Sai:

Duzfungh caeuq duznyanh,

Mbouj luenh yamh hwnj roengz,

Ngoenzneix raeuz doxbungz,

Lumj daj mbwn doek daeuj.

Mbwk:

Saeceij caeuq geizlinz,

Caez doengz din doxdoiq,

Song raeuz ndaej guhdoih,

Van lumj oij caemj dangz.

Sai:

Haetneix gou okdaeuj,

Raen go’ngaeux hai va,

Nuengx lumj fungh mbin ma,

Youq gwnz nga godongz.

Mbwk:

Yamqdin daengz henz daemz,

Song fwngz gamq va’ngaeux,

Beix caensim daeuj caeuq,

Raeuz couh dox eufwen.

Sai:

Raen va hai gwnz ngeiq,

Suenq seizheiq gou hoengh,

Ngoenzneix daeuj doxbungz,

Lumj raen lungz gyang haij.

Mbwk:

Va dwg va gomienz,

Hai cien nienz mbouj baih,

Guhdoih ndei dahraix,

Gaej vaih aen sim nuengx.

Sai:

Nuengx naj nding lumj dauz,

Lumj youz cauj noh bit,

Siengj aeu dawh bae nip,

Mbouj rox cit naeuz van.

Mbwk:

Noh bit youz dwk gwnz,

Cijguenj gwn haeuj bak,

Beix eu nuengx couh dap,

Diemz lumj bak gamz dangz.

Sai:

Seizneix ndaej doxraen,

Caen lumj gwn noh hanq,

Baenz nanz mbouj ndaej gangj,

Coenz vah dij fanh ngaenz.

Mbwk:

Dak haeux youq henh daemz,

Goj ciengz raen roegdeih,

Ngoenzneix ndaej raen beix,

Seizheiq ndei haeuj ranz.

Sai:

Baenz nanz mbouj gwih max,

Mbouj rox max baeq bae,

Seizneix siengj lienh daez,

Bouxlawz bae yien cag.

Mbwk:

Max youq henz loh cuenh,

Maqmuengh ndaej cang an,

Dangh fukheiq raeuz ngamj,

Gwih ma ranz raeuz ciengx.

Sai:

Vah gou gangj yienghneix,

Aen simsaeh goj doengz,

Langh raeuz dai daengj soengz,

Hix aeu roengz aen gumz.