Cietcuzcu youh heuhguh“ciet- daznuj”“cietyahcoj”“cietngeihgouj”“bi Yauzcuz”, dwg ngoenzciet Yauzcuz cojcienz roengzdaeuj, cienz- lah youq Bahmaj、 Dava、 Duh’anh、Majsanh、Bingzgoj、Lungzanh daengj dieg. Ngoenzciet neix dwg ngoenzciet Yauzcuz gvaq ndaej ceiq hungmbwk, daj Ciuhsung hainduj cienz daengz seizneix.

Cietcuzcu aeu ngoenz liggaeuq haj nyied ngeihgouj guh ngoenzciet daeuz. Bingzciengz bi gvaq mbat ndeu, mbangj seiz sam daengz haj bi gvaq mbat ndeu; gingciengz gvaq sam ngoenz bae. Cietcuzcu baenzlawz miz ne? Neix ndawbiengz miz haujlai aen gojriuz, ndawde miz sam aen goj daeuz： Aen daih’it dwg geiqniemh ngoenzseng yahcoj“Milozdoz”; aen daihngeih dwg geiqniemh gij goeng- lauz gvendaengz bouxvuengz Yauzcuz Lanz Luz nyingz doenghgij daeng- ngoenz lai doek bae; aen daihsam dwg geiqniemh ngoenzgeih bouxakhaenq minzcuz vih yinxhaeuj cehhaeux couh deng daimingh bae.

Gvaq ngoenzciet neix ne, doenghgij hozdung daeuz dwg guh hozdung baiq cojcoeng baiq sienbaed、roq gyongluengz、ciengq go goengcoj daengj, aeu neix daeuj hawj vunz Yauzcuz mbouj lumz gij lizsij gyaenanz、gij cojcienz ronghlwenq, gya rengzcomz bonj minzcuz. Lij banh miz hozdung doiq fwen、cit bauq- ciengh hwnj mbwn、dwkgyangq、doj roegmoiz、daeuqmax、nyingz naq daengj dijyuz ndawbiengz. Liuxle, gyoengq vunz Yauzcuz cungj doxcomz gwn ngavz gwn laeuj. Mboengq haenx, ranz ranz cungj gaj gaeq gaj yiengz, bouxboux cungj ok laeuj ceiq ndei, beixnuengx mbanjranz cungj gwn laeuj fiz bae.

Ngoenzciet guh hozdung baiq cojcoeng baiq sienbaed, bouxdaeuz ndaw mbanj gaemguenj. Doxgaiq baiq cojcoeng sienbaed, aeu gyaeujmou guhdaeuz, lij coq haeuxnaengj、laeujraemx daengj, neix dwg lwnh vunzlai naeuz aen yizsi neix dwg yizsi ceiq ndei ceiq hungmbwk. Youq ranghdieg Yauzcuz, ndwenngux ndwenloeg dwg geiqciet ceiq youq- gaenj gvendaengz haeux henjbaenz. Ciuhgeq vunzraeuz baengh mbwn gwn ngaiz, deng gouz duzsien duzbaed daeuj bauj reihnaz ndaej sou lailai, neix daih cienz daih roengzdaeuj lo. Yienghneix le, cietcuzcu couhdwg gangj vunzraeuz caeuq mbwndeih doxlwnh, gangj vunzraeuz ndiepgyaez deihnamh.

Baiq cojcoeng sienbaed liuxle, gyoengq beixnuengx Yauzcuz roq gyongluengz、angq diuq foux- gyongluengz, lwnh cojcoeng vunz- laeng gvaq ndaej ndei, caeuq cojcoeng caemh angq ndaej sou lai; gwn laeujndei homvan, eu fwen ndeidingq, boq loxlez angqyangz. Youq ndaw mbanj, hozdung aen dam aen yienj. Vunzlai ciengqgo diuqfoux, langh sim angqyangz. Haujlai vunz- hek gyae’gyawj daeuj caeuq beix- nuengx Yauzcuz doxcomz giz ndeu, bouxboux vuenyungz angqyangz.

Bi 2007, cietcuzcu Yauzcuz ginggvaq Gvangjsih Bouxcuengh Swcigih doengzeiq, ndaej liedhaeuj daih’it buek swcigih gaep feihvuzciz vwnzva yizcanj mingzloeg.