“Betyaem Guengjsae”youh heuhguh“betyaem baihnamz Guengj- sae”, dwg ndawbiengz Cungguek cungj yinhyoz boq roq(daz) doengh- aen oksing ndeu, dingzlai cienzlah youq Namzningz、Yilinz、Gveigangj、Ginhcouh、Vuzcouh、Hocouh daengj gij dieg Bouxgun、Bouxcuengh、Yauzcuz comzyouq.

Aenvih aeu gyong、laz、boz、dig、siu、yienz、gimz、 moegyawz daengj bet yiengh yozgi（doenghyiengh fatsing） yienj betyaem, neix vunzlai couh heuh betyaem Guengjsae guh“betyaem”. Moix aen banboqroq aeu 6 daengz 8 boux gyoebbaenz, guh boq roq seizhaenx, yienj gijmaz、mbaek gonqlaeng caeuq aen boq roq cungj aeu haeujsim senj ndei dingh ndei. Guh boq roq gaxgonq, aeu rox yienj hawj bouxlawz dingq caeuq youq gizlawz yienj, youq giz couxbawx (baehaq)、 hai ranzcai roxnaeuz saeh’wnq, ciuq gijneix daeuj dingh hab yienj cit go lawz, liuxle ciuq“gyaeujlungz” “hwetguk”“rieng- fungh”sam mbaek gonqlaeng neix daeuj boq roq. Ndawde bouxak bouxdaeuz vixyinx daengx aen ban baenzlawz boq roq.

Gak dieg doenghgij cungjloih boq roq mbouj doxdoengz, neix Betyaem Guengjsae youh baengh gijneix faen baenz haujlai cungjloih iq. Gyoengq bouxyienj baenzlawz boq roq betyaem ne? Geij bouxyienj doengzdoih doxboiq boq roq, youh faen baenz naengh daengq boq roq roxnaeuz doq byaij doq boq roq. Vunzbiengz yienj betyaem miz maz yungh ne? Dingzlai couhdwg vunz- biengz hoh ranzmoq guhbaenz、couxbawx haqlwg、hai ranzcai、hoh ndaejgyaeu、heijguh saehhung、gvaq ciet、couxhek daengj, lij coengh fouxlungz、fouxsaeceij、yienj heiq ndawbiengz、diuqfou daengj hozdung boiqyaem, vanzlij dangguh cezmuz youq gwnz daizheiq yienj hawj vunzlai yawj. Betyaem Guengjsae sing ndei yaem hoengh, lai cungj lai yiengh, hwnghoengh dangqmaz, vunzlai gyaezmaij lailai.

Betyaem youq Yilinz mbouj doxdoengz lai, vunzlai dangdieg miz coenz vah ndeu heuhguh“Ndaej noix geij daiz laeuj, deng aeu daiz boq roq”. Coenz vah neix dwg lwnh vunzbiengz betyaem ndaej vunzlai dangdieg gyaezmaij dangqmaz bae. Youq Yilinz, langhnaeuz ranz lawz banh saehhung, cungj cingj banbet- yaem daeuj boq roq mbat ndeu. Vunzbiengz couxbawx haqlwg、baiq- souh、guh rimndwen、gvaq ciet、guh hoihmiuh、gvaqcieng daengj cungj cingj vunz daeuj yienj betyaem.

20 sigij 50 nienzdaih, betyaem Yilinz bae daengz Baekging yienj le ndaejciengj. 20 sigij 80 nienzdaih, miz vunz song baez dawz betyaem bae camgya Guengjsae aenciet ciengqgo diuqfoux Sam Nyied Sam, yienj betyaem, aenvih hingzsik betyaem linghgag lai, singdiuh ndeidingq lai, neix hawj betyaem ndaejciengj lo, vanzlij ndaej gyoengq bouxsughangz yinhyoz ndaw guek rog guek haenh ndei lailai.

2011 nienz 5 nyied 23 hauh, betyaem Guengjsae ginggvaq Goz- vuyen baecinj, ndaej liedhaeuj daih- sam buek guekgya gaep feihvuzciz vwnzva yizcanj gya’gvangq mingz- loeg.