Haj

Duzma daeuj daengz ndaw diemq Dahvwnz gaenq ndaej ndwen lai lo, youq neix, duzma hix miz baengzyoux lo.

Mbouj rox daj ngoenz lawz hwnj, miz duz ma’ndaem ndeu cungj daeuj caeuq “gveibinh” guhcaemz, gyoengqde youq doiqnaj diemq doxgyaep doxlaeh, mizseiz guh gyaj doxhaeb, mizseiz guh gyaj doxmoeb, song duz gig doxndei.

Duz ma’ndaem dwg ma daeg, miz ngoenz ndeu, de gaenq gwih daengz gwnz caekhaex “gveibinh” bae, “gveibinh” hix mbouj euq saekdi, caih ma’ndaem gwih de, caih ma- ndaem haeb de. Dahvwnz baez raen, naj nyaenq daengz song gemj cik lumj feiz bae.

Dahvwnz naemj, danghnaeuz gvaq song ndwen dem, “gveibinh” youh seng miz geij duz malwg, baenzlawz guh? Ciengx, mbouj miz dieg ciengx; gai, mbouj rox miz mbouj miz vunz cawx. Hei, bouxgeq naeuz “oij gwn daengz hoh lawz couh bok hoh de”, sieng ukgyaeuj naemj bae gonq guhmaz.

Bouxcawj “gveibinh” youh daeuj lo. Vunz raeuz cungj dwg baenzneix, baez it seng, baez ngeih sug, baez sam baez seiq ndaej haeuj rug. Bouxcawj “gveibinh” nanz mbouj nanz couh daeuj yawj de, miz ngoenz banringz daeuj, miz ngoenz banhaemh daeuj. Daeuj lai le, de sibgvenq lo, sibgvenq ndaej baez daeuj daengz couh cigsoh yamq haeuj ndaw diemq daeuj, rag aeu aen daengq ndeu couh naengh, gangj neix gangj haenx. Seizbienh ndaej hawj boux mbouj rox cungj laihnaeuz de dwg bouxcawj aen diemq neix dem.

Seizneix duz ma’ndaem cingq caeuq “gveibinh” guhcaemz, duz ma’ndaem youh gwih daengz gwnz ndang “gveibinh” bae. Bouxcawj “gveibinh” raen le, cim coh Dahvwnz riuriu, Dahvwnz youh naj nyaenq hwnjdaeuj lo. Cingq seizneix Dahvwnz roxnyinh bouxcawj “gveibinh” iet- fwngz haeuj laj vinj de daeuj, lumhlumh cik goekga de. Dahvwnz doeksaet dwk hat naeuz:“Mwngz yaek guhmaz!”

Bouxcawj “gveibinh” naeuz:“Mwngz yawj, duzma guhcaemz nanz le, lij doenghsim lo. Raeuz roxnaj baenzlai nanz, nanzdauh mwngz lij mbouj doenghsim saekdi? Caiq gangj, mwngz boux mehmbwk ndeu, gou bouxsai dog……”

“Okbae, duz mageq mwngz, vaiq hawj gou okbae.” Dahvwnz rongx lumj mbwn yaek doemq nei, ndawsim cix ndaenq ndaej caen naemj yut aeu fagcax he daeuj, coh ndaek bouxsai neix faeg bae.

Bouxcawj “gveibinh” riuhehe byaij ok diemq bae lo, Dahvwnz youq ndaw diemq haeb heuj haeb faenz youh daemh din nyaenj fwngz.

Roek

Ngoenz ndeu banhaemh, boux- cawj “gveibinh” youh daeuj lo. Dahvwnz mbouj leix de, de mbouj gamj haeuj ndaw diemq bae naengh, youq diemq baihrog ndwn dwk, mizseiz byaij bae byaij dauq. Yienghneix gvaq le aen lai cung, bouxcawj “gveibinh” cawx aeu gaiq sezgauh ndeu, doq bok gij daeh suek sezgauh doq byaij deuz lo.

Bien roen doiqnaj aen diemq Dahvwnz miz aen bat va hung ndeu, ndaw bat ndaem miz geij cungj gova, mwncupcup. Bouxcawj “gveibinh” byaij daengz gizhaenx le, dawz gij daeh suek sezgauh vut haeuj ndaw bat va bae, de yamq bae song yamq, youh baenq dauq laeng gip aeu gij daeh suek sezgauh haenx vut daengz ndaw doengj nyapnyaj bae.

“Gveibinh” sibgvenq le bouxcawj daeujdaeuj baebae, de youq naj diemq naengh dwk, bouxcawj lizbae de hix mbouj leixlangh. Caj bouxcawj bae gyae mbouj raen ngaeuz le, de gvaqdaeuj haeb dawz din vinj Dahvwnz, rag Dahvwnz daengz bien aen bat va bae, lij coh ndaw bat va raeuq geij sing, Dahvwnz coh ndaw bat va yawjyawj, mbouj raen miz maz geizheih.

Haemh laeng, Dahvwnz yaek sou dan seiz, bouxcawj “gveibinh” cij gvaqdaeuj. Haemhneix de mbouj naengh hix mbouj ndwn, de cawx aeu gaiq sezgauh ndeu, couh lizbae. De doq bae doq bok gij daeh suek sezgauh, byaij daengz henz bat va le, de dawz gij daeh suek sezgauh vut haeuj ndaw bat va bae, yamq bae geij yamq youh fanj doxdauq gip aeu gij daeh suek sezgauh vut roengz ndaw doengj nyapnyaj bae, cij menhmenh lizbae.

Bouxcawj bae gyae mbouj raen ngaeuz le, “gveibinh” gvaqdaeuj haeb dawz din vaq Dahvwnz, rag de daengz henz bat va bae. Duzma coh bat va raeuqraeuq geij sing, lumjnaeuz heuh Dahvwnz yawj maz. Dahvwnz coh bat va yawjyawj, lij buedbued gij va ra, mbouj raen gyang go va miz maz mbouj doxdoengz.

Dahvwnz gag damz naeuz: Geiz- heih lo, caen geizheih lo.

Caet

Miz yienghneix geij baez le, Dahvwnz doiq aen bat va neix haeujsim lo. Baez haeuj haemh, de couh roengzsim yawj aen bat va neix, yawj miz maz vunz byaij gvaq bien aen bat neix, yawj miz maz vunz ning aen bat va neix.

Ciemhciemh, Dahvwnz fatyienh miz dahsau ndeu, cungj coh aen bat va neix vut nyapnyangj. Dahsau neix miz haemh 9 diemj lai cung couh gvaqdaeuj, miz haemh 10 diemj lai cij gvaqdaeuj. Miz haemh Dahvwnz yaek sou dan seiz de cij daeuj daengz, de baez coh bat va vut nyapnyaj le, yawj hix mbouj yawj couh coh baihnaj byaij bae, soqlaiz mbouj caeuq Dah- vwnz doxdongx gvaq.

Dahvwnz lij fatyienh, dahsau neix baez vut nyapnyaj lizbae le, boux- cawj “gveibinh” couh riengz dwk lizbae lo. De lizbae seiz cungj cawx diuz sezgauh ndeu, cungj dwg vut gij daeh suek sezgauh daengz ndaw bat va bae, gvaqlaeng youh cienq ndang gip doxdauq bae.

Haemh ndeu, bouxcawj “gvei- binh” dauqbae le, Dahvwnz couh gvaqbae yawj baez ndeu. Mbouj raen gungx va miz maz doenghyiengh, geizheih lo, haxbaenh de mingzmingz raen dahsau haenx vut nyapnyaj daengz ndaw gungx va bae, seizneix vihmaz couh mbouj ndaej raen lo ni?

Dahvwnz naemj dwk naemj dwk, de roxnyinh daengz, ndaek bouxsai neix caeuq dahsau haenx itdingh miz maz saeh. Naemj daengz neix, de fwt lau hwnjdaeuj, ndang saenz ga hix unq caez.

Ndaek bouxsai neix, dahsau haenx, boux he daeuj vut nyapnyaj, boux he bae gip nyapnyaj, songde dauqdaej guhmaz saeh? Dahvwnz cungj youq mbouj onj, de youq ndawranz naemj gienh saeh neix, daengz baihrog naemj gienh saeh neix, nyaengq seiz naemj gienh saeh neix, ndaejhoengq seiz hix naemj gienh saeh neix.

Ciuq gangj, gienh saeh neix, mbouj ngaih Dahvwnz maz, de mbouj yungh baenzneix dawz hwnjsim. Hoeng, gienh saeh neix couh lumj diuz oen he nei, gaz youq ndaw ukgyaeuj ndaw simdaeuz de, hawj de baenzlawz hix cuengq mbouj roengz. Caiq gangj “gveibinh” hix dawz hwnjsim, dangh- naeuz “gveibinh” mbouj rag Dah- vwnz bae yawj bat va, Dahvwnz hix mbouj rox fatyienh gienh saeh geiz- heih neix. Seizneix Dahvwnz roxnyinh swhgeij cungj beij mbouj hwnj “gveibinh”. “Gveibinh” rox daiq de bae yawj, de baenzlawz mbouj gamj bae heuh vunz daeuj yawj ni?

Hwnz he ninz mbouj ndaek, haet baez rongh, Dahvwnz couh dwk dienhvah hawj 110.

Bet

Haemhneix, bouxcawj “gvei- binh” youh daeuj daengz lo, de rag aeu aen daengq he youq diemq baihrog naengh dwk. Daj de lumh goekga Dahvwnz baezhaenx le, Dah- vwnz couh mbouj leix de, de yaek gangj vah couh gangj, Dahvwnz mbouj caeuq de gangj gonq saek coenz.

Yaep ndeu, dahsau gvaqdaeuj lo, de vut nyapnyaj daengz ndaw bat va bae le couh lizbae. Bouxcawj “gveibinh” raen le, canggyaj caeuq Dahvwnz guhriu naeuz:“Haemhneix gou mbouj daiq ngaenz, caeuq mwngz aeu diuz sezgauh he gwn gonq, gvaqlaeng caiq hawj ngaenz hawj mwngz ndaej mbouj ndaej?”

Dahvwnz naeuz:“Mbouj ndaej, mbouj miz ngaenz couh gaej gwn!”

Bouxcawj “gveibinh” gag damz geij coenz, yut ngaenz okdaeuj cawx sezgauh le, couh lizbae lo. Caj de daj ndaw bat va gip aeu nyapnyaj le, caet bet boux vunzsai fwt cung gvaqdaeuj, yaepyet couh dawz boux- cawj “gveibinh” gaemh hwnjdaeuj.

Gyoengqvunz mbouj rox fatseng maz saeh, cij roxnyinh bouxsai neix ciengzciengz daeuj ndaw diemq Dah- vwnz guhcaemz gangjgoj, baenzneix cungj daeuj cam Dahvwnz.

Gvaqlaeng dingqnaeuz ndaek bouxsai neix caeuq dahsau haenx buenq huq doeg, songde ciengzciengz yungh aen banhfap neix doxciep aeu huq doeg. Youq gizneix doxciep duenh seizgan he youh vuenh gizwnq doxciep, gaenq guh le song bi lai cungj mbouj deng gaemh, baezneix songde dai saed lo.

（sat）