Mboengqneix, youq aen ciengz ciengx gaeq ndaw ndoengfaex Denzlinz Yen Lucwngz Yauzcuz Yangh Fungh- fangz Cunh, baenz bang baenz bang gaeqdoj byaij bae byaij dauq, youq ndaw ndoeng roxnaeuz diengzgaeq ra gwn. Baez raen vunzseng, couh riengj- ret buet deuz haeuj ndaw ndoenglaeg bae, sing gaeq hemq raq dem raq.

Funghfangz Cunh youq baih- doengnamz Denzlinz Yen, ciengzgeiz doxdaeuj, aen cunh neix canjnieb gezgou haemq dandog, cizdij ginghci hwngfat doeklaeng, vunzguhnaz laisou menh. Bi 2016 ndwen 8, Funghfangz Cunh laebbaenz Aen Hozcozse Cien- nieb Dajndaem Dajciengx Fungh- dwngz Denzlinz Yen, haenqrengz daj- ciengx caeuq gai doihduz miz daeg- saek, cujyau dwg youq ndaw ndoeng ciengx gaeq. Ginggvaq hwngfat ca mbouj geijlai 3 bi, aen dieggoek daj- ciengx neix mboujduenh guhhung. Daengz seizneix, Funghfangz Cunh daj ceiq nduj 7 aen diengz ciengx gaeq guh daengz seizneix miz 56 aen, ndawde miz 7 aen cingq hwnjguh, gaenq daiq- doengh caeuq hwngfat ranz guh daj- ciengx 43 ranz, ndawde ranzgungzhoj 19 ranz. Bi 2018 mued gai 42.5 fanh duz, bi souhaeuj 250 fanh maenz, vunzlai gungzhoj Funghfangz Cunh ngoenz miz gvaq ngoenz, youq rungh- bya byaij ok diuz roen vut gungz baenz miz ndeu.

Youq ndaw ndoeng ciengx gaeq dangguh Denzlinz Yen “5+2” daegsaek canjnieb ndawde loh ndeu, youq mwh bangdoi vut gungz gunggeng fatok coz- yung gaenxmaenx. Geij bi neix daeuj, aen yienh neix youq ndaw ndoeng ciengx gaeq hwngfat onjdwt, yinx haeuj Mingzsiengz、Fufung daengj aen gunghswh dajciengx gikfat gij rengz youq ndaw ndoeng dajciengx, fatok gijndei dinfwngz、guenjleix、hawciengz daengj fuengmienh aen gunghswh daj- ciengx, haenqrengz doigvangq gij vunqsik guenjguh canjniebvaq “gungh- swh+dieggoek+hozcozse+nungzhoh”. Bi 2018, Denzlinz daengx yienh youq ndaw ndoeng ciengx gaeq gai daj ceiq nduj 5000 duz guh daengz 650 fanh duz, gyaqcienz dij 3000 lai fanh maenz, baenz gij canjnieb cujyau vunzlai gungzhoj vut gungz baenz miz.

(Vangz Yengingz)