Hoihmiuh Fuzboh Bouxcuengh youh heuhguh hoihmiuh ngoenzseng Fuzboh, youq ranghdieg Dahcuh- gyangh lae gvaq haenx couhdwg Guengjdoeng、Guengjsae gak dieg hwnghoengh, dwg cungj hozdung ndawbiengz ndawde hamzmiz haujlai doenghyiengh, ndawde Hwngzyen ranghdieg Dahyi’gyangh guh hoih- miuh Fuzboh lizsij ceiq nanz、gveihmoz ceiq hung、yingjyangj ceiq laeg ceiq gyae.

Guh hoihmiuh Fuzboh dwg vunz dangdieg geiqniemh gij goenglauz gvendaengz Ciuhdunghhan boux- cienghginh Maj Yenz bingz biengz- luenh hawj biengz onj、doeng dah doeng ruz; moix bi liggaeuq seiq nyied cibseiq couhdwg ngoenzseng Fuzboh guh hozdung daeuz, guh hoihmiuh gaenq miz cien lai bi nanz lo. Cien lai bi daeuj, Hwngzyen aen hoihmiuh Fuzboh baezbaez cungj yieng lai feiz hoengh, vunz cien vunz fanh. Guh hoihmiuh ngoenz haenx, vunz ndaet lumj haw, hoenzyieng dohdaengz, bauqciengh yiengj- rumrum, sing gyong sing laz goksasa, duzlungz duzsaeceij diuq bae yat dauq, sing fwen goksa, nauhyied dangqmaz.

Guh hoihmiuh Fuzboh mboengq haenx, doenghgij hozdung ndaw- biengz lai cungj lai yiengh, miz baiq sienbaed、diuq fouxlungz、diuq fouxsaeceij、diuq fouxduzfungh、diuq fouxgeizlaenz、doiq fwen、ciengq heiqsae、guh saehyaz saehdauh daengj.

Baiq sienbaed, couhdwg baiq Fuzboh cienghginh, dwg aen hozdung ceiq daeuz youq ndaw hoihmiuh Fuzboh. Neix it dwg geiqniemh gij goenglauz gvendaengz Fuzboh cienghginh bingz biengzluenh hawj biengz onj、doeng dah doeng ruz; ngeih dwg gouz duzlingz Fuzboh cienghginh bauj bingzonj、fouz cai fouz nanh. Liggaeuq seiq nyied cibseiq daengz cibngux guh hozdung baiq Fuzboh cienghginh, youq mboengq neix, baenz cienz baenz fanh vunz daj gak dieg daeuj miuh Fuzboh, daegbied dwg vunz dwkbya hairuz, cungj mbouj lau dwgrengz daeuj daengz miuh Fuzboh baiq Fuzboh, gyoengqde hwnj yieng、cuengq bauqciengh、eu fwen、diuq- foux daengj, aeu neix daeuj lwnh gij simhoz gingqbaiq caeuq niemhngeix, caemhcaiq gouz Maj Yenz cienghginh mboujdan bauj guek onj vunz ndei、ndaem maz ndaej maz、laeh fangz bauj onj、fouz cai fouz nanh, vanzlij bauj vunz doegsaw ndaejrox、gvanbaz huzndei daengj.

Diuq fouxlungz、fouxsaeceij、fouxduzfungh、fouxgeizlaenz. Neix dwg gij cezmuz cojcienz. Mboengq guh hoihmiuh, cibgeij aendoih fouxlungz、fouxsaeceij、fouxduzfungh、fouxgeizlaenz daj Hwngzyen Yauyij Cin、Lingzcuz Cin，Lingzsanh Yen、Gveigangj Si、Binhyangz Yen daengj comz daeuj Miuhfuzboh, ciengzmienh nauhyied dangqmaz.

Doiq fwen. Baez daengz lig- gaeuq seiq nyied cibsam banhaemh, gyoengq canghfwen daj Hwngzyen、Binhyangz、Lingzsanh、Gveigangj daengj si(yienh) comz daeuj, daeuj neix doiq fwen. Doiq fwen seizhaenx, mbwkmbwk saisai sam boux rox haj boux gak gyoeb baenz doih, baen haujlai doihfwen, doiq fwen roxnaeuz aeu fwen camhan.

Ciengqsae. Couhdwg yienj heiqsae. Youq mboengq liggaeuq seiq nyied cibsam daengz cibhaj sam ngoenz neix, hwnz lienz ngoenz miz vunz yienj heiqsae. Gyoengq ban heiqsae hung daj Hwngzyen Bwzhoz、Yinzbyauj、Yauyij daengj yanghcin daeuj haenx, doxcaeh daeuj Miuh- fuzboh, yienj gij heiq gangj goj ngeihcib seiq hauq.

Guh saehyaz saehdauh. Boux- dauh guh gak cungj saehyaz saehdauh, beijlumj gvaq dousamdien、gvaq byacax dongfeiz daengj.

2007 nienz, Hoihmiuh Fuzboh Bouxcuengh ginggvaq Swcigih Yinz- minz Cwngfuj doengzeiq, ndaej liedhaeuj daih’it buek swcigih gaep feihvuzciz vwnzva yizcanj mingz- loeg.