Seizhah daengz lo, gou youh ndaej bae Byacwx dajcaemx lo. Baihgwnz miz raemxdiuqdat cung roengzdaeuj, vunz youq baihlaj daj- caemx, sangj ndang youh sangj sim.

Haetneix daengz Byacwx seiz, gaenq miz haujlai vunz daeuj gonq lo. Dajcaemx youh ndaej lienhndang, youh ndaej cuengqsoeng.

Gizgyawj raemxrij ndaw lueg laeliklik, bangxbya duzbid ciuzcici, daengx bya gofaex mwncupcup caemhcaiq heufwdfwd, couh lumj daenj geu buhloeg nei. Mbouj miz rumz seiz, ndoeng faex caem dwk, aiq laeglemx cim yawj gyoengqvunz, aiq ngengrwz dingq raemxrij ciengqgo. Miz rumz seiz, mbawfaex menhmenh bibuengq, lumj caeuq gyoengqvunz riunyumj vadfwngz.

Gou cimq youq ndaw raemx sawrikrik, yawj gij mbawfaex saek- heu saekloeg youq gwnz raemx fubfab, yawj duzmbaj gwnz hamq mbin bae mbin dauq, couh roxnyinh bonjfaenh caeuq gyoengqde itheij, youq ndaw rungj daxmeh cwxcaih dwk gvaq ngoenz.