Ranzrongh ngamq hwnqcongz, ndit ciuq ndaej ndawranz rongh- sagsag, rog ranz ndaw suenbyaek vayouzcaiq hai ndaej henjrwgrwg, rangfwdfwd, gyoengq duzrwi nauh- ung’ung nyaengqfoedfoed youq ndaw va mbin haeuj mbin ok.

Veiz Fungh byaij ok rogdou, baihnaj gij gingjsaek gyaeundei neix hawj de sangjswtswt, de sup gaemz heiq raez he, gij hoengheiq hawj de roxnyinh diemzsisi. Boh de Lauxveiz hix daj ndawranz okdaeuj, rim naj dwg riu, depgaenh goekrwz de gangj vah mbouj dingz.

Youq rog ranz ndwn yaep ndeu le, Veiz Fungh cienq ndang haeuj ranz nyoengx aen cimohdoz gaeuq okdaeuj aeu raemx swiq, caiq uetuet gij raemx gwnz ci, yienzhaeuh lumj raq rumz nei bongh okbae. Baihlaeng cienz daeuj gij sing Lauxveiz:“Lwg ha, ndeindei biujyienh, baezneix gaej hawj gou saetmuengh bw……”

Yaek ndaej 30 bi lo, Veiz Fungh hix caeuq geij dahsau doxcim gvaq, baezbaez cungj mbouj swnh sim, gyoengqde mbouj dwg yiemz neix couhdwg yiemz haenx, hawj Veiz Fungh miz di doeknaiq.

Mboengqgonq Veiz Fungh caeuq dahsau he raennaj, dahsau dangmienh mbouj gangj maz, gvaqlaeng de cix doiq mehmoiz naeuz, de ndang daemq youh iqet youh ndaemndet, siengj mbouj daengz doiqfueng gingqyienz maj ndaej caeuq swhgeij doxdoengz, de siengj ra bouxsai maj ndaej ndang sang ndeu. Lij naeuz Veiz Fungh youq yienhsingz mbouj miz ranz hix mbouj miz ci’gyauceh…… Dah- sau ndaej dawz vah yienghneix gangj ok bak, saeh couh mbouj baenz lo. Veiz Fungh baez naemj gij vah neix couh ndatheiq, byawz mbouj miz ranz miz ci ne, ranzvax naeuh hix dwg ranz, danci naeuh hix dwg ci. Cungj dahsau neix mbouj cam simsienh simndei dauq haeujsim gaiqwnq, caen dwg……

Veiz Fungh yienznaeuz rox swhgeij gij diuzgienh mbouj ndei geijlai, hoeng baezneix ndawsim de lij dwg couxrim maqmuengh, doq hai ci doq naemj: Miz dahsau nyienh caeuq gou raennaj, mboujlwnh doeklaeng baenzlawz yiengh, hix aeu sawqsawq cij ndaej.

Daxboh Veiz Fungh vih lwg coux yah causim fouzbeij, ngamq 60 bi byoem cungj hau caez, gij riz- nyaeuq lumj diuzdiuz mieng iq nei laeglaeg feuzfeuz lah rim gwnz naj. Siengj daengz gijneix Veiz Fungh ndawsim couh nanzgvaq. Daxboh ngoenzneix heuh daxsauj ranzgwnz guhmoiz, ngoenzcog heuh daxsimj ranzlaj yien sienq. Baezneix, Daxboh dak ranznden Simjngux bangfwngz. Simjngux dauq hix caenhrengz, baez- neix caen ra ndaej boux dahsau he, baenz mbouj baenz couh yawj ngoenz- neix lo.

Siengj hwnj gij yienghceij caeuq gij vah daxboh, Veiz Fungh lumjbaenz yawjraen maqmuengh couh youq dangqnaj nei, de gikdoengh dwk aen sim cungj yaek diuq ok rog aek daeuj lo.

Couh youq seizneix, baihnaj Mbanjlaz diuz loh iq iet ok goengloh daeuj haenx, miz dahsau he hix hai aen dendungceh he okdaeuj. “Budung” sing he, song aen ci dox- daemj lo, song boux doengzcaez laemx roengz gwnzdieg.

“Doiq mbouj hwnj, mwngz baenzlawz yiengh lo?” Veiz Fungh doq gangj doq benz hwnjdaeuj gipmuengz bae fuz boux dahsau haenx.

Dahsau doq bongx namhfaenx gwnz ndang doq naeuz:“Mbouj youq- gaenj, gou hix dwg hai ndaej daiq vaiq lo.”

Caj dahsau ngiengxgyaeuj hwnj- daeuj, Veiz Fungh couh doeksaet lo, lienz sing heuh naeuz:“Cangh Siujyaz, dwg mwngz ha!”

Dahsau hix nyinh ok Veiz Fungh daeuj lo, sim’angq dwk heuh naeuz:“Dwg mwngz ha Veiz Fungh, haujlai bi mbouj raen lo, mwngz baenzlawz yiengh lo?”

Song boux dwg siujyoz doengz- hag, seizhaenx songde mboujdanh caemh ban, hix caemh daiz naengh gvaq ne.

Haujlai bi mbouj raen, Cangh Siujyaz byoem ndaemndwtndwt raez daengz gyang hwet, naj hoengzmaeq lumj vadauz sam nyied, gig gyaeundei.

Seizhaenx ndaw ban mbouj rox boux doengzhag lawz guh gonq, doeklaeng gwnz daizsaw cungj veh miz diuz sienq he doxgek dwk, bouxboux cungj mbouj ndaej mauh gvaq diuz sienq haenx. Danghnaeuz doengzhag sai mauh gvaq lo, doengzhag mbwk ceiq lai gangj saek coenz couh ndaej lo; danghnaeuz dwg doengzhag mbwk ne, doengzhag sai gencueg couh haenqrengz dok gvaqbae, miz di lij da daengx haeb heuj dem. Veiz Fungh caeuq Cangh Siujyaz soqlaiz caengz baenzneix gvaq.

Seizhaenx Cangh Siujyaz hagsib cingzcik mbouj daiq ndei, Veiz Fungh ciengzciengz naihsim bae son de.

Haemhhaenx roengz dangz le, Veiz Fungh caeuq Cangh Siujyaz lij youq ndaw gyausiz un saw, sij cozyez. Guh sat gijneix le, Cangh Siujyaz couh iu Veiz Fungh beggen, yawj diuz gen bouxlawz miz rengz lai. Mwh songde guhcaemz ndaej cingq naemq seiz cix miz sing riugoekgoek hwnjdaeuj. Yenzlaiz dingjlingz miz boux doengz- hag he byaij haeuj gyausiz, haetlaeng couh lwnh lauxsae nyi lo.

Lauxsae heuh Veiz Fungh caeuq Cangh Siujyaz daengz bangunghsiz bae, naeuz doengzhag bingzseiz goj ndaej doxbang hagsib, mbouj wnggai baenzneix iq couh hainduj damz cingz gangj gyaez. Lij heuh songde sij sawgenjdauj dem. Songde gejgangj mbouj miz gij saeh neix, dailix mbouj haengj sij. Gienh saeh neix hix youq daengx aen hagdangz cienz ndaej bouxboux cungj rox caez, hix cienz daengz ndaw rwz bohmeh songde bae, Veiz Fungh deng boh de Lauxveiz ndaq can ndeu.

Ngoenzhaenx dwg singgeizngux lajbyonghngoenz, gwnz mbwn cingq doek fwn iq, Cangh Siujyaz byaij haeuj gyausiz, bonj dem bonj dawz gij sawbonj cuengq haeuj aen daehbeq hung he bae. Byaij ok bakdou gyausiz seiz, de dingz din roengzdaeuj, menhmenh ngeuxgyaeuj muengh aen gyausiz hop ndeu, yienzhaeuh gig vaiq couh siusaet youq ndaw fwn lo……

Cangh Siujyaz lizhai hagdangz, dauq mbouj dwg aenvih caeuq Veiz Fungh beggen, dwg daxboh de baenzbingh gvaqseiq le, mbanjranz youh mbouj miz maz vunzcaen lo, meh de couh daiq de caeuq daegnuengx de lingh haq bae gizwnq, de mbouj ndaej mbouj riengz bae.

Daj seizhaenx hwnj, Veiz Fungh henz ndang aen vih couh hoengq- hanghang fwzfwdfwd youq gizhaenx, de miz di siengjniemh Cangh Siujyaz, siengj hwnj de lizhai gyausiz seiz baez ngeuxgyaeuj yawj. Itcig daengz haggeiz laj, lauxsae anbaiz lingh boux doengzhag caeuq Veiz Fungh caemh daiz, de cij cugciemh mbouj ngeix Cangh Siujyaz lo.

Saehgaeuq lumj cuengq denyingj nei youq ndaw uk Veiz Fungh caeuq Cangh Siujyaz gvaenxgvax mbouj dingz, seizneix ceiq youqgaenj couh- dwg cazyawj gwnz ndang miz mbouj miz gizsieng. Veiz Fungh mbouj miz maz saeh, fwngzgvaz cij deng lot gaiq naeng iq he. Raen gencueg caeuq gahengh Cangh Siujyaz hix deng lot di naeng, lij miz di lwed iemq okdaeuj. Veiz Fungh youq henz loh lanz aen ci he, soengq Cangh Siujyaz bae yen yihyen.

Cangh Siujyaz naeuz lot di naeng mbouj ngaihsaeh, mbouj yungh bae law. Veiz Fungh cix dailix mbouj doengzeiq, naeuz aeu bae yihyen genjcaz cij ndaej cuengqsim.

Caeklaiq song boux cij lot di naeng mbouj miz maz, canghyw hawj gizsieng cat di yw, caiq aeu baengzsa bau ndei couh ndaej lo.

Baezneix Veiz Fungh cij rox, bihaenx Cangh Siujyaz riengz meh de bae haq gizgyae le, bohlaeng doiq gyoengqde song cejnuengx cungj mbouj ndei. Loq hung di le, Cangh Siujyaz couh caeuq daegnuengx bae dajgoeng, rom ndaej cienz le couh ma mbanjranz guh ranz. Seizneix daegnuengx Cangh Siujyaz hix gaenq baenzgya lo, hoeng de lij caengz rox ranz bouxgvan youq gizlawz.

Dingq Cangh Siujyaz yienghneix gangj, Veiz Fungh ndawsim fanfub mbouj dingz, de ngeix hwnj ngoenz- neix gij saeh haenx. Cuet lo, seizneix Simjngux caeuq dahsau haenx gaenq youq gwnz haw caj haujlai nanz lo, baenzlawz guh ne?

Couh youq seizneix, aen soujgih Veiz Fungh yiengj hwnjdaeuj lo, “Veiz Fungh, mwngz seizneix youq gizlawz? Mbouj dwg gangj ndei banngaiz 12 diemjcung raennaj ma. Seizneix gaenq dwg lajbyonghngoenz 1 diemjcung lo, mwngz lwgfangz neix lij caengz oknaj, caeklaiq dahsau neix gangj vah suenqsoq, naeuz mbouj raen mbouj sanq!” Simjngux daj dienhvah youq baihhaenx coi naeuz.

Caiq ganj bae gaenq mbouj gib lo, yawjyawj swhgeij gij yienghceij neix, dahsau caengz raennaj haenx haeujceij, swhgeij caen siengj faen ndang bae raen de. Hoeng, seizneix de bae mbouj ndaej ha. Veiz Fungh siengj daengz le daegnuengx swhgeij Veiz Gangh, heuh de dingjlawh swhgeij bae caeuq dahsau haenx doxcim ba! Veiz Fungh dawz gij gonqlaeng saehcingz faenbied lwnh hawj Simjngux caeuq daegnuengx Veiz Gangh nyi.

（caengz sat）