihyungh gij fuengbienh cizvu caeg gwn ngaenz goenggya roxnaeuz dam gwn ngaenzoet, lij gawj ok haujlai saehcaen denjhingz. Liengz cujyin naengh youq baihlaj, sim diuqbubbub lumj yaek bongh ok rog aek daeuj, genjcazgvanh youq baihgwnz gangj gij vah haenx, lumj coenzcoenz cungj dwg gangj de naeuz de nei.

Daj dangjyau dauqma le, Liengz cujyin engqgya simnaiq lo, de gwn mbouj feih, ninz mbouj ndaek, mbouj miz simgei guhhong, guhmaz hong cungj loengloeng lauqlauq, ciengzseiz gag ngaez- ngwd ndaej vunz heuh hix mbouj rox ning mbouj rox doengh. Gyoengq vunzmbanj naeuz, Liengz cujyin bienq lingh boux vunz lo.

Liengz cujyin haemh ninz lij seiz mbouj seiz guh gij fangzhwnz raen bonjfaenh deng dawz bae saemjcaz, deng haicawz mbouj ndaej guh bouxdaeuz lajmbanj lo. Caemhcaiq mehyah de ngoenznaengz haengj angjnaj guh fwen youq dangqnaj gyoengq vunzmbanj ngiengx mbouj hwnj gyaeuj, dahlwg de youq hagdangz deng gyoengq doengzhag ceijceij diemjdiemj gangj saenz gangj sieb dingj mbouj ndaej atlig laux, cingzcik roengz dangq doek dat fanh ciengh.

Liengz cujyin lumj duzgaeq raq nei naiq- lueknuek mbouj miz saekdi cingsaenz, de byaij daengz dangqnaj gaiq senhconzlanz rog hongh cunhveij, siengj caiq yawjyawj mbawbuengj goengbouh de Liengz Soujfaz bineix youh ndaej bingz hwnj “bouxdaeuz lajmbanj maenhndei” lo, dauqdaej dwg saeh miznaj, lainoix cungj ndaej hawj de lumz di nyapnyuk bae. Byawz rox, de cim gwnz cim laj yawj swix yawj gvaz cungj ra mbouj raen mbawbuengj haenx lo. O, mbawbuengj de gaenq deng vunz nem haijbauq senhconz cw hwnjbae, gwnz haijbauq geij coij saw hung coegda raixcaix:“Bouxboux daeuj gamduk, caez dwk hak dam cienz, hong banggungz ca yiemz, aeu cingliemz guh saeh.”

De engq lau soujgih yiengj lo, lau cingqcaen baihgwnz miz vunz daeuj ra de. De ciemh ngoenz ciemh hoj youq, “bingh” ngoenz doek ngoenz naek. Doeklaeng de naeuz gienhsaeh ciepaeu ngaenz Cadoz haenx hawj yah de nyi. Yah de hozgaek raixcaix, fwngz yeix najbyak de hoed naeuz:“Mwngz ha, guhlawz huk baenz yienghneix!” Yaepndeu, doq fwen eu naeuz:

“Langh miz loek rox gaij,

Lij ndaej byaij roen ndei,

Yamq loeng laebdaeb bae,

Daengz seiz deng doek dat.

……”

Ngoenz ndit haenq mbwn gvengq ndeu, Liengz cujyin laeglemx bae sinyungse lingxaeu 5000 maenz ngaenz, coh ranz Cadoz byaij bae.

Daj ranz Cadoz dauqma, Liengz cujyin daengx ndang soengswtswt, “ndaek rin coq roengz namh, saet ok gamj ok rongz, aen baez caenx ok nong, ndaej siu bongz siu faeg.” De roxnyinh bonjfaenh “bingh” ndei lo.

Haemhhaenx, de ninz ndaej caem lailai.