Vangz Bwnh dingonq ngamq yamq haeuj bangunghsiz, couh sing goksadsad hemq naeuz:“Miz heiq yawj!” Hemq sat, lwgda coh gyoengq doengzsaeh baenqloekloek. Geij boux doengzsaeh ngaezngwdngwd cim de.

“Gijmaz? Gip ndaej ngaenzbau ha?” Dah doengzsaeh heuhguh Caij- moiz dwg boux simsoh bakbyaengq he, de nyaenx mbouj ndaej haibak couh cam.

“Gijneix maz……” “Mwngz duz roeglaej neix, heuh cici ceuceu. Vaiq naeuz! Caiq mbouj naeuz, buet cenj raemx hawj mwngz.” Caijmoiz fwngz gaem cenjraemx, yaek coh Vangz Bwnh buet gvaqbae.

Daegleix cingq uet daiz nyaengq- foedfoed, seizneix hix ngiengxnaj hemq naeuz:“Buet raemx coh de, yawj de naeuz mbouj naeuz.” Geij boux doengzsaeh hix swnh bak riengz hemq.

“Baenz, baenz, gou naeuz.” Vangz Bwnh nap hoz naenx sing naeuz:“Geij ngoenz neix, youq gokgai buhingzgaih, gou fatyienh, miz meh- buz gaujvaq ndeu……”

“Hai, gou laihnaeuz dwg mwngz fatyienh vunzgwnzmbwn la.” Caijmoiz gat vah de naeuz.

Vangz Bwnh naeuz:“Neix mbouj dwg meh gaujvaq bingzciengz ndeu.”

“Seizneix raen gaujvaq miz maz citgeiz. Ngoenzhaenx, gou byaij gvaq henz ndang goeng gaujvaq he, de iet fwngz cam gou aeu cienz, gou naeuz gwnz ndang mbouj raek cienz, mbouj liuh daengz, goeng gaujvaq sikhaek ndenq gaiq baiz wveizmaj veihsin ndeu okdaeuj, hawj gou riu mbouj daej.”Caijmoiz gag gangj gag riugek- gek.

Daegleix nyaeuq ndaeng naeuz:“Sinhvwnz mbouj dwg miz bauqnaeuz ha, miz vunz baengh guh gaujvaq aeu cienz, bi vaq ndaej 20 lai fanh, youq mbanjranz hwnq ndaej 3 caengz laeuz. Doengxngoenz buh vaihvet, doengz- haemh cet gwn laeuj.” Daegleix damzbyoedbyoed: “Seiqgyaiq bienq lo, bouxsoh gwnvi, bouxgan gwnbiz.”

Vangz Bwnh swnh vah naeuz:“Gou ngeizvaeg, mehbuz neix couh- dwg cungj vunz yienghneix.” De lwnhnaeuz, mehbuz gaujvaq neix buhvaq yienznaeuz gaeuq di, hoeng mbouj mbaj mbouj uq, faj fwngz de hix mbouj lumj gij gaujvaq wnq ndaemndadndad：“Mehbuz neix couh- dwg cungj vunz cienmonz guh gaujvaq baenz fouq haenx. Sou saenq mbouj saenq?” Vangz Bwnh deuqnyex naeuz.

Caijmoiz bonjlaiz hix dingqnyi gij saeh citgeiz neix gvaq, hoeng deng Vangz Bwnh yienghneix baez gig, gij beizheiq ceng’ak aeuhingz de doq hwnjhoz fodfod, nyengh yaek caeuq Vangz Bwnh euqvang gvaqyinx. De doq bakgeng hoizdap:“Mbouj saenq!”

“Doj mbouj doj?” Vangz Bwnh iet lwgfwngz okdaeuj.

“Doj couh doj, duzgaeq lau duzroeg ha.” Caijmoiz riugekgek cam, “Doj gijmaz?”

“Gou daeuj guh bouxbuenq.” Daegfap sikhaek byaij gvaqdaeuj, ndwn youq cungqgyang song boux de, yaengx fwngzgvaz naeuz:“Bouxlawz saw, haemhneix cingj geij boux raeuz gwn donq ndeu.”

“Baenz! Baenz!” Caezgya bek- fwngz gopgop, angqriu haha.

Roengzban le, geij boux haux- seng doengzcaez coh gwnz gai byaij bae. Daeuj daengz buhingzgaih, youq gokgai, caen raen mehbuz gaujvaq dahraix. Gyoengqde byaij daengz henz ndang de, siengj cazyawj de dwg caen roxnaeuz dwg gyaj gaujvaq. Caenh raen gwnzdeih baij miz mbaw ceijhau ndeu, gwnzde aeu maegndaem sij naeuz—— “Goenggvan bingh naek, ra cienz ywbingh, gouz gak boux beix- nuengx nyok cienz gouqmingh.” Gij vunz byaij gvaq henz haenx, deih mbouj deih ndek cienz roengz aen vanjdiet mehbuz bae. Yienznaeuz geij maenz geij gak, mbouj suenq hung, hoeng ndaw vanjdiet cix coux rim lumj vanjbyaek nei. Mehbuz gaujvaq doq ngaekgyaeuj sigsig, doq damzyaeng sebseb:“Docih mwngz, vunzndei, goenggeq baujyouh mwngz.” Gyoengq hauxseng daengx da mbouj laep cimyawj de. Hoeng gyoengqde saet- muengh lo. Mehbuz gaujvaq gij byoem nyungqnyatnyat de gyuemluemz buenq aen naj, de da mbouj hai, naj mbouj ngiengx, lij lumj miz di najmong nei, hawj vunz yawj mbouj cingcuj aen naj de. Gyoengq hauxseng cij ndaej byaij gvaq vang bae deq de deuz. Mbouj geij nanz, mehbuz gaujvaq sousib ndei gij hongdawz de, riuj aen daehsuliu coh rog gai byaij bae. Gyoengq hauxseng mbouj gyae mbouj gyawj gaenriz baih- laeng.

30 lai faen cung le, mehbuz byaij daengz mbanjndawsingz. Sawqmwh, mehbuz ndonj haeuj ndaw diengzhaex henz gai bae. Mbouj geij nanz, mehbuz okdaeuj lo. Caezgya baez ngonz, doeksaet yat, danghnaeuz mbouj dwg vunz noix byaij roen, mboujnex gyoengqde cungj nyinh mbouj ok de lo. Caenh raen mehbuz gaenq vuenh dauq buh seuqsad ndeu, byoemgyaeuj hix roi ndaej bingzcubcub, laeng- gyaeuj lij hot baenz doqbyoem ndeu, vunz lumj oiq baenz geij bi nei.

“Baenzlawz yiengh? Cejcaijmoiz, cienz raek gaeuq caengz? Mbouj youqgaenj, miz cihfuzbauj, miz veihsin hix ndaej.” Vangz Bwnh naj riuyaen- gyaeng liuqda Caijmoiz.

Caijmoiz ngawhngwd lo, bak ajngobngob. Geij boux doengzsaeh hix yaepda dedded.

Caijmoiz riuhehe mbwnjbak naeuz: “Mwngz gaej daekeiq caeux lai, caiq yawj roengzbae.”

Mehbuz coh luengq gai baihndaw byaij bae, yied yamq yied riengj. Daengz bakdou fungh ranz iqet ndeu, de mbon seiz hai dou le, couh cigsoh yamq haeuj ranz bae, dou hix mbouj gven doxdauq.

“Gaej yawj lo, doiqdeuz, bae bouqhaeux.” Vangz Bwnh bibi fwngz, rag Caijmoiz couh byaij.

“Gaejbah! Haeujbae yawjyawj.” Caijmoiz dwg boux mbouj yungzheih nyinh saw ndeu, de cukcak faj fwngz Vangz Bwnh, doq yaek roemx haeuj ranz bae.

Daegfap ragdawz de:“Gaej gaenj, mbouj ndaej gag roemx ranz vunz, deng famhfap bw.”

“Couh yienghneix cuengq de deuz la.” Daegleix hujheiq dengdeng, “Gij vunz guhyaeuh neix, yaeuh vunz aeu cienz, yaeuh vunz saenq de. Nanzdauh lij hawj de caiq bae yaeuh vunz dem? Mbouj ndaej, dou yaek ra raen baengzgawq bae bauqgingj.”

“Yienghneix ba, raeuz bae henz dou damqdingq caiq naeuz.”Vangz Bwnh hozunq naeuz.

Geij boux hauxseng cang guh yiengh ra vunz, laeglemx byaij dep henz dou, ngengrwz caeg dingq vunz ndawranz gangj vah.

Gvaq yaep he, ndawranz cienz ok gij sing sisi sebseb, lumj miz vunz hwnqcongz.

“Meh daeglwg, ngoenzneix ndaej saekdi lwi?” Gij sing goenglaux ndeu cam naeuz.

“Ai!” Mehbuz gongz gaemz heiq ndeu, “ndaej di suenq di lu, cungj maenh gvaq gwn gij cienzlwedhanh daeglwg. Mboujnex, ngoenzlawz cij ndaej rom gaeuq cienz, ngoenzlawz cij ndaej bae yw gij bingh mwngz.”

“Dwgrengz mwngz lo, vaiq bae swiqswiq, daeglwg yaek daj dieghong hwnqranz dauqma lo, gaej hawj de rox raeuz bae guh cungj saeh neix, de aeunaj raeuh, lau vutnaj vaihmingz.”

Dingq daengz gijneix, geij boux hauxseng doxcim myoegmyoeg. Caez- gya caemrwgrwg byaij doxdauq, saek- naj cungj mbwng’yaeng’yaeng.

Vangz Bwnh yaengx sang song fwngz, riuhehe naeuz:“Gou saw lo.” Yaemhywx yaephe, de youh naeuz:“Mboujgvaq……”

“Mwngz gaej dajlaih.” Caijmoiz riugekgek daeuq de.

“Gou miz aen genyij ndeu, mbouj rox sou nyienh mbouj nyienh haeuj rwz?” Vangz Bwnh naeuz.

“Miz roet couh cuengq, miz vah couh gangj. Mbwtmbwt mbwjmbwj guh gijmaz.” Daegleix najsaep sadsad, de gag geizheih hozgaek.

“Ranz vunz neix caen cojgvaq, mboujnex, gou dawz 500 maenz cienz yaek cingj hek haenx gien hawj de, baenz lwi?”

“Baenz ha, gou hix miz yiengh naemjfap neix.” Caijmoiz muengh- muengh caezgya, sangjswtswt naeuz:“500 maenz daiq noix, raeuz moix boux caiq comz di dem.”

Yienghneix, geij boux hauxseng youh couqsoq cien maenz cienz, gien hawj ranz mehbuz lo.