Vunz Bouxcuengh miz lizsij nanz raeuh, miz vwnzva lwenqda dangqmaz. Youq ndaw vwnzva Boux- cuengh, Yw Bouxcuengh dwg cungj vwnzva hungdaeuz ndeu, haujlai bi daeuj, Yw Bouxcuengh bauj hawj vunz Bouxcuengh fuengzbingh ywbingh youqndei ndangcangq.

Yw Bouxcuengh (fap aeu maeyw diemj cit), dwg cungj fapywbingh ndeu, aeu doenghgij maeyw youz vunz ndawbiengz Bouxcuengh guh- baenz, diemj dawz feiz le soh cit diemjmaeg naengnoh ndangvunz, aeu neix daeuj ywbingh roxnaeuz fuengzbingh. Cungj fapywbingh neix daj ndawbiengz Bouxcuengh miz ok, ginggvaq vunz yenzgiu cingjleix daezsang le, vunzlai lij gyaez yungh cungj fap neix ywbingh.

Aeu maeyw diemj cit dwg Yw Bouxcuengh ndawde cungj fap yw rogndang ndeu. Canghyw aeu fap yw Bouxcuengh ywbingh seiz, yungh gij maeyw aeu ndaij renx baenz, na(cizging gvangq) miz 0.25 hauzmij、0.7 hauzmij、1.0 hauzmij sam cungj mbouj doxdoengz, renx baenz mae le couh dawz bae ceh raemxyw, dakroz liux ce yungh. Langh yungh daengz couh diemj dawz maeyw, cit coq diemjmaeg naengnoh bouxbingh, aeu neix daeuj doeng lohlungz(cungj“roen”ndawndang doxdoeng ndeu) caeuq lohfeiz (cungj“roen”ndaw- ndang doxdoeng ndeu), hawj boux- bingh ndaej laeh rumz cawz maz、daengx in daengx humz、doeng lwed siu gamz、siu foeg sanq ndaek daengj.

Vunz saenq caeuq hengz yw Bouxcuengh couh yienghneix naemj- ngeix：“Vunzraeuz mbouj dwg gag youq gag baenzbingh, dwg aenvih heiq lwed mbouj yinz yinxhwnj bingh.”Baengh maeyw diemj cit gik naengnoh, doeng ndei lohlungz lohfeiz, couh ndaej hawj vunzraeuz cawz maz、daengx in、laeh rumz、siu ndat、hwng lwed siu gamz、siu foeg sanq ndaek daengj.

Hengz yw Bouxcuengh gij fap diemj cit ywbingh seizhaenx aeu miz geu mae ndeu、aen daeng ndeu. Cit coq diemjmaeg naengnoh seiz, naengnoh vunz in lumj duzmoed haeb, danhseih siu bae vaiq dangqmaz, bouxbingh mbouj deng in gijmaz, mbouj miz riz, ancienz youh hawj vunz saenq ndaej gvaq; maeyw diemj dawz le mbouj miz hoenz, mbouj uq hoengheiq; yw bingh ndaej ndei, yungh cienz noix dangqmaz, ngaih hag ngaih rox, yienghneix ne cungj fap ywbingh neix ceiq hab youq ranghdieg lajmbanj caeuq dieg luegbya gyae doigvangq sawjyungh.

2011 nienz 5 nyied 23 hauh, yw Bouxcuengh (fap aeu maeyw diemj cit) ginggvaq Gozvuyen baecinj, ndaej liedhaeuj daihsam buek guek- gya gaep feihvuzciz vwnzva yizcanj mingzloeg.

Vunz hengz yw Bouxcuengh gij fap diemj cit ywbingh, aeu vunz Bouxcuengh guhdaeuz, vunz minzcuz doxgyawj lumj Myauzcuz、Yauzcuz、Dungcuz daengj minzcuz, hix miz vunz doxgyaux sawjyungh. Fap diemj cit yw Bouxcuengh ne ngaih yungh, yw ndaej bingh, neix gaenq ndaej dangguh cungj dinfwngz hab laj- mbanj yungh haenx doi coh daengx guek.

Yw Bouxcuengh (fap aeu maeyw diemj cit) mboujdan hawj vunz bonj minzcuz ndangcangq youq ndei、fuengz bingh yw bingh、ciengxndang bauj ndangcangq、hwngfat gengangh canjyez、guh gohyoz yenzgiu caeuq sonhag daengj, miz cozyung youq- gaenj dangqmaz, vanzlij doiq daengx seiqgyaiq vunzraeuz ndangcangq maj ndei miz yungh hungmbwk dangq- maz.