Vih senhconz langhbaij gij vwnz- va deihfueng Dasinh Yen miz daegsaek, caenh’itbouh vatcimh gij vwnzva neihanz vwnzva dajndaem、hawj minz- cuz vwnzva canjnieb ndaej daezswng, ndwen 8 ngoenz 1, Aen Gingjgih Doenghnaz Mingzsw Dasinh Yen banh gaiq daeuz ciet vwnzva dajndaem Bouxcuengh.

Baez ciet neix neiyungz lai yiengh, miz goengdauh Mbanjcuengh caeqbaiq reihnaz, gouzmbaenj fwn yinz rumz swnh、haeuxgwn fungsou; “fwenvuengz doenghnaz” yungh Fwencuengh angq- coux bouxhek gak dieg daeujdaengz; diuqfoux angqyangz yinx ndaej raq dem raq angq hemq……baenzdauq cezmuz miz daegsaek doxlwnz yienj, hawj bouxhek yawj baez heiq ndeiyawj ndeu. Hozdung lij doenggvaq caenndang bae ndaem gyaj、youq gyang naz bengcag、gaemh bya ciengj gaeq、guh haeux- naengj haj saek daengj baenzdauq hanghmoeg miz gij minzsuz dajndaem caeuq yenzsu daihneix dox giethab, hawj gyoengq bouxhek caeuqfaenh haeujbae, roxnyinh gij ndei vwnzva dajndaem Bouxcuengh.

Gaenh geij bi neix daeuj, Cungzcoj Si hozdung vwnzva ngoenzciet lai dangqmaz, daegbied dwg ciet roengz- doengh Dasinh、Lungzcouh、Denh- dwngj、Gyanghcouh daengj dieg ceiq nauhyied. Lumjbaenz Dasinh dwg dieg swnjcienz youqgaenj vwnzva roengz- doengh, mboujduenh vatcimh gij vwnz- va gizdieg caeuq swhyenz vwnzva minzcuz lai cungj lai yiengh, haenq- rengz vatcimh、baujhoh、swnjcienz caeuq fatyiengz vwnzva roengzdoengh, yawjnaek vatcimh baujhoh buhvaq ciuhgeq minzcuz、fwen ndawbiengz、gij sibgvenq ndawbiengz、lizsij vwnzva daengj minzcuz minzsuz vwnzva swh- yenz miz daegsaek, haenqrengz cauh gij binjbaiz vwnzva minzcuz bonjfaenh, aeundaej cingzcik yienhda.

(Lungz Yenyingh/隆艳英)