Laizbinh Si youq ranghdieg gyang Guengjsae, ga Dahhoengz lae gvaq ndawde, dwg ranghdieg daeuz Bouxcuengh comzyouq ndeu. Laiz- binh Si doenghgij vwnzva baenzgyoux Bouxcuengh aeu miuhbaenzgyoux guh doenghyiengh gyaengcoq, aeu gojsienbaed baenzgyoux caeuq sim- saenq vunz guh daeuz, baugvat siengqrin baenzgyoux、daegbeix dah- nuengx baenzgyoux、aencung baenz- gyoux、yizsi baiq baenzgyoux、cohdieg baenzgyoux、fwen haenh baenzgyoux、heiq baenzgyoux daengj. Youq ndaw Laizbinh Si, seizneix lij miz haujlai miuhbaenzgyoux, daeg- bied dwg Vujsenh Yen ranghdieg song henz Dahdunghyangh, gizgiz cungj miz miuhbaenzgyoux, ca- mboujlai mbanjmbanj cungj miz, doxrangh doxlienz, deihdaendaen bae, neix youh daengx guek dieg wnq mbouj caengz raen.

Daj ciuhgeq daeuj, ndawbiengz Laizbinh couh cienzlah aen goj“daegbeix dahnuengx baenzgyoux”miz vunzraeuz：Ciuq vunz riuz youq ciuh geqgeq de, raemx dumx biengz caez, vunzraeuz yaek dai liux, cijmiz daegbeix dahnuengx baenzgyoux song boux neix ndoj youq ndaw gyoux fouz youq gwnz raemxrongz, ndaej lix lo, song daegbeix dahnuengx neix giet- vaen baenzgya liuxle miz ndaeknoh lumj rinbaenz ndeu, neix songde faeg rinbaenz suenz le couh vanq coq gyang doengh, couh bienqbaenz vunzgyoengq gak dieg, neix couh haicauh seiqgyaiq, youh laebcauh mbanjranz moq. Vahcuengh heuh song daegbeix dahnuengx neix guh“baenzgyoux”, “baenz”dwg rinbaenz, “gyoux”dwg lwggyoux, neix boux- roxsaw ciuq sing aeu gij sawcih Sawgun singdoeg doxgyawj daeuj geiq baenz“baenzgyoux”. “Rinbaenz、lwggyoux”, neix dwg gij eiqsei Vahcuengh ceiq gonq. Neix gangj ndaej sengdoengh, couhdwg lwnh vunzlai rox daegbeix dahnuengx baenzgyoux miz rinbaenz cauh’ok vunzraeuz daeuj.

Gyoengq canghmo dangdieg lij dawz doenghgij goj daegbeix dah- nuengx baenzgyoux ndoj gvaq cainanh raemxrongz、caiq cauh vunzraeuz neix bien baenz heiq《Raemx Ceh Doumbwn》, aeu Vah- cuengh daeuj ciengq. Youq Laizbinh Si, vunzlai gingq baenzgyoux guh bouxcoj caiq cauh vunzraeuz. Vunzlai dangdieg dingh moix bi liggaeuq ndwencieng roxnaeuz loeg nyied cibbet guh ngoenzseng baenzgyoux, gak mbanj cungj guh hozdung naekhung baiq baenzgyoux、ram siengq baenzgyoux youz mbanj. Doenghgij hozdung neix couhdwg aen hoihmiuh baenzgyoux Bouxcuengh ndaej dangguh feihvuzciz vwnzva yizcanj.

Doenghgij hongsaeh simsaenq baenzgyoux cawzliux miz miuh- baenzgyoux、baiq baenzgyoux、ram baenzgyoux cunzyouz, lij miz aen hozdung naekhung ndeu couhdwg yienj heiq canghmo Bouxcuengh《Raemx Ceh Doumbwn》. Cit heiq neix gangj aen goj gvendaengz raemxrongz dumx biengz le, daegbeix dahnuengx baenzgyoux gietvaen baenzgya caiq cauh vunzraeuz. Gojsienbaed《Raemx Ceh Doumbwn》miz ok bonj sawging canghmo ndawbiengz Bouxcuengh《Sawging Canghmo Baeuqroxdoh》. Ciuhmingz hainduj miz canghmo guhmoq seiz, aen goj neix ndaej liedhaeuj sawging canghmo bae; daengz Ciuhcingh mboengq doeksat caeuq Minzgoz mboengq hainduj, gyoengq canghmo youz ciengq loengh duzsienbaed bienqbaenz loengh hawj vunz angq, goj《Raemx Ceh Doumbwn》 youh daj ndaw sawging canghmo mbek okdaeuj, hwngfat baenz heiqcanghmo《Raemx Ceh Doumbwn》, youq ndawbiengz cienzciengq; daegbied dwg youq guh hoihmiuh seizhaenx yienjciengq, dwg cit heiq vunzlai gyaezmaij dangqmaz bae.