Diuqmiuh cienzlah youq Ginh- couh Si, dwg cungj hozdung cietheiq ndawbiengz, miz vwnzva Bouxcuengh Bouxgun doxgyaux youq ndaw. Cienzlah youq Ginhcouh Si gak yienh、gih, daihbouhfaenh cienzlah youq Ginhnanz Gih、Ginhbwz Gih、Lingzsanh Yen caeuq Bujbwz Yen doenghgij mbanj Bouxcuengh Boux- gun, cungj hozdung neix gaenq miz 470 lai bi nanz lo.

“Diuqmiuh”dwg vunzlai baiq miuh ndawde aen hongsaeh ceiq hungmbwk ndeu; youh heuhguh“ciet gyaeujndoi”, mizmbangj deihfueng youh heuhguh“gwn miuh”; aenvih cungj hozdung neix daihbouhfaenh youq gyawj miuh henz mbanj gwnz bodaemq roxnaeuz gyaeujndoi guh, neix couh heuhguh“diuq gyaeuj- ndoi”; aen ciet neix naekhung yaek lumj gvaqcieng. Moix bi liggaeuq bet nyied daengz cib nyied, dwg duenh guh hozdung diuqmiuh, gonqlaeng guh sam ndwen lai, guh baenzneix nanz, diegwnq ndawbiengz mbouj daih raen miz.

Diuqmiuh hozdung youz doenghgij doihdiuqmiuh dangdieg guh, youz boux saefouh daeuz gaemguenj. Aen doihdiuqmiuh miz 22 daengz 30 bouxyienj. Diuqmiuh seizhaenx, gyoengq bouxyienj daenj ndangdaenj ciuhgeq, daenj mauh daenj ngeggoemq, fwngz gaem cax fouj giemq faex canj daengj doengh- yiengh yienj bouxsae bouxdauh. Biujyienj le, mizseiz lumj miz fangz miz sien, ciengzmienh caemrwkrwk nei mizdi dwglau, mizseiz ndeiriu dangqmaz, vunzlai humxyawj riu goksa.

“Diuqmiuh”dwg cungj hozdung dauhyaz ndeu, aeudaeuj coengh gak mbanj laeh fangz cawz raq、gouz ndaem maz ndaej maz、vunz caeuq doihduz caez onj、bauj ndaw mbanj seuqcingh. Guh hozdung mboengq haenx, miz boux ndeu roq gyong vixyinx, miz song boux roq laz doxboiq, goengdauh riengz sing yinhyoz, miz gonq miz laeng ciengqgo diuqfoux. Hoeng, ndawde ciengqgo mbouj diuqfoux, diuqfoux mbouj ciengqgo.

Baez diuqmiuh gingciengz daj lajbyonghngoenz heijguh, daengz ngoenzlaeng banhaet guhsat. Doengh mbanj guh diuqmiuh haenx, ranzranz gaj mou gaj bitgaeq roxnaeuz gaj cwzvai, guhdonq cingj hek daeuj gwn. Vunz dangdieg nyinhnaeuz ranz lawz cingj ndaej hek ceiq lai, ranz haenx couh bihaenx seizheiq ceiq ndei. Neix vunz mbanj wnq hix daeuj camgya.

Diuqmiuh youz vwnzva Boux- cuengh dangdieg hwngfat daeuj, daengzlaeng ndawde mboujduenh suphaeuj vwnzva ngoenzciet Boux- gun, neix yienh’ok doenghgij vwnzva maenhndei Bouxcuengh Bouxgun cojcienz haenx doxgyaux doxyungz. Vunz Bouxcuengh Bouxgun doengz- caez diuqmiuh, doxbang doxcoengh, doxnai doxgyaez, doengzcaez maq- muengh vunz caeuq doihduz caez onj、ndaem maz ndaej maz, neix coihaeuj minzcuz doxgiet huzndei.

2014 nienz 11 nyied 11 hauh, diuqmiuh Ginhcouh ginggvaq Goz- vuyen baecinj, ndaej liedhaeuj daih- seiq buek guekgya gaep feihvuzciz vwnzva yizcanj gya’gvangq mingzloeg.