Goj buhbwnroek dwk gojgaeq ndawbiengz Bouxcuengh, youq Hwngz Yen ranghdieg Yauyij cienz- lah, ndawde miz haujlai saeh geizheih haujlai goj sienbaed, cienzlah youh gyae youh nanz. Doenghgij goj neix daj hainduj doxdaeuj le mboujduenh hwngfat mboujduenh gyalai.

Aen gojgaeq neix ndawde gangj bouxcoz ndeu heuhguh Cangh Yayenz, de ndaw ranz gungzhoj. Daxboh de youq ranz saeqdoj guh hoiqraez; aenvih deng baeg lai lo, daxboh de youq Cangh Yayenz doekfag gaxgonq couh dai baeg lo. Neix Cangh Yayenz daj lij iq couh caeuq daxmeh doxbaengh youq, songde youq ranz saeqdoj guh hoiqraez, hix dwkfwnz vuenh haeux, baengh guh gijneix gwn. Cangh Yayenz lij iq couh hwnj bya bae dwkfwnz、dwknyaen, lienh ndaej bonjsaeh ak dwkfwnz、dwknyaen, hix lienh ndaej ndang maenghmwd bae. Miz ngoenz ndeu, youq gyang roen de rap fwnz dauq ranz, miz duz gaeqboux hung ndeu diuq hwnj gwnz rap de bae, de couh daiq de dauq ranz lo. De ciengx duz gaeq neix ndaej buenq bi liuxle, duz haenx couh bienq baenz dahsau ndeiyawj lumj vunzsien nei, caemhcaiq caeuq de guh gvanbaz. Cangh Yayenz mbeihung akguh, mehbaz de gaenx- guh simndei, songde guh gvanbaz le gvaqngoenz ndei dangqmaz.

Danhseih, ndaek saeqdoj bonj- dieg raen yienghsiengq mehbaz Cangh Yayenz ndei lai, myaiz doek haujlai nanz lo, couh naemj bae naemj dauq siengj baenzlawz aeu- ndaej dahsau neix daeuj guh yah’iq. Yienghneix le, ndaek saeqdoj neix gizgiz guh nyapnyuk coq mehbaz Yayenz, danhseih mehbaz Yayenz baengh ukgyaeuj lingz cungj mbouj miz maz dwkcoih ndaek saeqdoj neix. Mbouj miz maz banhfap nauq, ndaek saeqdoj couh manzgyaengj duet aeu mehbaz Yayenz bae. Yaek deng ok dou seiz, mehbaz lwnh Yayenz：“Mwngz bae gwnz bya dwk bak duz roeg daeuj guh geu buhbwnroeg ndeu, gvaq bak ngoenz le daenj‘buhbwnroeg’daengz yaxmonz ra gou.”Mehbaz de deng duet bae lo, liuxle daxmeh de ndatheiq lai couh dai bae. Neix ranz Cangh Yayenz deng boedbaih lo. Yayenz simhaemz yaek dai, simnaiq dangqmaz bae, hoeng hix raen mizmuengh, de haeuj ndaw ndoeng bae dwk roeg. Mehbaz Yayenz deng duet haeuj ndaw yaxmonz le, mbouj gangj mbouj riu, baenzngoenz cungj yousim ndwi, ngoenz beij ngoenz naiq. Vihliux hawj dahsau neix riu, ndaek saeqdoj nyienh ok sam bak maenz ngaenz, hoeng gyoengq vunz gai ywdiep caeuq vunz gangjriu cungj mbouj miz banhfap hawj dah de riu mbat ndeu. Yayenz vihliux gouq baz, deng gwn cien haemz fanh hoj, hamj gvaq 99 diuz dah, bin gvaq 99 goengq bya, dwk ndaej 100 duz roeg lo.

Daengz ngoenz bak ngoenz le, Yayenz ciuq vahdaengq baz de guh baenz“buhbwnroeg”, daenj coq ndang, daeuj daengz yaxmonz. Baz de raen Yayenz daenj“buhbwnroeg”diuqyetyet le, mbouj caiq najsaep lo, couh naj riu hwnjdaeuj. Ndaek saeqdoj ngah aeu“buhsien bwnroeg”, hix vihliux hawj mehbaz Yayenz sim’angq, couq duet buhguen caeuq Yayenz doxlawh daenj. Yayenz coengh ndaek saeqdoj daenj“buh- bwnroeg”caemhcaiq gaj de dai bae. Neix songde deuz ok yaxmonz bae lo, song boux guhdoih bae giz gyae’gyae bae, gwn van youq ndei.

Aen goj buhbwnroeg neix miz dauhleix laeg lailai, dwg lwnh vunzbiengz rox vunz Bouxcuengh hozbaenz ukgyengj, laemxsim dingj hoenx manzgyaengj, ceng ndaej gag youq gag guh gag dingh. Bi 1955, boux canghraiz Bouxcuengh Veiz Gizlinz （vunz Hwngz Yen Yauyij Cin Vwnz Cunh）ciuq aen goj“buhbwnroeg”dangdieg cienzlah haenx raiz le bonj seiraez ndeu heuhguh《Buhbwnroeg》. Bonj saw seiraez neix mizok le, sawj aen goj“buhbwnroeg”neix hwnghoengh dangqmaz.

Bi 2014 ndwen 11 ngoenz 11, aen goj buhbwnroeg Bouxcuengh ndaej gozvuyen baecinj, liedhaeuj daihseiq buek guekgya gaep feihvuzciz vwnzva yizcanj mingzloeg.