Suenq hwnjdaeuj wnggai dwg 5 bi gonq ba, daj aen cauhsi gwnz haw hai dou ciep hek le, gou couh youq neix guhhong lo, moix ngoenz gaigai doxgaiq sousou ngaenz, bungz daengz saeh hung saeh iq hix mbouj suenq noix lo.

Bouxgeq naeuz “doeg 10 ngoenz saw mboujyawx ok ngoenz haw”, couhdwg gangj bouxvunz cij rox doegsaw, mbouj caenndang okbae yawjyawj seiqgyaiq, mbouj okbae caeuq vunz lai guhguh saeh, haghag leix, couh mbouj rox baenzlawz guh vunz, mbouj rox baenzlawz yawj saeh.

Geij bi neix daeuj, gou youq ndaw vunzlai boux bae boux dauq, hag rox le baenzlawz yawj vunz caeuq baenzlawz naemj saeh.

Ngoenzneix lwnz daengz gou sou ngaenz, banngaiz seiz hek gig lai, gou cingq nyaengqfoedfoed seiz, boux mehmbwk ndaej 30 lai bi he fwngz yien daeglwg ndaej haj roek bi ndeu ndwn youq baihnaj gou. Boux mehmbwk neix faj naj nujnangnang, mbouj rox deng feiz remj roxnaeuz deng raemx goenj romx gvaq, hawj vunz baez raen couh miz di doeksaet. Daeglwg de fwngz gaem aen vanzgi ndeu, mehmbwk sing umqnemnem doiq gou naeuz:“Dahheiz doiq mbouj hwnj lo, haxbaenh gou daiq lwg neix daeuj cauhsi cawx doxgaiq, dauqbae daengz ranz cij raen ndaw daeh vaq de miz aen vanzgi neix. Vahsug gangj ‘iq caeg cim, laux caeg gim’, de lij iq, gou mbouj ndaej gvenq de yienghneix guh. Aen vanzgi neix aeu geijlai ngaenz gou cungj nyienh cawx.”

De gangj le, couh ndenq ngaenz hawj gou, gou naj riunyumnyum, fwngzgvax coh de yaengx hwnj lwg- mehfwngz. Gyoengqvunz cawx huq haeujhaeuj okok, bouxboux daj gyaeuj daengz din yawj coh boux mehmbwk neix, bouxboux naj riunyumj coh de haenh ndei.

Ngoenz ndeu, lwnz daengz boux doengzsaeh wnq sou ngaenz, gou caeuq gyoengqdoih youq ndaw cauhsi gai doxgaiq. Lauxbanj byaij gvaq- daeuj, najsaep najndaem doiq dou naeuz:“Daj ngoenzneix hwnj, sou aeu lailai haeujsim bouxcaeg, duenh neix daeuj gij doxgaiq ndaw cauhsi raeuz deng vunz caeg bae mbouj noix bw.” Lauxbanj doq gangj doq daj ndaw daeh vaq de mbon soujgih okdaeuj hai sibingz hawj dou yawj, lij daengq naeuz:“Boux mehmbwk neix ciengz- seiz daeuj cauhsi raeuz cawx doxgaiq, ngoenzlwenz de caeg bau cehgve he okbae lo, haemhlwenz gou yawj genhgung cij caz raen. Danghnaeuz de caiq daeuj, sou itdingh aeu lai yawj de cij ndaej.”

Ai, gou caen siengj mbouj daengz boux mehmbwk neix dwg vunz yienghneix, de ngamq ndaej 30 lai bi, vunz mbouj sang mbouj daemq, ndang reux naj hau noh maeq, aen bak de gangj ndaej raeuzredred youh diemz- subsub, doenghbaez de daeuj cawx doxgaiq, cungj gyaez caeuq gou gangjgoj guh riu.

Ngoenzneix gwn ngaiz gvaq le, gou raen boux mehmbwk guhcaeg haenx fwngz yien daeglwg ndaej haj roek bi ndeu youh daeuj lo. Gou gyae’gyae couh yawjraen de lo, ndigah de byaij daengz gyawz, gou hix laeglemx gaen daengz gizde, gou cang guh bae cingjleix gij doxgaiq gwnz gyaq, lwgda cix ciz gvaqbae yawj de. Mehmbwk cienq le geij hop, aeu song bau gyu couh byaij okbae gyau ngaenz lo.

Lauxbanj suenq ngaenz ndei, najndaem dwk doiq de naeuz:“Aeu 200 maenz ngaenz daeuj.”

Mehmbwk daihsing cam:“Vihmaz aeu gou baenzlai ngaenz?”

Lauxbanj myonx dahau cimyawj de, heiq hwnj fofo naeuz:“Mwngz guh maz saeh ndawsim gag rox, mwngz dwg lauxsaed hawj ngaenz roxnaeuz hawj gou cingj gingjcaz daeuj gaemh mwngz!”

Aen naj mehmbwk fwt bienq heu bienq henj hwnjdaeuj, de fwngzgvax mbon haeuj ndaw buh lajeiq bae, dawz bingz raemxhom he okdaeuj, cuengq youq gwnz daiz naeuz:“Couh bingz neix.”

Lauxbanj youh hozhwnj dwk daihsing hat naeuz:“Aeu 800 maenz cij ndaej.”

Mehmbwk doeksaet yat, hemq naeuz:“Haxbaenh mwngz mbouj dwg naeuz aeu 200 maenz ndwi ha, seizneix baenzlawz couh bienqbaenz 800 maenz lo.”

Lauxbanj fwngz vix coh meh- mbwk, maenjhuhu naeuz:“‘Caeg it fad cib’, ndaw cauhsi dauqcawq nem miz gij saw neix, 200 maenz haenx dwg fad mwngz ngoenzlwenz caeg daeh cehgve haenx.”

Mehmbwk lumj byaekgat deng raemx goenj rwed nei, daengx ndang unq roengzdaeuj, raemxda hix hoij rim gwnz naj, sing naiqniegnieg naeuz:“Gwnz ndang gou mbouj miz baenzlai ngaenz, gou dwk dienhvah hawj vunzranz dawz daeuj, mwngz gaej bauqgingj.”

Bouxhek haeujhaeuj okok, boux- boux daj gyaeuj daengz din yawj coh de, miz vunz bi’gyaeuj laglag danqheiq naeuz:“Aeu dungx gek caengz naeng, mehmbwk neix baenz- neix saundei, bouxlawz rox de hix rox guh gij saeh neix ne? Caen saetnaj lai lo, gag aeu aen naj swhgeij hoemj roengz haexvaiz bae lo.”

Ai, caen dwg bouxcaeg aek gag diuq, de ngamq byaij haeuj diemq, gou couh dawz de lo, mbouj raen de caeg maz doxgaiq, siengj mbouj daengz de gawqyienz ndaej youq laj da gou doenghfwngz.

Bouxlaux ciengz gangj “bohmeh guh gingq, lwgcing guh yiengh. Son lwg son bingz daiz, ndaem rangz ndaem seiz oiq”. Boux mehmbwk neix daiq daeglwg daeuj guhcaeg, mbouj rox de naemj mbouj naemj gvaq ciuh laeng.