Heiqmbaetcaz Fangzcwngzgangj dingzlai cienzlah youq Fangzcwngz Cin、Gyanghbingz Cin、Maulingj Yangh、 Daluz Cin、 Fuzlungz Yangh, baengh gyoengqvunz seng- eiq dangdieg caeuq gyoengqvunz dangdieg bae rogguek youq haenx cienz okbae, ranghdieg Yeznanz Gvangjningz Swngj hix miz heiq- mbaetcaz.

Heiqmbaetcaz Fangzcwngzgangj gungh miz 70 lai cungj. Gij yiengh- sing ndawde yaembaihnamz vunz ceiq maij yungh. Gij baizgut(baizsing daeuz) ndawde ceiq yienhda dwg gadaemq. Yienj heiqmbaetcaz seiz- haenx, gyoengq bouxyienj fwngz gaem cikcienz、beizva、gaenfwngz, gyaeuj daenj gyaepmbinj，laj ndaeng nem mumhdinj, caemh daiz guhdoih yienj. Bouxyienj gangj gij vah ndaw heiq nemgyawj vunzlai, ndei dingq ngaih rox, vunzlai gyaezmaij; yienj gadaemq ndeiriu gvaqyinx dangqmaz、vunzlai haenq angq haenq riu.

Heiqmbaetcaz Fangzcwngzgangj miz gij daegdiemj vwnzva henzhaij; supaeu doenghgij fwenbiengz、fwen- doj、singciengq bonjdieg, caeuq dieg- wnq mbouj doxdoengz; bouxyienj noix danhseih heiq maenhndei, ciuq seiz baengh dieg anbaiz, mbouj deng mbwn roxnaeuz dieg gazlaengz, seizlawz yienj cungj ndaej; vunzlai maij yawj maij dingq, bouxmaij bouxyawj lai dangqmaz.

Haujlai bi gvaqdaeuj, vunz Fangzcwngzgangj gyaezmaij heiq- mbaetcaz lailai, vunz ndaw mbanj baez gvaqcieng gvaqciet, banh saeh- hung saehndei cungj gyaez cingj heiqduenz daeuj yienjheiq.

Heiqmbaetcaz Fangzcwngzgangj dwg aen binjbaiz vwnzva yisuz ndawbiengz cojcienz ndeu, Fangz- cwngzgangj haenqrengz dajcauh lai bi lo; cungj heiq neix gaenq hwng 150 lai bi nanz lo. Bi 2014 Fangz- cwngzgangj youh ndaej aen cwngheuh swngj gaep heuhguh“Cungguek aen mbanjranz vwnzva yisuz ndaw- biengz —— mbanjranz heiqmbaet- caz”.

Dangqnaj, dandan Fangzcwngz Gih couh miz 2 aen heiqduenz heiqmbaetcaz, faenbied dwg Heiq- duenz Heiqmbaetcaz Mauzlingj caeuq Heiqduenz Heiqmbaetcaz Gyanghsanh. Ndawde Heiqduenz Heiqmbaetcaz Mauzlingj miz 20 boux vunz, Heiqduenz Heiqmbaetcaz Gyanghsanh miz 15 boux vunz; gyoengqde cungj dwg heiqduenz ndawbiengz, gag ra cienz gag fat cienzhong; moix bi moix aen heiqduenz yienj 300 lai ciengzbaez, bouxyawj lai baenz 20 lai fanh, moix aen heiqduenz souhaeuj 80 lai fanh. Heiqmbaetcaz hwnghoengh baenz- neix bae, neix bouxswnjcienz hix miz haujlai lo. Bouxswnjcienz heiq- mbaetcaz daihseiq daih dwg Yez Ciyenz、Cangh Sauyuz seizneix gungh miz lwghag 20 lai boux.

Bi 2012, Heiqmbaetcaz Fangz- cwngzgangj ndaej Gvangjsih Boux- cuengh Swcigih Yinzminz Cwngfuj doengzeiq, ndaej liedhaeuj daihseiq buek swcigih gaep feihvuzciz vwnzva yizcanj mingzloeg.