Seiz iq cij rox baenzngoenz angq

Ndang rap youheiq hix mbouj gangj

Daengz cieng daengz ngaiz cungj angq-

yangz

Gwnheiq doengzdoih rox bangfwngz

Nyez cim daengngoenz raezrangrang

Dauqcawq bae gvangh buet gwnz laj

Daengx ngoenz bohmeh mbouj raen naj

Maranz mbouj nyi bohmeh daengq

Majhung raen ndit couh doeknaiq

Ndai reih ndai naz muengh de vaij

Doegsaw roxsaeh cij baenz gvai

Lai hag cihsaw lai roxsoq

Daengz coz roxnyinh seiz dijbauj

Mbeilaux haenqrengz guh ndei saeh

Menhmenh hag rox baeq guh saeh

Bi’ndwen gvaqbae lumj raemx lae

Cungnienz roxnyinh gvaq ngoenz yaemz

Ngaemgyaeuj guhhong haet daengz haemh

Saeh soiq saeh caz bak cix caem

Bi haemz nyaengqnyat youh gvaqbae

Geq le ienq mbouj miz bonjlingx

Goengmingz ngaenzceij mbouj miz maz

Ndawranz gvangqlangh cungj mbouj gvaq

Diemj daeng ra seiz mbouj raen ngaeuz

Da cim bya gyae lij dwg bya

Yawjraen baq gyawj baenz yiengh baq

Maqmuengh raemxdah faen lai ga

Baenzlawz hah ndaej bi’ndwen dauq

Dujva bibi seizcin hai

Vunz saeh fouz dingh lai rox bienq

Cij muengh doeklaeng mbouj caiq ienq

Ndwenngoenz buet bieng aeu insik