Caengz daengz mwh biujyienj, gak doih daeuj camgya biujyienj haenx lij naengh youq dieghongh caj.

Gyoengq lwghag gou cungj fwngz dawz soujgih, miz boux ngaemgyaeuj yungh veihsin nem vunz cejgoj, miz boux gag ingjsiengq fat “gienbaengz- youx” bae guhcaemz. Gou lau lwgda in, mbouj gamj loengh soujgih nanz lai, couh naengh youq henzrik gag doeng yawj sae ngonz.

Bang hagseng naengh youq gyawj dou, baez yawj couh rox dwg bang lwgnyez lajmbanj, vunz maqhuz lai, gyoengqde aiq baez daih’it ndaej raen cungj ciengzmienh neix, bouxboux cungj maengxangq dwk hemqsiegsieg.

Ngoenzneix yienh gyauyuzgiz caeuq yienh gvangjbo densidaiz doxgap banh aen doxdax biujyienj vwnzyi cezmuz neix. Gak dieg miz haujlai hagdangz cujciz hagseng daeuj biujyienj, aen hagdangz Daemzgvangq Cunghsinh Siujyoz dou couh baij gou daiq doih lwghag daeuj camgya. Vihliux camgya aen doxdax neix, hagdangz dou caeux youq buenq bi gonq couh guh cunjbei lo, daj raiz swz、sij guk、bien foux, genj vunz baizlienh cungj roengz goengfou laux, caenh- liengh guh daengz ceiq ndei. Doengh boux lwghag ndaej genj daeuj camgya cezmuz neix ciengq go ciengj ndaej daegbied dawzdiuh, diuqfoux diuq ndaej daegbied ndeingonz. Coenz vah ndeu, dou gag roxnyinh ngoenzneix gyoengqde biujyienj ndaej ndei, gig mizmuengh aeu ndaej ciengj.

Gyoengq hagseng hemqsiegsieg youq henzgyawj haenx mbouj daih rox sangdaemq, lumj uk mbouj gaeuq rim nei, gangj vah bupbup bapbap, cauz- humhum, nukrwz dangqmaz, mbouj rox lau nyex vunz haemz vunz mbwq. Codaeuz gou cungj mbouj bae haeuj- rwz gyoengqde gangj maz, hoeng gij sing gok dwk haeuj gyaeuj haeuj rwz daeuj. Caek rwz baez dingq, laxlawz gyoengqde dwg gangj Vahcuengh, yienznaeuz nem vah mbanj dou mbouj daih doxdoengz, gou hix roxyiuj dingzlai. Gou cengdi yaek goemq bak riu, gyoengq lwgnyez dojdatdat neix aiq ngoenzngoenz cungj dwg youq bakcauq mongj daeuh, daeuj daengz ndaw singz lij gangj Cuengh subsub.

Seizneix, aen soujgih gou yiengj hwnjdaeuj, gou mbon okdaeuj baez yawj, dwg yaucangj dwk daeuj. Gou ciep le yaengx gvaq henz rwz bae dingq, aenvih gizneix vunz cauz gok lai, gij sing ndaw soujgih cungj mbouj daih nyi ndaej cingcuj, gou yaek siengj coh bang hagseng hemqsiegsieg haenx vad fwngz heuh gaej cauz lai yingjyangj gou ciep dienhvah, fwt youh ngeix naeuz caeuq gyoengq lwgnyez lajmbanj daeuj gangj cungj dauhleix saivaih rengz, couh gag byaij ok baihrog bae cij dingq dienhvah. Laxlawz dwg yaucangj dou cam gij cingzgvang dou, de hix caen gvaqsim lai ha!

Gou ndaep soujgih le dauqbae ra dieg naengh, mwh byaij gvaq henz ndang bang hagseng haenx, boux lauxsae daiqdoih de coh gou riunyumj, gou siengj mbouj swt de cix lau de naeuz mbouj roxsoq, cij ndei cengq- gengz ngaekngaek gyaeuj. De riuhehe aeu bujdunghva dongx gou:“Mwngz dwg lauxsae ba? Dou daj Nazcwz Siujyoz daeuj, sou daj gyawz daeuj?” Gij bujdunghva de “haeunamh” gig youqgaenj, coeg rwz yaek dai. Hw, lauxsae lijdwg cungj suijbingz neix, gij hagseng de mbouj rox yaez daengz gyawz bae lo.

Gou caen gik leixlangh de, mboujguenj de vunz gijmaz Nazcwz Nazvaiz, cij citcangcang han sing “Daemzgvangq” ndeu, couh mbouj dingz saek seiz couh byaij gvaqbae.

Boux lauxsae haenx sikhaek youq baihlaeng yut hot fwen ndeu daeuj daeuh gou:

“Nazcwz dou mbouj baenz,

Caenh hozhaenz Daemzgvangq,

Ngoenzneix sim angqlangh,

Nem Daemzgvangq doengzdaiz.”

De aeu fwen daeuj daeuh, gou bae gyawz lij gamj wt saek sing dem? Gou hanh biusadsad, saedcaih mbouj rox guh maz fwen daeuj han ha. Caen dwg “roeg ngoemx mbouj oksing, dangq gamz gim ndawbak, gyoengq roeg swenjvagvag, gou gag goemz rieng deuz.”

Ciepdwk ndaek lauxsae haenx lij laebdaeb eu geij hot fwen, gou caiq hix fouzsim bae dingq de eu maz, dandan ndaejnyi gyoengq hagseng de riuhuhu dopfwngz robrob hwnjdaeuj. Gou fwt roxnyinh dujrwz hwngq- fwdfwd, “dangq deng bok buhvaq, raen nyaenq naj nyaenq ndaeng, lumj famhsaeh deng gyaeng, gag haemz dungx haemz saej.” Gou guh lauxsae nyaenxlai bi daeuj, neix dwg baez daih’it youq dangqnaj vunz mbouj ndaej naj ha. Mwhneix, gou sawqmwh ngeix hwnj daxgoeng gou caeuq daxboh gou. Dingqnyi doenghbaez daxgoeng gou daxboh gou cungj ak guh fwen, youq daengx doengh Daemzgvangq cungj gig mizmingz. Danghnaeuz gou ndaej swnjciep gij goengfou daxgoeng daxboh gou, ngoenzneix ndaek lauxsae neix guhlawz gamj dwk fwen daeuj nyex gou? Ra dai ndaej!

Gak doih doxdax biujyienj hainduj lo. Aen cezmuz daih’it dwg doih dou, gyoengq lwghag ciengq diuz go hagdangz dou gag raiz guh ndeu, gyoengqde hwnj gwnzdaiz fazveih ndaej haemq ndei, gangj Vahgun hix gangj ndaej maqhuz biucinj, gou gag yawj gag rimhoz. Hoeng, ciep roengz- daeuj hawj gou doeksaet yat, gij doih wnq hwnj daiz cungj dwg aeu Vahcuengh bonjfaenh bae biujyienj, miz saek miz feih, mizyinx dangqmaz. Daegbied dwg doih Nazcwz Siujyoz, aenvih ndaek lauxsae de aeu fwen daeuj dwk gou hawj gou vutnaj gvaq, gou daegbied haeujsim bae yawj hagseng de yienj ndaej baenzlawz yiengh.

Gyoengq hagseng de faen song cuj hwnj daiz doiq fwen, baihneix cam baihde han, lumj youq hawfwen ndawdoengh nei, mizyinx raixcaix. Gou dawz soujgih daeuj loeg ndaej duenh ndeu:

Cam:

Cungj naeuz cibgouj daih,

Biengz raeuz gaij baenz ndei,

Doengh boux gungz boux yaez,

Guhlawz bae coh fouq.

Han:

Cwngcwz guh baujcang,

Gungcanjdangj guh daeuz,

Canjnieb miz ngaenz aeu,

Raeuz bouxhoj baenz fouq.

Cam:

Raemx doengh bing couh fanj,

Yaek hwnj hamq guh haw,

Nou caeg gwn hoj dawz,

Guhlawz ndaej an’onj.

Han:

Bingswt hwnj ndaej ak,

Rox gag lau duzgaw,

Duznou byaij gyang haw,

Bouxlawz raen cungj moeb.

Cam:

Gyoengq hengz yak guh rwix,

Gwih gwnz gyaeuj vunzlai,

Hangz vunz aeu cienzcaiz,

Miz haeuhdaiz bang cengq.

Han:

Gaej lau boux guh yak,

Gaej lau hak hengz manz,

Gijveij baez cazcam,

Bouxboux han mbouj ndaej.

Cam:

Hak rwix miz damjliengh,

Gamj cengq liengj cw mbwn,

Coengh vunzyak ciengj gwn,

Haih vunz haih sevei.

Han:

Dangjveij hoh cingqheiq,

Ceihleix guh ndaej baenz,

Dwk guk moeb nengznyaen,

Gizgiz raen mizyauq.

……

Gou mbouj ndaej mbouj cingz- nyinh gyoengqde ciengq ndaej mbouj loek.

Biujyienj sat le, boux cawjciz goengbouh gij cingzcik doxdax: Nazcwz Siujyoz aeu ndaej daeuz daengj ciengj…… Dou Daemzgvangq Cunghsinh Siujyoz ngamq ndaej aen “ciengjmaenhndei” he. Boux bingzveij lauxhangz ndeu guh diemjbingz naeuz:“Baez doxdax neix, dingzlai doih cungj ndaej aeu Vahcuengh daeuj yienj, yienghneix ndei, miz daegsaek, yied dwg duh minzcuz yied dwg duh seiqgyaiq, va dog mbouj baenz cin, va rim doengh cij suenq……”

Dou saw lo, gou sim fug hoz fug.

Mwh naenghci dauqma, gyoengq lwghag caemrwgrwg, mbouj miz saekdi cingsaenz. Gou gag ngeix: Caj gou baema riengz daxboh hag guh fwen sug le caiq son hawj gyoengq lwghag, ceng aeu baezlaeng mbouj saw!