Yauzcuz gij sibgvenq ciuq baizrin hengz couhdwg“cidu baizrin”. Gij“cidu baizrin”raeuz gangj daengz neix, dwg cungj faplwd cidu caeuq sevei cujciz youq ndaw lizsij Guengjsae Ginhsiu Yauzcuz menh- menh hwngfat baenz, hix dwg cungj cidu guenj segih; dwg vunzlai dangdieg dawz gij gvidingh gven- daengz guh nungzyez swnghcanj、guenj ndei ndawbiengz haenx cingjleix baenz lai diuz sawcih, liuxle dik gij diuz sawcih neix coq gwnz sigbei(rin) roxnaeuz benjfaex, liuxle dangqnaj vunzlai goenghai le lwnh vunzlai caez bae, hawj vunzlai doengzcaez ciuqhengz.

Youq gij mbanj Yauzcuz Ginh- siu Yauzcuz Swciyen, vunzlai ging- ciengz aeu aen roxnaeuz geij aen mbanj gyoeb guh aen ndeu, dingh gij gvidingh gvendaengz fuengz caeg re caeg、baujhoh swnghcanj、couxbawx haqlwg、 baujhoh bouxseng’eiq rog daeuj、cawqleix saehdoxceng daengj, heuh vunzlai doengzcaez ciuqhengz. Doenghgij gvidingh vunzlai caez dingh ndei neix heuhguh“faplwd baizrin”“faplwd”roxnaeuz“gvidingh baenzdiuz”; vunzlai dawz gijneix dik coq gwnz benjrin, heuhguh baizrin. Mizdi sij coq gwnz ceijhau roxnaeuz gwnz benjfaex. Bouxlawz doengzeiq dingh gij gvidingh neix, bouxde couh deng ciuq hengz, langhnaeuz mbouj ciuq hengz, couh ciuq doenghgij gvidingh gwn baizrin bae cawqleix.

Ciuq doenghgij ranz、mbanj lainoix mbouj doxdoengz, vunzlai youh faen baizrin baenz baizrin daeuz、baizrin hung、baizrin iq. baizrin daeuz baugvat 70 lai aen mbanj Yauzcuz, dwg gij yienh’ok gienzvi dieg Yauzcuz. Bouxdaeuz gak gaiq baizrin, youz doenghboux coz bakraeh roxgangj、banhsaeh goeng- bingz、miz mbei miz da haenx ginggvaq bouxdaeuz geq son’gyauq vixyinx le, cug mbaek hag baenz, daihbouhfaenh dwg bouxsai dang. Langh bouxguenj baizrin iq buenq saeh doxceng ndaej ndei、ndaej vunzlai mbanj wnq haenhndei haeuj- coengh, couh ndaej bienq baenz bouxguenj baizrin hung. Bouxguenj baizrin mbouj ndaej cienz dinghsoq, buenq ndei saehdoxceng liux, dandan ndaej doenghboux heuh coengh haenx cingj gwnngaiz caeuq hawj di cienzngaenz. Hai aen hoihhung baiz- rin seizhaenx, bouxguenj baizrin senq gangj“vah gaxgonq”, couhdwg gangj doenghgij saeh gvendaengz cojcoeng youq gyawz senj daeuj, vunz Yauzcuz haeuj ndaw bya, doenghgij baizrin gaxgonq laeb ndei caeuq doenghgij saeh hung gaxgonq daengj, liuxle gangj saeh daeuz baez hoihhung neix, senhbu gij“gvidingh”gaxgonq dingh ndei haenx, youz vunzlai doengzeiq doenggvaq, neix couh baenz le gij gvidingh baizrin moq.

Langhnaeuz ndaw mbanj miz vunz doxceng, miz baih ndeu ra bouxguenj baizrin gangj dauhleix, baez gangj aen dauhleix ndeu couh coq gaiq ganjhaeux raez sam conq baedauq ndeu, miz geijlai aen dauh- leix couh coq geijlai gaiq ganj- haeux, liuxle youz bouxguenj baizrin dawz bae baih’wnq baiz ganjhaeux gangj dauhleix; boux baih’wnq hix gangj dauhleix baiz ganjhaeux, liuxle youz bouxguenj baizrin daiq dauq. Song baih doxceng ne baih lawz dauhleix lai couh hingz. Langhnaeuz doxdingj buenq mbouj roengz, couh youz bouxguenj baizrin buenq saeh. Langh song baih lij mbouj fug, caiq buenq lij mbouj miz yungh, couh hawj song baih aeu doenghyiengh doxmoeb, daengz baih ndeu mbouj miz rengz doxmoeb bae, deng nyinh saw couh liux.

Doenghgij baizrin Ginhsiu ndawde miz gaiq baizrin ceiq daeuz (youh heuhguh baiz rin caetcibngeih mbanj) guenj mbanj Yauzcuz caez; miz baizrin ngeihcibseiq mbanj、baizrin cib mbanj guenj mbangj dieg; lij miz ciuq gij soq ranz gyahaeuj baizrin haenx an mingzcoh guh baizrin cien bet、baizrin bak bet、baizrin bak gouj、baizrin roek roek daengj. Faplwd baizrin daj dingh daengz buenqsaeh, deng ginggvaq vunzlai doxcomz youq naj baizrin、cingj bouxgeq、laeb baizrin daengj geij mbaek. Bouxguenj baizrin couh guenj saeh cazyawj gij cingzgvang hengz gvidingh sawdiuz gwnz baizrin roxnaeuz fad doenghboux mbouj ciuq gvidingh gwnz baizrin hengz haenx.

2007 nienz, Yauzcuz gij sib- gvenq ciuq baizrin hengz haenx ginggvaq Gvangjsih Bouxcuengh Swcigih Yinzminz Cwngfuj doengz- eiq, ndaej liedhaeuj daih’it buek swcigih gaep feihvuzciz vwnzva yizcanj mingzloeg.