Aen sigij gonq 70 nienzdaih, seizde gou lijdwg lwgnyez. Seizhaenx dwg seiz hoj, maz cungj mbouj miz, daegbied dwg ranz gou gungzhoj raixcaix, gwn mbouj imq daenj mbouj raeuj. Aen ranznamh rwix ranz gou 4 fuk ciengz dauqcawq dekleklek, vax dingjranz dauqcawq byoengq congh, roh fwn laeuh rumz. Gwn、daenj、diegyouq cungj beij ranzwnq yaez.

Daxbuz gou daj iq da couh mengz, baenzsau le de mbouj haq vunz, aeu daeglwg gobiuj de daeuj guh lwgciengx. Boux lwgciengx neix couhdwg daxboh gou, dingqnaeuz daxboh gou ndaej 9 bi cij daeuj caeuq daxbuz gou gvaq ndwenngoenz. Yienznaeuz daxbuz gou song da cungj mengz, hoeng, hongranz de yiengh- yiengh guh ndaej. Lumjbaenz cawj haeuxbyaek、baet ranz、daem haeux、saeg buh、daiq lan daengjdaengj, de cungj guh ndaej baenz.

Daxboh gou seng 4 lwg, dou 4 beixnuengx cungj dwg youq ndaw rungj、baihlaeng daxbuz majhung. Daxboh gou youq baihrog guhhong, dwg boux gunghyinz hai roen ndeu. Dingqnaeuz roen hai daengz gyawz gyoengqde couh youq gizde gwn youq, noix ndaej dauqma goq ranz goq lwg. Cienzhong caemh noix raeuh, ngamq gaeuq ciengx aen bak de, ceiqlai bang ndaej ndawranz cawx saekdi gyu youz dem. Nda rapnaek ndawranz couh at youq gwnz mbaq daxmeh gou lo. Daxmeh boux dog guhhong aeu goengfaen ciengx 6 aen bak, baenz- lawz ciengx ndaej? Baenzlawz mbouj gungzhoj ne? Mwhhaenx banngoenz, gou soqlaiz mbouj raen daxmeh ndaejhoengq gvaq, guhhong dauqma le, de gipmuengz hwnj bya bae aeu haz、raemj fwnz, roxnaeuz youq lajdinbya laeglemx hai fwz ndaem saekdi lwgmaenz、maenzfaex, hawj ndawranz dem di gaiqgwn. Seizneix dauqngeix hwnjdaeuj, daxmeh gou sinhoj lai lo.

Seizhaenx ranz gou, donq ngaiz donq ringz cungj dwg gwn souh, gangj dwg souh mboujgvaq ndeidingq ndwi, gizsaed gij souh saw ndaej ciuq raen aen ngaeuz vunz bae. Cij miz donq caeuz cij ndaej gwn haeuxam, lij mbouj dwg caih mwngz gwn daengz imq nw! Moix boux cij ndaej vanj haeuxam ndeu, gwn mbouj imq couh cijndei gwn souh denz dungx lo. Mizseiz ranz gou lij goenq haeux goenq donq dem, seizde cij ndaej muengh mbwn ngonz namh gvaq ngoenz lo.

Caiq gangj daengz byaekheu, ranz gou cawj byaekheu cungj dwg cawj dang, aenvih cawj dang mbouj yungh coq lauz roxnaeuz noix coq di hix baenz. Gij byaekheu noix gyu noix lauz neix, gwn haeuj bak bae, roxnyinh ndongjndot cocat, nyaij hix mbouj miz maz feih ndei, hoeng aeu nyaij nanz di, mboujnex ndwnj roengzbae lij nwk hoz. Mbouj miz noh miz lauz roengz dungx, ndaw dungx hawqvauvau caemhcaiq manhsad- sad. Mwhde cingqngamj dwg seiz maj ndang dem, gwn geijlai cungj mbouj raen imq gvaq, dou 4 beixnuengx ciengzseiz hemq iek.

Seizhaenx danghnaeuz ndaej cimz di youz roxnaeuz noh couhdwg saeh angq lo, hoeng, ranz gou lienz haeux cungj mbouj gaeuq gwn, engq gaej naeuz gwn noh lo. Mboujgvaq, gvemqhajmou lij muengh ndaej. Daxboh gou song sam ndwen couh cawx baez nohhajmou he dauq ndet lauz. Gvemqhaj doiq dou daeuj gangj couhdwg gaiqgwn ceiq ndei lo. Baenzneix daxboh baez liz ranz, dou ngoenzngoenz mbaet fwngz ngeix de seizlawz youh dauqranz moq.

Aen nienzdaih haenx, mou dwg gwn raemz gyaux byaekmou majhung, aeu vah seizneix daeuj gangj heuhguh moudoj. Noh moudoj ndeigwn, noh- cing caed mbouj nyangq, nohbiz byot mbouj nywnx. Daegbied dwg noh- hajmou ndet lauz, lauzmou、gvemqhaj homfwdfwd. Gij heiqhom youq ndaw- ranz hopheux, con daengz goxgox gehgeh, lij mbin ok rog dou rog cuengq bae dem. Ranz lawz ndet lauz, seiqfueng betbaih ranznden cungj mup ndaej daengz gij heiqhom, gyoengqvunz couh byaij okrog daeuj cam:“Ranz lawz ndet lauz baenzneix hom?” Seizde ranzranz gvaq ndaej hoj, aen ndaeng lumj aen ndaeng duzma nei, gij heiq hom noh hom youz cungj muenz mbouj ndaej gyoengqvunz. Gij heiqhom neix caen hawj dou ndaw dungx mbouj miz saekdi youz myaiz rihdikdik bw! Ndaej youq ndawranz nyouq gij heiqhom neix, haemhneix youh miz huq ndeigwn lo. Mwngz naeuz sim’angq mbouj sim’angq!

Ranz gou moix baez cungj dwg daengz gyanghaemh daxmeh ndaej- hoengq seiz cij ndet lauz. Moix baez ndet lauz, gou daj goek daengz byai, cungj souj youq henz rek, lumj duz ma ngah ndok nei, lau baez yaep da couh lot saek cij ndok mbouj ndaej gwn. Daxmeh ndat rek raemxraeuj ndeu daeuj swiq nohhajmou gonq, caiq dawz nohhajmou ronq baenz gaiq miz sam cikfwngz baenzneix hung. Ndaw rek aeu coq vanj raemx ndeu gonq, vanj raemx neix heuhguh raemx- demhrek, mbouj hawj nohhajmou nem rek. Raemx goenj le caiq coq nohhajmou roengz rek bae, seiz mbouj seiz aeu gucanj boekfan nohhajmou, hawj de mbouj deng nem rek. Caj vanj raemxdemhrek siusat le, nohhajmou hix cawj cug lo, mbatneix de hainduj ok lauz. Seizneix feiz mbouj ndaej haenq lai bw, aeu feizunq menhmenh ndet, seiz mbouj seiz lij aeu ndaundaj hajmou, hawj de gaiqgaiq cungj ok lauz.

Baez ok lauz le, heiqhom couh riengz daeuj lo. Hainduj heiqhom lij caengz hom geijlai, ciemhciemh, nohhajmou yied daeuj yied roz, fouz youq gwnz lauz, heiqhom hix yied daeuj yied hom, gij heiqhom neix mbin youq ndawranz, con daengz gij gungx caez, lij mbin okrog bae dem. Mbouj geijnanz, baihrog couh menh- menh miz sing vunz byaij vunz nam lo. Gou naeuz:“Lau miz vunz riengz gij heiqhom byaij haeuj ranz raeuz daeuj, cimz saek gaiq gvemqhaj nw.” Daxmeh dingq le riuhehe vix najbyak gou naeuz:“Duzmeuz iq neix youh ngah gwn youh maetmi!” Gou mbouj fugheiq buek daxmeh naeuz:“Geij gaiq gvemqhaj neix caengz gaeuq dou gwn, danghnaeuz miz lai gou caih de gwn ne!”

Caj daengz gvemqhaj rozsauj, lij caengz bienq saekhenj seiz, daxmeh dawz feiz ndaep bae lo, gaenriengz coq gaiq gyu ndeu roengz rek lauz bae. Daxmeh naeuz swnh gij lauz ndat coq gyu, gij lauz gij gvemqhaj neix ce daengz mwhlawz cungj mbouj rox bienq haeu. Ndaep feiz le, gvemqhaj lij youq ndaw lauz ndat ceh yaep he. Deq daengz seizneix bak gou dauqdaej gven mbouj ndaej maenh lo, myaiz cung ok bak daeuj, gou doq uet doq ndwnj myaiz yagyag.

Ciemhciemh gvemqhaj bienq- baenz saekhenj lo, daxmeh couh do gvemqhaj okdaeuj hawj dou gwn. Gou deq mbouj gib, maz cungj mbouj goq, boux daih’it iet fwngz bae gip gaiq ndeu oet haeuj bak bae nyaij. Gvemq- haj ndat lai, byailinx gou deng logsieng lo, gou “huha huha” hemq dwk, supheiq boqheiq yaephe, couh dawz byailinx iet ok rog bak daeuj yietliengz. Mboujguenj gaiq gvemqhaj geijlai ndat, gou hix mbouj sij ndaej biq ok bak bae. Raen gij yiengh gou vadgei lai, daeggo dahcej doq gwn gvemqhaj doq riu naeuz gou lumj duz fangziek nei. Gij gvemqhaj neix youh byot youh hom youh rauz, gou gwn gaiq ndeu siengj song gaiq.

Gwnz cauq ranz gou miz aen guenqlauz iq ndeu, aen neix aiq cang ndaej gaen lauz he. Lauz ndaw rek haemq gyoet le, daxmeh dawz lauz cang rim guenqlauz iq neix bae, gij yawz cang roengz aen guenqvax hung bae. Aen guenqvax hung neix cang ndaej 10 gaen lauz baedauq. Hoeng, gou soqlaiz mbouj raen ndawde miz lauz cang rim gvaq, ceiqlai dwg byongh guenq yienghneix ndwi. Aiq dwg daxboh mbouj miz cienz lai cawx baenzneix nohhajmou dauq ba.

Daxmeh dawz aen guenqlauz hung neix yo haeuj ndaw rug de bae, yo youq gizdieg vunz byaij mbouj daengz, de lau byawz mbouj siujsim dwk vaih guenqlauz neix bae. Guh sat gijneix le, daxmeh youh byaij dauq henz rek, de lumj rox guhfap nei, mbouj rox daj gyawz aeu ndaej vanj haeuxam ndeu okdaeuj, dauj roengz ndaw rek bae. Ndaw rek miz di gvemqhaj soiq, haeuxam caeuq de caemh ceuj, naed haeuxam miz lauz dumx le couh mbouj doxnem lo, naed dangq naed, lij cab miz gvemqhaj soiq dem, naednaed lumj naed haeuxgim nei, youh hom youh ndeiyawj. Vanj haeuxam neix, dou 4 beixnuengx mwngz gwn gaemz ndeu, gou gwn gaemz ndeu, hix mbouj doxceng, gou gwn gaemz le riuhehe ndenq hawj boux laj, mizfeih dangqmaz, hojsik noix lai, gwn mbouj gaeuq dungx ne, cij mboujgvaq ndaej bak hom ndwi. Gij feih gij ciengzgingj neix gou ciuhvunz nanzlumz.

（caengz sat）