Bouxlaux mbanj gou maij yienghneix gangj: Boux vunz seiziq gwn gvenq gijmaz, daengz geq le de ciuqyiengh maij gwn gij doxgaiq haenx; boux vunz seiziq gangj gvenq vah maz, daengz geq le de gangj vah ciuqyiengh cab vah seiziq. Gou couh dwg boux vunz yienghneix, okrog bae geijcib bi, seizneix bienq bouxlaux le gangj vah lij cab vah mbanj dou. Geijcib bi gvaqdaeuj, gou cungj mbouj dauqma ndaw mbanj geijlai, bineix gvaq ciet “ngux it” ndaejhoengq, gou cij dauqma ndaw mbanj haemh ndeu. Mbanj gou youq dieg cungqgyang Guengjsae, dwg aen mbanj Cuengh ndeu.

Gangj daengz neix, bouxdoeg laihnaeuz gou mbouj doengz vunz lai lo, boux vunz lajmbanj cungj mbouj baema, dwg okbae ra ndaej gwn di le, bienqbaenz boux hag haeu haex yawjsiuj lajmbanj ha? Gou mbouj dwg cungj vunz neix nw. Seiziq gou nem bohmeh bae lingh aen yienh doegsaw, boh gou youq gizhaenx guh lauxsae. Seiz hung gou gauj ndaej daihhag daengz Namzningz doegsaw, daengz- laeng youh youq Namzningz guh hong baenzranz, yienghneix couh mbouj dauqma ndaw mbanj geijlai lo. Bi daengz byai, cijmiz seiz sam nyied sam dauqma ranzmbanj baiq coj saek ngoenz.

Baezneix baema, dwg aenvih boh’au gou gvaq ngoenzseng, boux- laux ndaej 86 bi lo, dou bannomj hong nyaengq hoeng cungj aeu ma hohfuk bouxlaux. Gou haujlai nanz seizgan mbouj dauqma lo, baezneix ma daengz ndaw mbanj ninz haemh ndeu, raen gijmaz cungj moqsien, yawj gijmaz cungj mizyinx, gou nyinhnaeuz miz song gienh saeh daegbied mizyinx, couh aeu daeuj gangj hawj caezgya dingq gonq.

Gienh saeh mizyinx daih’it, dwg gangj duz gaeqboux ndeu. Ngoenz- haenx, gou caeuq beixnuengx ndaw mbanj haeuj mbanj bae byaij guhcaemz, byaij daengz diuz roen youh iq youh fwz le, deng duz gaeqboux dangj loh lo. Duz gaeqboux youh hung bwn youh lwenq, linz de hoengzfwgfwg. Duz gaeqboux ngiengx aen gyaeuj sanggvanggvang, huj- dengdeng byaengq song aen lwgda yawj dou, gij yiengh de lumjnaeuz ak gvaq maz bae, yaek bongh gvaqdaeuj dot dou yienghhaenx.

Seiziq gou deng duzgaeq dot gvaq, daengz seizneix gvaqbae geijcib bi le, raen gaeq yaek dot vunz lij hwnj naenggaeq. Seiziq gou diuqbeiz lai, miz ngoenz ndeu raen gaeqmeh daiq bang gaeqlwg ngamq rox byaij ndeu ra gwn, gou raen bang gaeqlwg iqet haenx bwnnyumnyum, yienghceij ndeiyawj raixcaix, gag naemj dangh- naeuz gaeb duz daeuj guhcaemz ndei lai hw. Gou couh gaeb duz gaeqlwg daeuj guhcaemz, siengj mbouj daengz duz gaeqmeh laihnaeuz gou yaek nyaenj dai duz lwg de, couh hujdengdeng doq heuh “gvaek- gvaekgvaek”, doq mbin gvaqdaeuj dot gou, suenq gou mingh ndei ndoj ndaej vaiq, mboujnex deng gaeqmeh dot deng lwgda le, gangj mbouj dingh baenz boux damengz lo. Yienznaeuz ndoj ndaej gvaq mbouj deng dot lwgda, hoeng cungj ndoj mbouj gvaq deng gaeqmeh nyauj hoz, faj nyauj gaeqmeh youh soem youh raeh, vaek hoz gou hwnj song diuz vunqsieng, hoz gou manh daengz cungj yaek nyouh conh bae……

Seizgonq deng gaeqmeh homh lau lai lo, seizneix duz gaeqboux saenzheiq gvaekgvaek youh lanz loh gou, gou lau deng dot lwgda lai, nyex mbouj ndaej duz gaeqboux ak neix, gou naemj geb viz deuz suenq lo. Mboujliuh duz gaeqboux dauq suk gumq deuz vaiq gvaq maz bae, caiq siengj mbouj daengz duz gaeqboux byaij loh ndukndek, lumj goenglaux geq lai le byaij loh mbouj miz rengz yienghhaenx.

“Duz gaeqboux neix dwg mbanj raeuz duz ceiq geq, ciengx ndaej 10 bi lo.” Beixnuengx lwnh gou dingq:“Duz gaeqboux neix gaxgonq ak lai, mbanj raeuz gaeqboux ceiq ak dwg duz de lo.”

Mbanj dou mbouj miz vunz dawz gaeq doxdot daeuj guhdoj, yienghneix vihmaz gangj duzgaeq neix ceiq ak ne?

“Duz gaeqboux neix dwg duz gaeqgoeg mbanj raeuz. Boux lajmbanj cungj rox, vunz aeu gwn haeux, gaeq aeu dawzboux. Gaeq dawzboux le, gaeqmeh cij ok gyaeq.” Beixnuengx youh naeuz:“Gaeqdoj mbanj raeuz noh van ndei gwn lai, dwg duz gaeqgoeg neix ndei.” Laxlawz, ciengx gaeq aeu miz gaeqgoeg, miz gaeqgoeg le gaeqmeh cij ok ndaej gyaeq, faeg ndaej gaeqlwg.

（caengz sat）