Ndwen 9 ngoenz 1, youq Lungzswng Gak Cuz Swciyen Lungzswng Cin Daihngeih Siujyoz ngamq hwnjguh haenx, gyoengq bohranz laebdaeb daiq lwgnyez daeuj hagdangz bauqdaengz.

Aen hagdangz neix dwg aen siujyoz hagseng aeu youq hagdangz gwn ninz, dwg aen hanghmoeg Gvangjdungh Gvangjsih banggungz doxgap hwnjguh moq haenx, dajveh hailaeb 36 aen ban, daengx hagdangz youq ndaej 1600 lai boux hagseng, daengx aen hanghmoeg hagdangz hwnjguh daengz bi 2020 cienzbouh guhsat. Seizneix, haggeiz seizcou hainduj ciu buek hagseng nduj. Hagdangz guhbaenz caemhcaiq yungh, hawj daengx yienh 29 aen mbanjgungzhoj 712 ranz senj dieg anceiq haenx ndaej souh’ik, caenh’itbouh hoizsoeng gij vwndiz lwgnyez hwnjhag hoj vunz haeuj singz guhhong caeuq senj dieg anceiq haenx, hawj gyoengq lwgnyez ndaej caezyiengj gij cwngzgoj moq gyauyuz banggungz.

(Banh Cisiengz Yangz Yencaiz/潘志祥 杨彦才)