Simjngux dingq le youq baih- haenx fok naeuz:“Mwngz fatbag lu ma? Mwngz mbouj siengj aeu yah lu ma? Daj meh mwngz gvaqseiq le, daxboh mwngz geij bi neix daeuj vih gij saehcingz mwngz simfanz yaek dai, byoemgyaeuj hau caez. Veiz Gangh mbouj lumj mwngz, de ndang sang youh baenzmbauq, daihbaj lwgsau ceng daeuj gyaez, de faenfaen cung aeu ndaej yah. Cij lau de yawj mbouj hwnj bouxwnq, mbouj lau bouxwnq yawj mbouj hwnj de!”

Simjngux gangj daengz neix lumjbaenz lij mbouj gaij heiq, ciep- dwk youh doiq Veiz Fungh naeuz:“Ndei! Ndei! Ndei! Veiz Gangh hix caengz damzyoux, cijaeu de nyienh daeuj. Gangj mbouj dingh dahsau neix caeuq de miz yienzfaenh ne, hab mwngz aeu mbouj ndaej yah!”

Simjngux doengzeiq, hoeng Veiz Gangh baihneix hainduj mbouj ngaekgyaeuj, Veiz Fungh naeuz:“Daj iq daengz seizneix gou caengz gouz bouxlawz gvaq, seizneix suenq daeggo gouz mwngz lo. Danghnaeuz ngoenz- neix mbouj fatseng gij saehcingz neix, gou caeux couh bae lo, caen doiq mbouj hwnj Simjngux caeuq dahsau haenx. Gou rox mwngz mbouj you aeu mbouj ndaej yah, mwngz bang gou dingj gvaqbae couh ndaej lo.”

Raen daeggo caensim gouz swh- geij bae bangfwngz, Veiz Gangh cij- ndei cengqgengz dapwngq lo.

Yienznaeuz caez dwg bohmeh seng, Veiz Gangh caeuq daeggo maj ndaej cix di he hix mbouj doxdoengz. Boux sang boux daemq, boux ndaem boux hau, boux he gyoengq lwgsau ceng daeuj maij, boux he duznengz cungj mbouj raen daeuj douh. Ngoenzbonz Veiz Fungh lij raen Mbanjlaj Dahcaet cang ndaej lengjlili daeuj ra Veiz Gangh gangjgoj ne.

Dahcaet vunz lengj noh hau, gyaez gangj gyaez riu, de miz haujlai daegmbauq gyaez. Dauq mbouj rox ndawsim Veiz Gangh baenzlawz naemj, de doiq Dahcaet mbouj swt saekdi. Haujlai baez, Dahcaet cungj dwg naj ndinggvaenggvaeng haeb heuj dedded daemhdin baema.

Gijneix Veiz Fungh cungj yawj youq ndaw da, de naemj: Baenzlawz couh mbouj dwg gou ne? Lwg fangzraq neix ndang youq ndaw fuk mbouj rox fuk, caen huk.

Vah gangj Veiz Gangh dingq daeggo anbaiz cijndei dingj gyaeuj bae, vunz caengz daengz giz dieg raen naj couh sawqmwh dingqnyi aen sing’yaem gig sug he cienz haeuj rwz de daeuj:“Veiz Gangh!”

“Liuz Fwnh!” Ca mbouj lai song boux doengzseiz heuh hwnjdaeuj.

“Sou song boux roxnaj?” Simj- ngux ngeizvaeg dwk muenghmuengh dahsau coh heuh Liuz Fwnh neix, youh muenghmuengh Veiz Gangh.

“Dwg vei, daxsimj.” Liuz Fwnh riunyumnyum daihfueng han naeuz.

Loengh gyaj baenz caen, raen miz heiq ndei lo, Simjngux song da cienqlulu hix riu naeuz:“Gou seizneix miz di saeh, lizbae yaep ndeu gonq, sou song boux youq neix menhmenh gangjgoj ba.” Gangj sat cix hoemq bak caegriu doq byaijdeuz lo. Doq byaij doq naemj: Ndaem faex ndaej mak, gou baezneix guh mehmoiz guh dingh lo, caen dwg daenj vaih haizdiet ra mbouj raen, ndaej daeuj cienz mbouj feiq goengfou.

Liuz Fwnh gaxgonq caeuq Veiz Gangh youq Gvangjdungh caemh aen gunghcangj he dajgoeng gvaq. Mwh- haenx Liuz Fwnh guhhong nyinhcaen roengzrengz, mbouj geij nanz couh ndaej daez hwnj guh cujcangj, Veiz Gangh youq lajfwngz de.

Vahsug naeuz “laujyangh raen laujyangh, ndawsim fouzcingz gag miz cingz”. Liuz Fwnh doiq Veiz Gangh hix cibfaen gvansim caeuq ciuqgoq, neix hawj dahyoux Veiz Gangh Lij Yenzyenz roxnyinh gig hozndat.

Seizhaenx youq ndaw da Veiz Gangh, Liuz Fwnh yienghsiengq maj ndaej daiq bingzciengz lo, dwg cungj vunz vut youq ndaw vunzlai hix ra mbouj raen. Swhgeij hix dangq de lumj baengzyoux ndwi, roxnaeuz dwg laujyangh hix ndaej. Hoeng, Lij Yenzyenz cungj dungxgaeb gyaez gwn meiq, de mbouj dingq Veiz Gangh gejnaeuz, laihnaeuz Veiz Gangh caeuq Liuz Fwnh miz di saeh. Naeuz gijmaz ndaw cangj daihbaj daegmbauq, couh dandan doiq mwngz baenzneix ndei, mbouj miz gij simsei wnq youh dwg maz? Mizseiz Veiz Gangh gangj mbouj gvaq Lij Yenzyenz, cijndei mbouj guhsing cang rwznuk.

Lij Yenzyenz gyaeundei, nyex vunz gyaez. Veiz Gangh simmaez Lij Yenzyenz, de caen lau baez mbouj siujsim, Lij Yenzyenz dujva gyaeu- ndei neix couh liz de bae lo. Lij Yenzyenz dwg dahyoux de, haujlai vunz hozhaenz hozhaemz de ne!

Lij Yenzyenz vunz lengj dungx- gaeb, de haemz Liuz Fwnh doiq Veiz Gangh ndei, ciengzciengz youq baih- naj vunzlai daegdaengq guhyiengh hawj Liuz Fwnh yawj. De moix ngoenz caeuq Veiz Gangh mboujlwnh dox- haeuj doxok cungj dwg gaemh fwngz baengh mbaq youh gangj youh riu, yienh ndaej de caeuq Veiz Gangh doxgyaez dangqmaz.

Liuz Fwnh mbouj leixlangh gij- neix, ciuqyiengh doiq Veiz Gangh lumj gaxgonq yienghhaenx, Lij Yenz- yenz engqgya ndatheiq lo.

Ngoenzhaenx haetromh anbaiz guhhong seiz, Liuz Fwnh caeuq Veiz Gangh lai gangj geij coenz vah. Lij Yenzyenz sikhaek heiq goenjfoedfoed hwnjdaeuj, vix ndaeng Liuz Fwnh couh daihsing vet:“Lajmbwn daihbaj bouxsai, mwngz vihmaz dan yawj Veiz Gangh! Vihmaz aeu caeuq gou dox- ciengj?” Loengh ndaej gyoengq vunz- lai cungj humx gvaqdaeuj yawj nauh- yied.

Liuz Fwnh simsoh gyaez bang vunz, dwg bouxvunz simndei he. De doiq Lij Yenzyenz naeuz:“Mwngz gaej gikdoengh baenzlai, gaej luenh siengj, gou mbouj miz aen sim caeuq mwngz ciengj bouxgvan.”

Veiz Gangh hix youq dangnaj gyoengqvunz lai naeuz de ndawsim cij miz Lij Yenzyenz boux ndeu, dangh- naeuz sim naemj bouxwnq, mbwn gaj deih mied.

Raen daegyoux swhgeij yiengh- neix gangj, Lij Yenzyenz engq ndat- heiq engq mbouj gangj leix lo, naeuz:“Veiz Gangh mwngz sim coh Liuz Fwnh, raen de ndei couh caeuq de gvaq ba! Gou miz haujlai vunz gyaez, mbouj noix mwngz ne!

Lij Yenzyenz yienghneix baez nauh, Veiz Gangh nyapnyuk raixcaix. Doeklaeng de engq hawj Veiz Gangh saetmuengh, de caen bae caeuq daegmbauq he doxlienh lo.

Muengh dwk aen ngaeuz Lij Yenzyenz yied bae yied gyae, Veiz Gangh ndawsim naemj: Bae couh bae ba, gou couh mbouj saenq mbouj miz mwngz Lij Yenzyenz, ngoenzcog daengngoenz couh mbouj caiq daj baihdoeng hwnjdaeuj lo.

Vah dwg yienghneix gangj, Veiz Gangh lijdwg roxnyinh gig siengsim, gvaqlaeng de hix gig vaiq lizhai gunghcangj lo.

Yienznaeuz gij saeh neix gaenq gvaqbae song bi lai, hoeng saehgaeuq byawz cungj mbouj siengj daez baenzlai. Liuz Fwnh naeuz seizhaenx Veiz Gangh lizhai le, mbouj geij nanz de hix mbouj youq gizhaenx guhhong lo. Gvaqlaeng Lij Yenzyenz caeuq boux daegmbauq haenx hix mbouj doxhuz, mbouj geij nanz couh doxfaen lo……

Dingq daengz gijneix, Veiz Gangh ndawsim miz di nanzsouh, de caensim gyaez gvaq Lij Yenzyenz, doeklaeng yienghneix rox yiemz byawz ne? Veiz Gangh gag danq gaemz heiq ndeu.

Liuz Fwnh naeuz, de nienzgeij mbouj iq lo, bohmeh coi ndaej gaenj, swhgeij mbouj roxnaj geijlai vunz, cijndei dingq bohmeh anbaiz daeuj yawjyawj, liuh mbouj daengz youq gizneix ndaej raen Veiz Gangh.

Veiz Gangh riu naeuz:“Gou hix saedcaih siengj mbouj daengz, naemj hwnj gaxgonq, caen doiq mbouj hwnj mwngz.”

“Mbouj gangj gijneix lo, raeuz seizneix ceiq youqgaenj couhdwg yawj coh baihnaj.” Liuz Fwnh hix riu dwk naeuz.

Veiz Gangh caeuq Liuz Fwnh daj mbatneix doxraen le, de fatyienh Liuz Fwnh dwg boux dahsau simsoh caemhcaiq ndaw dungx gvangqlangh he. Mbouj rox mbouj nyinh couh menhmenh gyaez hwnj de lo. Beij hwnj gij dahsau vunz lengj heiq dinj, de roxnyinh Liuz Fwnh cungj dahsau neix engq hawj de sim’an sim’onj.

Dahcaet Mbanjlaj raen Veiz Gangh caeuq Liuz Fwnh damzyoux le, hix roxsoq mbouj bae ra de lo, haemz ndaej byaij loh doxbungz cungj mbouj doxdongx. Veiz Gangh haibak dongx de gonq, de cix ngeuxgyaeuj gvaq mbiengj he bae lumj mbouj ndaejnyi nei, yienzhaeuh lumj ndoj boux baenzraq nei riengjret buetdeuz.

Miz vunz riu Veiz Gangh, dahsau lengj gag daeuj ra mbouj aeu, dauq bae gyaez lingh dah yiengh bingz- ciengz, caen dwg miz da mbouj miz ngvih lo.

Veiz Gangh cix riu naeuz:“Byaekheu lauxbaeg, gag boux gag gyaez, gou cij gyaez Liuz Fwnh boux ndeu. De youq ndaw da gou lengj lumj dahsien!”Bouxwnq dingq le, hix mbouj gamj gangj maz lo.

Baihde Veiz Fungh caeuq Cangh Siujyaz hix yawj hwnj da lo. Baenzneix Simjngux okmingz lo, de fanhfanh naemj mbouj daengz, guh baez moiz he cix hawj 4 bouxcoz neix baenz gvanbaz, nyex ndaej gyoengq daeg- mbauq mbanj gyae mbanj gyawj cungj faenfaen hwnj dou daeuj cingj de guhmoiz nda mae.

（sat）