Daengngoenz doek roengz mbiengj bya baihsae bae dingz he seiz, ndit yied daeuj yied bienq ndaej unqswnh, doengxhaemh gaenq laeg- lemx daeuj daengz.

Gyoengqvunz guhhong baeg baenzngoenz cingq laebdaeb maranz. Raen bouxcawj haeuj dou, duzma ninz ndaw gyanghongh couh ngauzgyaeuj baetrieng daeuj angqcoux, raeuq “vouvou” song sing, lumjbaenz naeuz:“Bouxcawj, gou siengj mwngz baenz- ngoenz lo, cungj suenq caj mwngz dauqma ranz lo.”

Mbangj seiz bouxcawj baeg lai roxnaeuz simcingz mbouj ndei, miz di mbouj naihfanz, mbouj daiq leixlangh duzma. Duzma couh aeu gyaeuj bae bungq bouxcawj, raen bouxcawj lijdwg mbouj swt de, duzma couh yunghrengz bibuengq aen caekhaex bae ngad ga vaq bouxcawj, itcig daengz bouxcawj roxnyinh gij sim’eiq de, iet fwngz bae lumh aen gyaeuj de, duzma cij baet rieng byaij deuz.

Miz vunz yawjsiuj duzma, doengh mbouj doengh couh yungh duzma daeuj ndaq vunz vet vunz, lumjbaenz “ndaek ma neix” “ma siengq mwngz” daengjdaengj. Hix miz vah naeuz “naj vunz sim ma”“da ma yawj vunz”“moeb ma gaenq doek raemx “gyaeuj ma uk nou” caeuq “ma baengh vunz ak”, gij cihsaw yak doiq duzma lai ndaej geq mbouj liux. Hoeng, hix miz haujlai gojgaeq duzma hawj vunz gamjdoengh, duzma gouq bouxcawj, roxnaeuz doxbiek geij bi duzma cien leix ra ndaej bouxcawj gaeuq…… Mboujlwnh baenzlawz yiengh, gou cungj roxnyinh duzma mbouj miz maz mbouj ndei. Danghnaeuz caen miz seiqlaeng, gou nyienh bienqbaenz duz ma he, ceiqnoix de doiq bouxcawj miz cingz.

Mokhaemh ciemhciemh swng hwnjdaeuj lo, baenz benq baenz benq yied sanq yied gvangq, lumj caengz baengzsa mbang he bu rim biengzdeih, hawj mbanjranz lumj youq ndaw diegsien nei. Gak ranz gak hoh hoenzfeiz geujneuneu, raqraq heiq ngaizbyaek rangfwdfwd swnh rumz ci daeuj, hawj vunz ngah ndaej myaiz yaek rih ok, gyoengqvunz gangjgangj riuriu comz youq aen daiz gwn caeuz.

Ronghndwen menhmenh daj ndaw fwj loh ok fajnaj luenzlulu de, yienh gij rongh ronghsagsag okdaeuj, ciuq ndaej biengzdeih lumj doengx- ngoenz nei. Ndij diuz loh gyaeujmbanj byaij bae henz dah, rumz ci gvaqdaeuj, byaifaex yiengjsasa, song mbiengj gofaex swnh rumz bi, lumj gyoengq dahsau cingq diuqfoux nei. Gij rongh ronghndwen daj gehfaex ciuq roengz- daeuj, gwnznamh sikhaek yienh ok baenz diemj baenz diemj raizrwdrwd. Raemxraiz lumj naednaed caw nei youq gwnz rum ndongqrikrik. Rumz baez ci, gyoengqde youq gwnz mbawrum ringx bae ringx dauq, caeuq gyoengqdoih gyaeuj bungq gyaeuj rwz dep rwz sing saeq gangjvap. Hix cijmiz haemh hwnz vunz cingx le, gyoengqde cij doxcomz gangjgoj. Ranz baez rongh, daengngoenz daxgoeng baez okdaeuj, aen ndang iqet ronghrik gyoengqde couh youq ndaw hoengheiq siu bae lo. Gyoengqde mbouj ndaej mbouj insik di seizgan dinjdet neix.

Seiqlengq ciemhciemh caem roengzdaeuj, mbiengj baihbya gizgyae, seiz mbouj seiz cienz daeuj saek sing roeghwnz heuh, hawj mbanjranz caemrwg neix yienh ndaej mizdi siliengz. Sim vunz riengz dwk hix mbin bae gizgyae, dauqngeix haujlai gij saeh caeuq vunz gaxgonq.

Daxboh lizhai dou ndaej 10 bi lo, niemh hwnj gij yienghceij de, niemh hwnj gij vah de gangj gvaq, lumjbaenz sojmiz couh youq dangqnaj nei. Daxboh gig gyaez ciengq go, mwh dingq daengz bouxwnq ciengq go ndeidingq, de couh sij diuh roengz- daeuj, swhgeij gag boq dig gag hag ciengq, de lij rox boq loxlez caeuq daz ngeihyienz dem.

Mwhhaenx gou riu dwk cam daxboh de daj gyawz rox gijneix? De dauq cam gou:“Mwngz doegsaw lauxsae mbouj son mwngz rox saw ha?” Gij vah daxboh hawj dou naj hoengz rwz dit, gou naemj: Dangh- naeuz daxboh seng youq aen nienzdaih neix, de itdingh baenz boux ciengq go mizmingz ndeu. Danghnaeuz daxboh lij youq, gou itdingh aeu ndeindei gaen de hag gijneix, mbouj dwg siengj baenz boux cienmonz ciengq go he, cix dwg lai rox yiengh he hix mbouj loek. Angqyangz seiz ciengq go, siengsim seiz ciengq go, mbouj angq mbouj you seiz hix ciengq go, miz sing go daeuj buenx, ndang geq sim cix nanz geq. Ndwenngoenz buetbongh baenaj mbouj caiq dauq, seizneix siengj hag, hojsik daxboh gaenq daiq gijneix roengz namh bae lo. Hoeng, ndaejhoengq gou hix mbouj ngeix caiq bae ra lauxsae daeuj son gijneix, bouxvunz youq gwnzbiengz cungj miz di ienqhoij, mbouj yungh feiq caenh simgei bae gouz guh caezcienz. Couh baenzneix hawj gij ciengzgingj daxboh daz ciengq youq ndaw uk gou nanz mbouj nanz fubfed ba!

Daj daxboh lizhai le, daxmeh itcig boux ndeu gag youq. Aen sim Mehlwg doxlienz, dou rox gij gyaez daxmeh, daxmeh hix gyaez dou. Mwh daengz ciet daengz cieng, raen lwg bouxwnq maranz, daxmeh couh engq maqmuengh dou dauqma buenx de lo. Gig mbouj yungzheih ndaej ma daengz ranz, ngamq youq geij ngoenz, gij vah ndawsim caengz gangj sat, yienznaeuz gig mbouj sij, hoeng, youh aeu gipmuengz okdou ganj dauqbae guh- hong lo.

Daxmeh youh hainduj youq ndaw ndwenngoenz raezrangrang ngoenz muengh hwnz muengh, muengh gvaq cin hah cou doeng, yienghneix mboujduenh doxlwnz dwk. Dou hix mbouj dwg mbouj siengj youq henz ndang de, cij dwg ra gwn ra daenj hawj dou mbouj ndaej mbouj lizhai daxmeh.

Gou fwt naemj daengz, daxmeh caeuq duz ma haenx miz maz song yiengh ne? Duz ma maqmuengh bouxcawj dauqranz, daxmeh maq- muengh gyoengq lwg dauqma, miz geijlai boux lwg ndaej ngeix daengz gij maqmuengh daxmeh neix ne?

Haujlai bi gaxgonq, daxmeh dwg yienghhaenx nienznomj, yienghhaenx gyaeundei, mbouj rox dwg mbouj dwg vunz ndaw bya gwn raemx bya, saeknoh de daegbied hauoiq. Seiz- haenx couh miz vunz dahoengz daxboh aeu ndaej mehyah baenzneix gyaeundei.

Miz vunz riu naeuz daxmeh caeuq gou couh lumj song beixnuengx nei, daxmeh cungj riuriu mbouj guhsing. De beizheiq unqswnh, mienhdoiq gungzhoj hix dwg gangj- gangj riuriu, caeuq vunz doxhuz, ndaej bang couh bang. Boux vunz yiengh- neix, naengnoh baenzlawz mbouj oiq, naemj bienq geq cungj nanz.

Engq hwnz lo, gwnz gyaeuj raemxraiz engq mbaeq engq naek. Gyae’gyae muengh bae, lij miz saek aen daeng rongh, bouxvunz haenx vihmaz lij caengz ninz ne? De dwg mbouj dwg hix lumj gou doxdoengz hix miz simsaeh naekgywg ninz mbouj ndaek? Vunz lix youq gwnzbiengz, gak boux gag miz saeh yousim, gij nienzgeij mbouj doxdoengz, gij sim- cingz hix mbouj doxdoengz, guh saeh hix mbouj doxdoengz, gij saeh yousim hix mbouj doxdoengz. Couh lumj gou mbouj rox gij saeh yousim mwngz, mwngz hix mbouj rox gij saeh simfanz gou.

Seizneix gou fwt naemj daengz: Vunz lix youq gwnzbiengz, mbouj rox saehsaeh swnhsim, gungzhoj seiz miz baengzyoux bangcoh dwg seizheiq ndei, wngdang gamjgik mbouj caenh. Mbouj miz, couh swhgeij haenqrengz bae dingj ba, haebheuj dingj gvaqbae. Fwnrumz gvaqbae couh ndaej raen duzdoengz, nditrongh couh youq baih- naj okyienh. Gyo’mbaiq gij baengz- youx caensim doiq swhgeij ndei, hix gyo’mbaiq gij vunz doiq swhgeij mbouj ndei. Aenvih gyoengqde hawj gou rox aen seiqgyaiq neix miz ndei caeuq yak caemhyouq, daezsingj swhgeij aeu seizseiz cengq hung lwgda bae faenbied. Caiq gangj gou hix dwg boux vunz bingzciengz, hix miz giz mbouj ndaej ndei, mbouj ndaej maqmuengh bouxboux cungj maij.

Loh, ndaej byaij loek, hoeng mbouj ndaej byaij loek baez daihngeih; vunz ndaej laemx, hoeng mbouj ndaej laemx le mbouj caiq benz hwnjdaeuj.

Rumzhaemh ci daeuj liengzsisi, ronghndwen lij venj youq gyang mbwn sangvidvid. Haemhneix, gij simsaeh youq ndaw haemh ronghndwen fouz- sim haeuj ninz neix bienq ndaej lohlanglang, daengx aen sim hix bienq ndaej soengswtswt hwnjdaeuj.