Fwenging Bouxcuengh dwg cungj fwenyaz youz gyoengq canghyaz mehmbwk Bouxcuengh youq guhyaz seizhaenx ciengq, hix heuhguh lwnz- yaz, Vahcuengh heuhguh“fwenging”, daihbouhfaenh youq Lingzyinz Yen Swcwngz Cin cienzlah. Fwenging Bouxcuengh dwg cungj yinhyoz gag miz ndeu, daj vwnzva guhyaz menhmenh bienq gvaqdaeuj, dwg seizneix ndaw guek raeuz cungj yinhyoz gag miz bauj ndaej ceiq caez.

Fwenging Bouxcuengh youq Ciuzsungcauz hainduj miz, seiz haenx dwg boux vunzdog ndeu gag ciengq lai. Daj neix dauqlaeng, fwenyaz ndaej mboujduenh caeuq doengh- yiengh wnq doxgyaux hwngfat, baihndaw yied daeuj yied lai, sing ciengq youh lai ndeidingq, doeksat bienqbaenz caetcib ngeih yienghsing lo, caemhcaiq aeu doenghgij mingz- coh caetcib ngeih gizgingjdenj Lingz- yinz daeuj an caetcib ngeih yiengh- sing fwenyaz; doenghgij gizgingjdenj neix dwg caetcib ngeih“yaz”(duz sienbaed) youq dangdieg mizmingz dangqmaz. Eu fwenging seizhaenx gingciengz aeu fagbeiz、daehhom、aenlingz、cawluengz、din(singcaemq) daengj daeuj boiq sing.

Ciuhgeq gij fwenging Boux- cuengh yienghsing noix、ngaih ciengq, aeu Vahcuengh lwnh saeh, aeu daeuj dauqngeix bouxgvaqseiq, gouz mbwn hawj vunzraeuz mbouj cai mbouj nanh、ndangmaengh sim’onj; gyoengq canghyaz eu fwenging haenx rox haujlai vahdoj bingzseiz vunz mbouj rox gangj haenx, aeu neix daeuj caeuq duzmuengz(sienbaed) gangj, mizdi geizheih.

Ginggvaq hwngfat bienqvaq haujlai nanz, fwenging Bouxcuengh seizneix gaenq baenz cungj fwen biengz Bouxcuengh baenzneix: Baih- ndaw miz lai cungj lai yiengh, miz vahcoenz hawj bouxlix lwnh simnaiq、gangj siengjmuengh、haenq vet vunz dungxyak guh saehmbit、haenh cingz guhyoux doxgyaez、lwnh saehbiengz seizneix daengj; doenghgij yienghsing miz angqyangz cienz cingz、menh ciengq hoih lwnh, hix miz simnae seiliengz、yinx vunz doek raemxda. Eu fwenging seiz langhnaeuz bienq yienghsing couh boiq doenghyiengh mbouj doengz, aeu neix daeuj yienh’ok yiengh caeuq yiengh mbouj doxdoengz.

Lingzyinz fwenging Bouxcuengh miz doenghgij gyaq yinhyoz gig dijbauj. Vihliux hen ndei bauj ndei fwenging Bouxcuengh, aen yienh neix Vangz Lanzfwnh、Dangz Yenjmingz（gaxgonq dwg bouxcizgungh vwnz- va’gvanj ndaw yienh）haenqrengz guh ngeihcib lai bi, cam ndaw yienh sojmiz canghyaz Bouxcuengh caez bae, soucomz ndaej gojgaeq、goj riuzgangj、doz saw、doxgaiq daengj haujlai doenghyiengh gvendaengz fwenging, caemhcaiq baengh gijneix bae cingjleix, baenz coij baenz coij gonqlaeng raiz miz Sawndip、Saw- cuengh、gozci yinhbyauh caeuq eiqsei Sawgun daengj seiq coij, youq 2009 nienz 3 nyied bien yaenq okbanj bonj saw ndeu heuhguh《Lingzyinz Swcwngz Fwenging Bouxcuengh》. Bonj neix gungh miz 3 cieng 16 cez 84 fanh lai cih, gangj le fwenging Bouxcuengh ndaej caezcaez cienz- cienz bae. Bonj neix hen ndei doenghgij yienghsiengq caeuq dungxndaw bonjmiz gvendaengz fwenging Bouxcuengh, neix hawj doenghgij fwenging bakriuz geij cien bi nanz neix ndaej geiq baenz cihsaw, neix couh hawj ndawbiengz miz bonj saw guhyiengh hawj vunz yenzgiu vwnzva Bouxcuengh gig dijbauj ndeu.

2014 nienz 11 nyied 11 hauh, Lingzyinz fwenging Bouxcuengh ndaej Gozvuyen baecinj, liedhaeuj daihseiq buek guekgya gaep feih- vuzciz vwnzva yizcanj mingzloeg.

Daj neix liuxle, aen yienh neix gaemdawz aen gihvei neix, gyarengz henhoh caeuq ciuqgoq doenghboux swnjcienz fwenging daeuz; caz Lingz- yinz fwenging Bouxcuengh caez bae, comz ndei caeuq cingjleix swhliu caezcingj bae; aeu gvangjbo、densi lai fuengmienh senhconz fwenging; comz vunzlai Bouxcuengh caeuq yisuzgyah aeu fwenging daeuj bien baenz go moq; haenqrengz vixyinx bouxcoz swnjcienz hagsib fwenging. Yiengh- neix guh couh ndaej coi ndawbiengz vunzlai haenqrengz henhoh、swnj- cienz caeuq haifat fwenging.