It

Aen diemq Dahvwnz youq Roencwngzlungz caeuq Roenhinghbingz song diuz roen giz doxgap, diemq mbouj hung, ngaenzco it bi 2000 maenz, gai dangz、bingj、laeuj、ien doenghgij gaiqgwn neix.

Dahvwnz haetromh 8、9 diemj cung hai diemq, gyanghaemh 11、12 diemj cung soudan. Gizneix vunz baedauq mbouj lai, ci hung ci iq cix gvaq mbouj dingz, seng’eiq miz ngoenz ndei, miz ngoenz mbouj ndei. Ngoenz seng’eiq ndei, Dahvwnz couh ciengqciengq go, ngoenz seng’eiq mbouj ndei, de couh ninz youq gwnz daengqliengz, gik ndwn gik gangj, couh lienz dungx iek hix gik gwn.

Mbouj rox Dahvwnz miz mbouj miz gvan, roxnaeuz gvan de mbouj youq ranz, ngoenzngoenz raen de haetromh soengq lwg bae hag, banhaemh bae ciep lwg dauqranz, haeujhaeuj okok boux vunz dog, cungj mbouj raen gvan de gvaq.

Miz va rwi couh rumj, miz gumz raemx couh ceh, Dahvwnz ngoenzngoenz boux ndeu souj diemq, boux cawx byaek baedauq couh daengz gizneix naengh yaep he yietnaiq, caeuq de gangjgangj goj, lwnhlwnh saeh. Boux youzbyaij baedauq couh youq gizneix naengh yaep he, cam de gwngwn raemx, caeuq de guhguh riu. Dahvwnz roxnyinh yienghneix gig ndei, hawj de ngoenzndit mbouj mbwq, ngoenzfwn mbouj nyap.

Ngeih

Ngoenzhaenx, mbwn raemhrwdrwd, lumj yaek doek fwn nei. Dahvwnz hai diemq baij ndei doenghyiengh, baenq laeng couh raen duz ma ndeu ndwn youq laj din de. Duz ma neix bwn saekmong caemhcaiq nyungznyuemnyuem, gij bwnnyungz gwnz ndang youh nyungq youh heiz, aiq gig nanz mbouj ndaej vunz dajleix lo.

Dahvwnz lau duzma, gig lau duz ma neix fwt haeb de amq ndeu. Ndigah Dahvwnz “hei” daihsing hat sing ndeu, duzma couh buetdeuz lo. Duz ma neix cik galaeng baihgvaz deng sieng, de riuj cik ga deng sieng hwnjdaeuj, aeu sam ga ndengjngoek ndingjngoek byaij baenaj.

Ngoenzneix seng’eiq mbouj ndei, Dahvwnz hai diemq diemj lai cung lo, mbouj gai bae saek yiengh. De dawz aen daengqliengz okdaeuj, dajsuenq iethwet yaep he. Seizneix, Dahvwnz youh raen duz ma haxbaenh naengh youq doiqnaj diemq, song da ronghrikrik cim coh de, couh lumj miz maz saeh gouz de nei. Dahvwnz miz di doeksaet, roxnyinh duz ma neix gig hojlienz, de aeu aen banz iq he cang di raemx ndenq hawj duzma gwn. Duzma gwn raemx le, rizriz bak youh youq naj diemq naengh dwk, song da ronghrikrik cim Dahvwnz. Dahvwnz aeu aen bingj he vut hawj duzma, duzma mupmup le, cij cuengqsim gwn bingj, duzma gwn bingj sat le, couh daengz laj goek ciengz bae ninz lo.

Doenghbaez, raen vunz yien ma okbae youz roen gvaq naj diemq, Dahvwnz couh naemj: Ciengx ma miz maz ndei, ndang duzma haeu heiz haeu hoet youh gwn ndaej lai, guh mbouj ndei haeb vunz baez ndeu couh deng nanh lo. Ciuh neix moeb dai gou bae gou hix mbouj ciengx ma.

Ranz Dahvwnz couh youq diemq doiqnaj, aen laeuz miz 38 caengz sang, Dahvwnz youq 28 caengz. doengxhaemh sou dan le couh caeuq daeglwg ndaej 4 bi lai naengh cidienh dauqbae, 200 lai mij gyae, yaepyet couh ndaej daengz ranz.

Haemhneix sou dan le, Dahvwnz fatyienh duz- ma aeu 3 ga ndengjngoek ndengjngoek gaenlaeng buet riengz, itcig gaen daengz laj laeuz. Dahvwnz mehlwg haeuj laedienh seiz, duzma couh deng gven youq baihrog lo.

Sam

Daeglwg naeuz dungx iek, doenghbaez Dahvwnz couh gyaez daiq daeglwg okbae gwn siuyeh. Haemhneix lij aeu guhsaeg, de mbouj dajsuenq okbae lo, de couh cawj mienhdiuz hawj daeglwg. Seizneix de naemj daengz duz ma haenx, gag naemj: Mbouj rox seizneix duz ma haenx rox mbouj rox dauqbae.

Haetromh, Dahvwnz caeuq daeglwg byaij ok laedienh, duz ma haenx couh ndwn youq bakdou laedienh, ngauzgyaeuj baet rieng ciepcoux songde, Dahvwnz ganj seizgan soengq lwg bae youwzyenz, mbouj ndaejhoengq leix duz ma neix.

Bineix daeglwg bae youwzyenz, Dahvwnz couh yienghneix haethaet sien soengq lwg caiq bae hai diemq, haetneix de dauq daengz youh raen duzma gaenq youq naj diemq caj de lo.

Dahvwnz hai diemq baij ndei doenghyiengh le, de couh aeu raemx aeu bingj hawj duzma gwn, duzma gwn imq le, couh daengz laj goek ciengz bae ninz.

Dahvwnz naemj:“Duz ma neix, dwg mbouj dwg mbouj rox roen dauqbae ranz lo, dwg mbouj dwg bouxcawj de gaenq mbouj aeu de lo?”

Miz vah naeuz “meuz gag daeuj baihgya, ma gag daeuj fukgviq”, mbouj rox dwg mbouj dwg yienghneix, Dahvwnz cij roxnyinh duz ma neix hojlienz.

Ngoenzneix ndit ndei, Dahvwnz daek bat raemxsaw he daeuj, heuh duz ma daeuj swiq ndang. Duzma hix dingqvah, raen Dahvwnz heuh de, de couh buet daeuj yamq roengz ndaw bat raemx bae, hawj Dahvwnz bang de swiq ndang.

Miz vunz doiq Dahvwnz naeuz:“Duz ma neix heuhguh Gveibinh, dij geij bak maenz ngaenz bw, ndeindei ciengx ba.”

Dahvwnz mbouj naemj duz ma neix dij geijlai ngaenz, mbouj naemj duz ma neix heuh maz coh, de cij naemj bouxcawj duz ma neix vaiqdi daeuj daengz, vaiqdi daiq duz ma neix dauqbae.

Dahvwnz hawj duz ma neix ingj siengq le fat daengz ndaw gienbaengzyoux bae, muengh bouxcawj de ndaej yawjraen.

Daj ngoenzhaenx hwnj, duz ma neix haethaemh cungj gaen Dahvwnz baebae dauqdauq.

Seiq

Dahvwnz ndang reux noh hau, de ngoenzngoenz youq ndaw diemq guh gaicawx, noix deng ndit dak noix deng fwn rwed, youh daenj ndaej seuq, boux baedauq raen de cungj roxnyinh de dwg boux dahmbwk hab da hab hoz ndeu, gyoengq bouxsai baedauq raen de couh naemj saeh sibsib.

Dahvwnz mbouj rox vunz dwg baenzlawz yawj de, gangj de, niemh de, de bungz vunz cungj dwg ngaekngaek gyaeuj, gangjgangj riu, mbouj caeuq byawz fatheiq gvaq, hix mbouj miz saeh najhoengz gvaq.

Ngoenz ndeu lajbyonghngoenz, bouxsai ndaej 30 lai bi he daeuj daengz ndaw diemq, de naeuz de couhdwg bouxcawj duzma. Duzma raen de daeuj daengz, byaij gvaqdaeuj, goedgoed ga de, yawj daeuj doiq ndaek vunz neix caen miz di cingzngeih. Bouxsai lumhlumh aen gyaeuj duzma, duzma hix dingz dwk hawj de lumh, yawj daeuj caen dwg bouxcawj duzma dahraix ne!

Ndaek bouxsai neix naeuz, duz ma neix dwg de aeu 2000 maenz ngaenz cawx dauq, duz ma neix gig maij de, de bae gyawz duz ma cungj riengz de bae. Miz ngoenz ndeu, de miz di saeh gipgip muengzmuengz okdou bae, duzma raen le, hix cung okbae. Aen cimohdoz ndeu hai gvaqdaeuj, gyanx deng cik galaeng duzma, duzma deng sieng le. Daj baezhaenx hwnj, de bae gyawz duz ma couh mbouj ndaej gaen de le. Miz ngoenz ndeu, de youq baihrog banh saeh dauq daengz ranz, duzma gaenq mbouj raen lo, siengj mbouj daengz de daengz gizneix daeuj.

Bouxcawj duzma daeuj lo, Dahvwnz cungjsuenq ndaej cuengqsim lo. Bouxsai yaek dauqbae seiz, Dahvwnz couh heuh de daiq duzma bae ranz, bouxsai umj hwnj duzma, docih Dahvwnz geij coenz le couh lizbae lo.

Bouxsai byaij bae geij yamq, duzma youq ndaw rungj de cakfoedfoed. Bouxsai cuengq de roengz- daeuj, de couh buet coh Dahvwnz bae.

Bouxsai cienq ndang dauq laeng, caiq umj hwnj duzma yaek lizbae, duzma cungj cak dai cak lix, mbouj nyienh gaen de lizbae.

Dahvwnz naeuz:“Dauqbae ba, gaen bouxcawj mwngz dauqbae ba.”

Duzma ngiengxgyaeuj hwnjdaeuj, cim coh Dahvwnz raeuq geij sing, lumj naeuz:“Gou mbouj bae, gou mbouj gaen de bae.”

Bouxsai naeuz:“Yawj daeuj duz ma neix doiq mwngz gaenq miz cingzngeih lo, de mbouj nyienh biek mwngz. Hix ndaej, mwngz couh ndeindei ciengx de ba, gou ndaejhoengq couh daeuj yawjyawj de.”

Dahvwnz bibi gyaeuj, mbouj rox baenzlawz gangj ndei.

（caengz sat）