Mboengqneix, bouxraiz youq ndaw ranzgaujien Sihlinz Yen Bujhoz Myauzcuz Yangh Bujhoz Cunh Mbanjnazhou, yawjraen boux ndaem ien cingq nyaengq aeu baenz bog baenz bog mbaw gaujien henjrwdrwd buen ok ranzgaujien.

Ciuq Cinz Mwz boux gisuzyenz ndaw yienh youq yienhciengz sonyinx haenx gaisau, Mbanjnazhou dwg dieg ien moq bi’gvaq cij doigvangq gij vunqsik dajndaem “gaujien ndei+haeuxnaz”, bineix miz Yangz Cwngvaz、Yangz Cwngzyungz、Yangz Yangjcangh gungh sam ranz ndaem 51 moux, ranz bingzyaenz 17 moux. Aenvih dinfwngz son ndaej daengz、vunzlai roengzsim guenjleix, seizneix gaujien gaenq gauj baenz ceiq noix miz 65% doxhwnj dwg mbawien ndei, ciuq gyaqcienz soucawx bi’gvaq daeuj gujsuenq, 51 moux gaujien neix gyaqcienz dij daengz 20.40 fanh maenz, ranz bingzyaenz souhaeuj 6.80 fanh maenz. Boux ndaem ien sou ien liux le lij ndaem miuz haeuxnaz ndeu, moix moux lij miz souhaeuj 0.15 fanh maenz baedauq.(Lij Sivaz/李世华)