Youq Vuzcouh, vwnzva meh- duzlungz (baihlaeng cungj heuhguh mehlungz) miz haujlai nanz lo, vunz ndawbiengz simsaenq mehlungz caeuq gingqbaiq mehlungz, aeu neix guhdaeuz swnjcienz vwnzva meh- lungz. Vuzcouh miuhmehlungz youq Ciuhbwzsung mboengq hainduj couh miz vunz cauhlaeb, aen miuh neix baenz giz bingzdaiz naekhung hawj vunz ndawbiengz daihdaih swnjcienz vwnzva mehlungz caeuq guh hozdung baiq mehlungz.

Ciuq vunz ndawbiengz cienz- gangj, mehlungz dwg bouxmehmbwk geizheih ndeu, de heuhguh Vwnh Au. De baez doekfag le, couh miz byoem ndaemnetnet raez cik lai bae, goetndang hung dangqmaz, fajnaj gyaeundei raixcaix. De lij miz simhoz hawj vunzbiengz engqgya in’gyaez, de baenz vunz simsoh hozndei; de lij iq couh guhmieng naeuz：Yaek haenqrengz hawj ndawbiengz youq- ndei, coengh vunzbiengz guh saehndei. Youq mboengq lij oiq, Vwnh Au riengz bohmeh daengz Guengjdoeng Cauging Yezcwngz youq roengzdaeuj, baengh daemj- baengz dwkbya gwn. Daengzlaeng, Vwnh Au daiq gyoengq beixnuengx mbanjranz hwnj bya roengz doengh, hai reih guh naz, gaemguenj caemh- caiq dingj gij cainanh raemxrongz Dahsihgyangh, hai uk haenqrengz hawj vunzlai vuenyungz, hawj ndawbiengz ndaej onjndei, neix de ndaej vunzlai haeujcoengh couh baenz bouxdaeuz Canghvuzcuz. Youq gaxgonq gunghyenz 211 nienz lig- gaeuq bet nyied cibngux, Vwnh Au yaek bae gingsingz lo, de daj Yezcwngz naengh ruz ginggvaq Vuzcouh bae Gveilinz, youq gyang- roen baenzbingh lo couh deng dauq daengz Yezcwngz le dai bae, ciuh vunz ndaejgyaeu 79 bi.

Ciuq vunz cienzgangj de ciengx haj duzlungz, haj duzlungz neix maj- hung le, de youh baengh gyoengqde hemq rumz heuh fwn, hai bya nda raemx, ceiqleix Dahsihgyangh, hawj vunzlai souh’ik, neix de ndaej heuhguh mehlungz. Daj Ciuhcinz daengz Ciuhcingh, gak boux vuengz- daeq cungj fung cwngheuh hawj mehlungz, vunzbiengz gingqbaiq mehlungz, vunzlai yienghneix guh couhdwg siengjmuengh gvaq ndaej onj gvaq ndaej ndei. Vunz ciuhlaeng vihliux geiqniemh mehlungz, couh youq ranghdieg aeu Guengjdoeng Cauging Yezcwngz caeuq Guengjsae Vuzcouh guh daeuz, youq ranghdieg henz Dahsihgyangh caeuq daengx guek gak dieg cauhlaeb haujlai miuhmehlungz. Mehlungz youq ranghdieg Dahcuhgyangh, daegbied youq Yanghgangj Aumwnz, mizmingz dangqmaz.

Ngoenzseng mehlungz, dwg ngoenz vunzlai geiqniemh ngoenzseng mehlungz caeuq ngoenz mehlungz“hwnj mbwn”. Guh hozdung hoh ngoenzseng mehlungz miz“ngoenz- seng”caeuq“ngoenz hwnj mbwn”song mboengq. Ciuq vunz naeuz“ngoenzseng”dwg ngoenz mehlungz doekfag, vunzbiengz dingh liggaeuq ngux nyied cobet guh ngoenzdaeuz, daj coit daengz cocib gungh cib ngoenz neix, cungj dwg mboengq“hoh ngoenzseng”; ciuq vunz naeuz“ngoenz hwnj mbwn”dwg ngoenz mehlungz“hwnj mbwn”, dingh liggaeuq bet nyied cibngux guh ngoenzdaeuz, daj cibseiq daengz cibloeg gungh sam ngoenz neix, cungj dwg mboengq“hoh ngoenz mehlungz hwnj mbwn”. Guh hozdung“hoh ngoenz mehlungz doekfag”vunz ceiq lai, hix ceiq nauhyied. Daengz ngoenzdaeuz hoh mehlungz doekfag haenx, miz haujlai hekyieng(boux siuyieng baiq mehlungz) daj duenh baihgwnz ranghdieg Dahcuhgyangh baugvat Baksaek、Lungzcouh、Namz- ningz、Liujcouh、Gveilinz、Gveigangj, duenh baihlaj ranghdieg Dahcuh- gyangh baugvat Guengjcou、Yangh- gangj、Aumwnz daengj daeuj, gyoengqde sam haj boux baenz gyoengq roxnaeuz gyoebcomz baenz“aenduenz (aendoih) hoh mehlungz doekfag”, daeuj yawj caeuq baiq mehlungz. Youq mboengq guh hoz- dung hoh mehlungz doekfag, gyoengq hekyieng mbwkmbwk saisai cungj baiq mehlungz simcingh aeueiq dangqmaz, miz vunz soengq hawj ndangdaenj mehlungz, miz vunz hawj cienzyieng cienzyouz, miz vunz cawx siengq mehlungz caeuq mbaw fug, lij miz vunz soengq doxgaiq gim vunz raekdawz haenx, gaenxmaenx dangq- maz.

Bi 2007, ngoenzseng mehlungz Vuzcouh ginggvaq Gvangjsih Boux- cuengh Swcigih Yinzminz Cwngfuj baecinj, ndaej liedhaeuj daih’it buek swcigih gaep feihvuzciz vwnzva yizcanj mingzloeg.