Daxmeh gou youq Namzningz Si Gih Yinzminz Yihyen yw bingh, aeu miz boux he buenx de. Daj de haeuj yihyen le, daegnuengx buenx de geij haemh, dahnuengx buenx de geij haemh, ciep daeuj couh lwnz daengz gou bae buenx de lo.

Daxmeh gou bineix ndaej 78 bi, vah gaeuq gangj mbouj loek, faex geq rag nduk, vunz geq uk vaih. Daxmeh gou ciengzseiz damz gyaeuj ngunh、daraiz. Couh lau de miz saek ngoenz baez laemx roengz couh caiq hix ndwn mbouj hwnj. Baezneix haeuj yihyen hix mbouj rox yw ndaej ndei mbouj ndei.

Ngoenzhaenx banhaemh roengz- ban le, gou caeuq mehyah guhdoih dap dungceh bae Namzningz, okdou gaxgonq, dahlwg daengq naeuz:“Dap dizsw bae daengz yihyen sai ngaenz caeuq seizgan lai, sou roengz dungceh le couh dap didez daengz aen can Sinhminz Lu roengz ci, cij aeu 4 maenz ngaenz couh ndaej. Daj aen cuzgouj B2 okbae, caiq riengz roen cigsoh byaij gvaq 3 aen daeng- hoengzloeg, aiq byaij 10 faencung couh ndaej daengz Gih Yinzminz Yihyen lo.”

Dahlwg lau dou dingq mbouj cingcuj, yawj loh mbouj mingzbeg, de lij veh mbaw doz he hawj gou daiq youq gwnz ndang.

Dungceh daengz Namzningz seiz, cingq doiq seiz roengzban, gwnz haw vunz bae ci dauq ndaetfodfod.

Byaij ok hojcehcan, gyoengq boux rag hek doxciengj gvaqdaeuj cam dou aeu mbouj aeu dapci, gou mbouj dingz dwk bi fwngz, mbouj dingz dwk bi gyaeuj, gvanbaz cigsoh coh aen can didez ceiq gaenh byaij bae.

Ndaw singz couhdwg ndaw singz, gwnz gai vunz ndaetfodfod, ndaw didez hix dwg vunz gveujfoenfoen, dou cawx ndaej biuq hwnj daengz ndaw dizdez seiz, ndaw ci gaenq dwg vunz ndaet ndaej mbouj miz giz naengh.

Gou gag naemj: Dahlwg naeuz couh song aen can, naengh didez faen lai cung couh daengz aen can he, miz mbouj miz giz naengh hix mbouj youqgaenj lo.

Yaephe couh daengz can dahraix lo, dou ciuq mbaw doz dahlwg veh itloh byaij baenaj.

Namzningz loh seuq faex heu, gizgiz dwg vunz, gwnz gai vunz byaij ci buet, nauhyied youh onjdingh, gou lau byaij loek roen, mbouj gamj yawj vunz yawj ci, roengzsim byaij roen yawj loh, aen daenghoengzloeg daih’it gvaqbae lo.

Seizneix mbwn fonxfubfub, gwnz gai daeng ronghsagsag, dou daeuj daengz aen daenghoengzloeg daih- ngeih, doiqnaj byag miz song diuz gai, diuzdiuz cungj dwg sohlitlit, byaij gvaq diuz gai lawz bae cij deng ni? Dou miz di dawz mbouj dingh cawjeiq lo, mehyah naeuz:“Mbouj rox couh cam vunz, byaij loek roen couh dwgrengz lo.”

Gou yawjyawj seiqhenz, dajsuenq youq ndaw gyoengq vunz ganj loh vuebvueb ndawde ra boux he cam roen, seizneix daenghoengz rongh lo, daihgya guh comz he ndwn youq caj daengloeg. Bien ndang gou ndwn miz dahsau aiq miz 20 lai bi he, de vunz sang ndang reux, noh hau naj maeq, daenj dauq vinjva raez ndeu, yawj hwnjdaeuj coengmingz youh roxsoq.

Gou dawz mbaw doz dahlwg veh okdaeuj, ndenq daengz doiqnaj dahsau neix cam:“Dahlwg, Gih Yinzminz Yihyen gvaq diuz gai lawz bae?”

Dahsau cim gou da he, naeuz:“Gou mbouj rox ne.”

Gou naeuz:“Mwngz mbouj dwg vunz Namzningz ha.”

Dahsau naeuz:“Mbouj dwg ne.”

Dahsau gangj sat couh cienq naj gvaq mbiengj he bae.

Daengloeg rongh lo, dou ciuq baihnaj byaij bae, ndawsim gag naemj: Cam vunz mbouj rox, doq byaij doq yawj, byaij loek caiq gangj.

Dahsau byaij youq doiqnaj dou, geu vinj raez de lumj mbawliux ndaw seizcin nei riengz gij yamq din de bi bae bi dauq, gij siengq neix gig maez vunz.

Mbwn yied daeuj yied laep, gou coi mehyah byaij vaiqdi, mbouj geij nanz dou couh byaij bae baihgonq dahsau neix lo, gou dauq laeng yawj da he, cingq caeuq de song da doxciuq baez he, de couh vaiqvid ngaemgyaeuj byaij roen, mbouj geij nanz de youh byaij youq baihgonq dou lo.

Dou gvanbaz couh yienghneix caeuq de mwngz yaep bae gonq gou yaep doeklaeng doxlwnz byaij baenaj. Daengz bakdou yihyen seiz, gou caen naemj daihsing doiq de naeuz “gizneix couhdwg Gih Yinzminz Yihyen, mwngz rox youq gyawz ha”, yawj de baenzlawz hoiz gou. Seizneix de dawz soujgih okdaeuj dwk dienh- vah, dou cijndei byaij haeuj yihyen bae, mbouj caiq leix de.

Dou daeuj daengz ranzbingh, daxmeh naengh youq bien congz yawj densi, de raen dou daeuj daengz, naeuz de ngamq gwn gvaq haeux- caeuz, cam dou ndaej gwn caengz, danghnaeuz caengz gwn couh vaiqdi okbae ra gwn, mboujnex, 8 diemj cung le, yihyen couh mbouj hawj vunz seizbienh haeujok lo.

Daxmeh youq yihyen ndaej cib- geij ngoenz lo, yawj hwnjdaeuj ndangdaej de gaenq bienq ndei lai lo.

Ndawranz miz vunz bingh, boux- boux cungj yousim, daxmeh daeuj ywbingh cibgeij ngoenz neix, lwglwg lanlan byawz ndaej daeuj yawj cungj daeuj caez lo, couh ngamq lw daeglwg gou Daeggyangz caengz ndaej daeuj yawj ndwi.

Daeggyangz youq Gvangjcouh guh hong, de naeuz nyaengq lai, baezneix couh mbouj ndaej dauq yawj daxbuz lo, de naeuz dahyoux de youq Namzningz, gaenq daengq dahyoux de ndaejhoengq couh daeuj yawj.

Gou cam:“Meh, Daeggyangz naeuz heuh dahyoux de daeuj yawj mwngz, de daeuj gvaq la?”

Daxmeh naeuz caengz raen miz saek dah daeuj gvaq.

Daxmeh vah ngamq sat, dahsau he couh byaij haeuj ranzbingh daeuj, gou baez raen couh rox dahsau neix couhdwg haxbaenh gou coh de cam loh haenx.

Mbouj rox dwg najnyaenq rox- naeuz byaij loh ndang cik lai, de naj hoengzfefe. De menh byaij daengz henz congz, cam daxmeh ndangdaej baenzlawz yiengh, bingh yw ndaej baenzlawz yiengh, de daengq daxmeh aeu onjsim ywbingh, ndaej gwn couh gwn lai di, hab ninz couh ninz lai di. De gangj sat le, ndenq aen hoengzbau he hawj daxmeh, sing saeq doiq dou gvanbaz naeuz:“Goeng’au mehsimj, sou menh youq nw, gou dauqbae hwnjban gonq lo.”

Gou caen naemj cam de dwg byawz, mehyah dawz dinbuh gou rag baez he, eiqsei mbouj hawj gou cam, gou coenz vah ringx daengz byai linx youh deng gyan roengz dungx bae lo. Gou mbouj rox dahsau neix nyinh mbouj nyinh ndaej ok gou couhdwg boux vunz haxbaenh coh de cam loh, ndawsim gou lumj ngamq gwn duz nengzgengz nei, mbouj rox baenzlawz gangj ndei.

Mehyah naeuz:“Dah neix aiq dwg dahyoux Daeggyangz luba.”

Gou naeuz couhdwg, daxmeh hix naeuz couhdwg.

Gou dawz saehcingz daj goek daengz byai lwnh hawj daxmeh nyi. Daxmeh naeuz:“Dahsau yienghneix, vunz gyaeu sim mbouj ndei, guh vunz cungj mbouj miz saekdi sim ndei baenz maz vunz, engq mbouj hab baenz lwgbawx ranz raeuz.”

Mehyah naeuz:“Gou raen dahsau yienghneix ndei, seizneix dauqcawq miz vunz yungh gak yiengh banhfap daeuj yaeuh vunz, de ukgyaeuj lingz, rox singj vaiq, danghnaeuz youq gwnz gai seizbienh caeuq vunz gangj vah, mbouj lau vunz cuengq yw deng yaeuh ha, dahsau yienghneix mbouj vei hwnjdangq.”

Danghnaeuz dahsau neix ngoenz- laeng caen baenz lwgbawx gou, gou caen miz di sim mbouj net. Mehyah youh vah ndongjndatndat naeuz aeu gij lwgbawx neix cij ndei. Dou song boux youq ndaw ranzbingh doxceng hwnjdaeuj, sing gangj yied daeuj yied sang, husw gvaqdaeuj geij baez, naeuz bouxbingh yaek yietnaiq, heuh dou gaej hemq lai.

Doeklaeng gou naeuz:“Gienh saeh neix aeu lwnh hawj Daeggyangz nyi, baenz mbouj baenz aeu guh yah, caih de gag dawzdingh.”