Laujvangz ciucomz geij boux cunhgan daeuj daengz ranz de, gwn song cenj laeuj le couh doxyaeng ra yah hawj Daegsam de. Cungj saeh neix danghnaeuz dwg geij bi gaxgonq mbouj suenq maz daih saeh, seizneix couh hawj geij boux cunhgan causim lo. Geij bi neix ndaw mbanj dajndaem dajciengx bibi cungj ndaej demsou, gya’gya hohhoh cungj hwnq ranzlaeuz cawx ci’gyauceh. Hoeng, ndaek neix caengz aeu ndaej yah, byawz gamj naeuz neix dwg saeh iq ne? Geij boux cunhgan miz cawjeiq lo, couh heuh Daegsam daeuj swiqswiq uk.

Daegsam baez naengh haeuj daiz dawz cenj laeuj couh ndumq, gyoengq cunhgan cienmonz heuh de daeuj gwn laeuj, mbat dingq naeuz yaek ra yah hawj de, couh ngauz gyaeuj dwddwd. Daegsam mwh lij nomj seiz hwnj bya bae ra yw, ngaiz raek bae cik ga ndeu, ndawranz youh gungz, cungj deng vunz yawj mbouj hwnj, ra yah ra boux deuz boux. Seizneix 50 lai bi, ndaw mbanj gyoengq doih de cungj ndaej umj lan lo, mbat naeuz aeu yah de couh doeknaiq lo.

Raen Daegsam baez dwen aeu yah couh lienz gyaeuj hix mbouj gamj ngiengx, Laujvangz bek mbaq de naeuz:“Doenghbaez ndawranz gungz, vunz yawj mbouj hwnj mwngz. Seiz- neix raeuz bienq fouq lo, byawz lij gamj yawj mbouj hwnj dem ne!”

Najbyak Daegsam hanh conh- foedfoed. Mehvangz doiq Daegsam naeuz:“Mwngz gaej you, danghnaeuz mwngz fouz vunz yawj hwnj, raeuz aeu cienz cawx hix yaek cawx mehyah ndeu hawj mwngz.”

Boux seiqda naeuz:“Cawx vunz- baz famh coih bw!”

Mehvangz naeuz:“Cawx boux yah gihgiyinz ndeu hawj Daegsam, famh maz fap?”

Goengmumh naeuz:“Miz boux yah gihgiyinz caemh cawx boux ndeu hawj gou.”

Mehvangz naeuz:“Mwngz cungj miz yah lo, lij cawx maz yah gih- giyinz?”

Goengmumh naeuz:“Caeuq Daeg- sam doxvuenh!”

Yah Goengmumh da baez caengz, gaemxgienz doq cuk gvaqbae:“Mwngz cam ndaek gaemxgienz neix hawj mbouj hawj gonq!” Dad dwk Goeng- mumh doq bad laemx youq henz daiz bae, gyoengqvunz riu ndaej donq imq.

Laujvangz dawz gij saeh aeu yah Daegsam dangguh saeh hung ndeu daeuj guenj. De heuh Mehvangz caeuq Mehmumh、Mehseiqda geij boux neix bae daengz gak mbanj ra dah ndeu hawj Daegsam. Ngamq geij ngoenz goengfou, geij boux neix couh aeu ndaej geijcib mbaw siengq doxdauq, Laujvangz gyoengqde yied yawj da yied va. Bang Daegsam cimh yah, cimh dah daiq gyaeu de cix lau Daegsam mbouj miz baenzlai fukheiq, cimh dah mbouj miz di saeksiengq de cix roxnyinh doiq mbouj hwnj Daegsam, cimh boux dou ranz doxdaengx de caen mbouj ndei cimh. Yawj baenz byonghngoenz cij genj ndaej ok 3 mbaw siengq daeuj, hawj geij boux mehbaz neix bae guhmoiz.

Caengz caeuq dahsau raen naj seiz, gyoengqde cungj sai haujlai goengfou daeuj son Daegsam yaek baenzlawz bae guh. Daegsam baez raen mehmbwk couh mbouj rox gangj vah, youq dangqnaj mehmbwk baez ndwn nanz couh ndang saenz, lumjbaenz nyangz raen duzguk nei. Hawj de gwn di laeuj ndeu mbei cij fang, hoeng, youh mbouj ndaej hawj de gwn lai, de gwn lai couh fiz, saeklaeuq ngamq raen naj couh luenh gangj vah, neix couh vaih saeh lo.

Ok dou seiz, Laujvangz daengq Daegsam naeuz:“Gaej mbeiiq lai，seizneix ranz raeuz fouq lo, byawz lij gamj yawj mbouj hwnj raeuz dem?”

Ndwen ronghsagsag, rumz cisisi. Daegsam daeuj daengz gyaeuj giuz bak mbanj, dah ndeu daj baih giuz byaij gvaqdaeuj. Daegsam mbat raen de doq yup lo. Dah de dongx naeuz:“Mwngz daeuj la!”

Daegsam bak mutmangmang, gangj mbouj ok vah. Dah de caiq naeuz:“Haemhneix ronghndwen ndei- yawj hu!”

Daegsam ngiengxgyaeuj yawj hwnj mbwn, caenh lumj ra mbouj raen ronghndwen nei. Dah de miz di simgip lo:“Mwngz gangj vah ha?”

Daegsam naeuz:“Gou…… gou mbouj rox gangj maz ne……”

Dah de naeuz:“Mwngz ngamq seng ha, mbouj rox gangj vah?”

Daegsam naeuz:“Mbouj deng, gou gaenq ndaej 50 geij lo……”

Dah de naeuz:“Gou youh mbouj damengz bw.”

Daegsam yawjyawj dah de, naeuz:“Gyoengqde mbouj gangj naeuz mwngz dwg damengz ne?”

Dah de naeuz Daegsam:“Haemh- neix mwngz daeuj guhmaz ha?”

Daegsam youh mbouj gangj saek coenz. Dah de dingh yawj Daegsam yaep ndeu, raen Daegsam baenz byonghngoenz cungj mbouj oksing, baez ndatheiq couh cienq hangx deuz lo.

Bae caeuq boux mehmbwk daih- it raen naj doq mbouj baenz lo, Daegsam sim engqgya liengz lo. Laujvangz gyoengqde yaek daej yaek riu, hoeng mbouj ndaej gaen Daegsam simliengz. Laujvangz youh iu caezgya daeuj daengz ndawranz, bang Daeg- sam ngeix miz maz monzloh. Daegsam vah mbouj rox gangj hawj dahsau buet lo, seizneix cingq gwn laeuj gej nyap mbouj dingz, naj hoengzfwtfwt. Lauj- vangz daj ndaw fwngz Daegsam dued aen cenj laeuj gvaqdaeuj, naeuz:“Mwngz aeu gij goengfou gwn laeuj dingz ndeu bae cimh yah, haemhlwenz dahsau de couh mbouj rox ndatheiq buetdeuz lo.”

Daegsam ngaemgyaeuj mbouj oksing. Laujvangz naeuz:“Guh mbouj baenz saeh mwngz mbouj ndaej gwn saek naed laeuj.”

Goengmumh naeuz:“Caih de gwn, lai gwn geij cenj couh miz damj lo.”

Laujvangz naeuz:“Laeuj noix cix lau de mbeiiq, gwn lai youh lau de mbeifag gvaq vangh……”

Goengmumh naeuz:“Daegsam mbei hung couh baenz saeh lo!”

Daegsam gaemdawz cenj laeuj doq ndumqndak caez, fwngz baez uet bak couh ndwn hwnjdaeuj cuengq sing eufwen:

“Doenghbaez dungx mbouj imq,

Ij cimhyah cix nanz,

Neix daengz raeuz fonj ndang,

Byaengq da sang genj yah.”

Caezgya youh doeksaet youh angq. Laujvangz bekbek mbaq Daeg- sam:“Haemhlwenz mbouj miz vunz saek conghbak mwngz ha?”

Daegsam caiq gwn cenj laeuj ndeu, engq haenqrengz eu:

“Genj yah ij dawz banj,

Gikgyangq raeuz gaej aeu,

Guhhong roengz goengfou,

Cix mbouj you mbouj heiq.”

Gyoengqvunz bekfwngz roebroeb. Daegsam lij siengj eu dem, Laujvangz riengjret daeuj laengz:“Gyong laz yiengj la, mwngz angq maz ha?”

Goengmumh naeuz:“Sam, louz di rengz he, raen dahsau le mwngz caiq yunghrengz bae eu.”

Daengz haemh le, youh youq gyaeuj giuz bak mbanj. Raen mbiengj mehmbwk menhmenh byaij daengz gyaeuj giuz, Daegsam couh capmax bek aek lumj yaek bae aemq vunz nei, hai bak doq eu:

（caengz sat）