Denzyangz Yen baihnamz miz aen mbanj ndeu heuhguh Mbanj- gujmeij. Gizde raemx saw bya heu, haeux cuk bya biz, miz mboq miz gamj dohlai, lumjbaenz Mboqbugiuj、Mboqnazlungz caeuq Gamjganvwnz、Gamjganyinz daengjdaengj, gingjsaek gyaeundei maez vunz.

Ciet sam yied sam dwg hawfwen Mbanjgujmeij. Moix bi baez daengz ngoenzneix, gyoengq vunzmbanj daj seiq fueng bet baih comz daeuj gwnz haw guh fwen. Bohranz caeuq mehranz doiq fwen guh’angq, daegmbauq caeuq lwgsau guh fwen cam yah cam gvan, haujlai vunz couhdwg youq gwnz hawfwen guh fwen baenz gvanbaz. Ngoenzneix gwnz haw vunz rim haw rim gai, dauqcawq dwg sing fwen, sing fwen goksadsad, lwenq daengz byonghmbwn bae, nauhyied dangqmaz.

Riuz naeuz lungzvuengz Mboq- nazlungz miz dahlwg ndeu, coh de heuhguh Dahlungz. Dahlungz din- fwngz lingzleih, ndang sang reux, naj maeq hau, gyaeundei dangqmaz. Bihaenx ciet sam nyied sam, de daeuj hawfwen Mbanjgujmeij guhcaemz, yinx ndaej haujlai daegmbauq ngonz de, yaek caeuq de guh fwen.

Gamjganvwnz miz daegmbauq ndeu, heuhguh Daeggan. Daeggan baez raen Dahlungz couh maez de lo, yawj ndaej myaiz yag caez. Yawj mbouj youqgaenj, Daeggan youq dangqnaj vunzlai bae daeuq Dahlungz caemhcaiq doengh din doengh fwngz dem. Dahlungz itseiz mbouj rox baenzlawz guh, lau dwk daej bae.

Mboqbugiuj miz daegmbauq ndeu, heuhguh Daeglungz. De rox ngoenzneix Mbanjgujmeij miz haw- fwen, baenzneix hix daeuj youz. Cingqngamj ndaej raen Daeggan daeuq Dahlungz, de couh gvaqbae lanz, mbouj hawj Daeggan gyawj Dahlungz. Gyoengqvunz youq henz hix baekvix Daeggan ndaq de guh mbouj deng, Daeggan raen najmong cij ndaej buetdeuz lo.

Daeglungz caeuq Dahlungz couh yienghneix roxnaj lo. Dahlungz raen Daeglungz mbauqndei, ndang cangq, youh gamj bang vunz, miz di gyaez de lo. Baihneix Daeglungz raen Dahlungz gyaeundei caemhcaiq hozunq, baez raen hix gyaez de lo.

Songde youq gwnz haw guh fwen、gangjgoj, mbouj rox mbouj nyinh mbwn laep lo, yienznaeuz sij mbouj ndaej doxbiek, hoeng aeu maranz ne. Doxbiek seiz, Daeglungz soengq aen mbajnyawh ndeu hawj Dahlungz, Dahlungz siujsim sisi dawz mbaj- nyawh yo hwnjdaeuj.

Maranz le, Dahlungz ngoenzhwnz siengjniemh Daeglungz, de ciengzseiz dawz mbajnyawh Daeglungz soengq haenx okdaeuj yawj. Baez raen aen mbajnyawh, de couh lumj ndaej raen naj Daeglungz nei, ndawsim couh diemzsubsub. De ndaejhoengq couh guh gouh haiz ndeu yaek soengq hawj Daeglungz, dawz gij gyaez caeuq gij siengjniemh swhgeij yo youq ndaw haiz.

Ngoenzhaenx dwg haw Mbanj- gujmeij, Dahlungz fwngz gaem gouh haiz bonjfaenh guh haenx daeuj daengz bakroen Mboqnazlungz deq, raen canghdawzrap ndeu gvaqdaeuj, Dahlungz cam de naeuz:“Daeggo, mwngz bae haw Mbanjgujmeij, gvaq Mboqbugiuj seiz, bang gou dawz gouh haiz neix hawj Daeglungz Mboqbugiuj, ndaej lw?” Canghdawzrap naeuz:“Ndaej, ndaej!”

Canghdawzrap laebdaeb ganj roen, gvaq Gamjganvwnz seiz, Daeg- gan cingq youq bakgamj lienh ndang, Daeggan raen ndaw rap canghdawzrap miz yiengh doxgaiq lwenqnyapnyap, couh haeujsim bae yawj. Baez yawj raen dwg gouh haiz gyaeundei ndeu, de ndawsim gag ngeix: Cij miz Dahlungz Mboqnazlungz cij guh baenz gouh haiz lengj baenzneix. Ndigah, de cung gvaqdaeuj yaek ciengj aeu gouh haiz neix.

Canghdawzrap raen de cung gvaqdaeuj rox de yaek guh yak, doq gaem faexhanz caeuq de doxbuek. Hoeng, doeklaeng dauqdaej lij miz ga haiz ndeu deng Daeggan ciengjdued bae lo, cij lw ga haiz ndeu youq ndaw rap. Canghdawzrap cij dawz ga haiz lw haenx soengq hawj Daeglungz, de lau deng naeuz, ndigah mbouj gamj caeuq byawz gangj miz ga haiz ndeu gaenq deng Daeggan ciengj bae lo.

Baez yaep da youh daengz ciet sam nyied sam hawfwen Mbanjgujmeij lo. Ngoenzneix Dahlungz caeuq Daeg- lungz youq gwnz haw doxraen lo. Songde doq ndaej raen couh bak mbouj daengx doxlwnh gij siengj- niemh bonjfaenh.

Daeglungz dawz ga haiz haenx okdaeuj doiq Dahlungz naeuz:“Dahlungz ha! Yawj, mwngz soengq gou ga haiz neix, gou ngoenzhwnz coq youq henz swiz, raen de couh lumj ndaej raen mwngz……” Gangj daengz neix, Daeglungz nyaenx mbouj ndaej raemxda rih okdaeuj lo.

Dahlungz raen le gamjdoengh dangqmaz, hoeng de doeksaet cam:“Gou guh gouh haiz ndeu soengq hawj mwngz, mbouj dwg ngamq soengq ga haiz ndeu bw!”

Cingq youq seizneix, Daeggan byaij gvaqdaeuj, ndaw fwngz de hix gaem ga haiz ndeu, daengz dangqnaj Dahlungz naeuz:“Dahlungz ha, mwngz soengq gou ga haiz neix, gou hwnzhwnz got de ninz, gou got haiz ninz couh lumj ndaej got mwngz ninz nei.”

Daeglungz dingq le ndatheiq sing hung naeuz:“Dahlungz ha, mwngz baenzlawz yienghneix sim lai? Gyaez bouxneix youh gyaez bouxhaenx!”

Dahlungz mbouj rox miz maz saeh, youh geizheih youh bakaj loeng- loeng mbouj rox gangj maz. Dingjlingz, seizneix canghdawzrap Dahlungz daengq de soengq haiz haenx cingq gvaq gizneix, de baez raen Daeggan couh fwngz vix coh de, ndaq naeuz:“Gou dauqdaej ndaej raen mwngz lo! Couhdwg mwngz, bi’gvaq gou bang Dahlungz soengq gouh haiz ndeu bae hawj Daeglungz, youq buenq loh deng ndaek vunzrwix neix ciengj bae ga haiz ndeu.” Canghdawzrap doq gangj doq dawz faexhanz bae moeb Daeggan, Daeggan raen deng byoengqhangx- saez, couh riengjret buetdeuz lo.

Canghdawzrap cienqlaeng dauq yaek caeuq Dahlungz boizleix, gaenq raen Daeglungz caeuq Dahlungz doxgot ndaetndaet bae……

Bihaenx liggaeuq caet nyied cocaet ngoenzde, Daeglungz caeuq Dahlungz baenzranz lo. Ngoenzhaenx haetromh, Daeglungz caenndang daiq bang vunz ndeu bae Mboqnazlungz ciep yahmoq.

Liuh mbouj daengz Daeggan daiq bang bingmax ndeu youq byongh roen deq. Bang vunz Daeglungz deng bang bingmax Daeggan hoenx, gyoengqvunz sanqyaengyaeng. Daeggan baengh gij bingmax maenh’ak, gaeb ndaej Daeg- lungz, dawz de at dauq Mboqbugiuj, oet de haeuj conghmboq bae, lij guh aen dourin ndeu daeuj saek aen conghmboq dem.

Daeglungz aenvih siengjniemh Dahlungz gvaqbouh, siengsim lai, ngoenzhaenx gyanghwnz couh dai bae lo, gij raemxda de bienqbaenz raemx- mboq, laeliklik mbouj daengx. Gvaq- laeng gyoengqvunz aeu raemxmboq Mboqbugiuj caeuq megmba daengj doxgaiq daeuj doxgyaux, hoed baenz ciengq gwg. Vunz dangdieg dawz cungj ciengq neix heuhguh Gujmeij- ciengq. Cungj ciengq neix youh hom youh ndeigwn, gig mizmingz.

Caiq naeuz ngoenzhaenx, Dah- lungz youq ranz deq Daeglungz daeuj ciep de, deq bae deq dauq cungj mbouj raen, sim de mbouj onj lo, nyinhnaeuz haengjdingh oksaeh lo. Ngoenz daihngeih, mwh Dahlungz rox Daeglungz gaenq youq haemhlwenz byonghhwnz dai seiz, de daej dwk mbei yaek dek bae, doeklaeng ngunh bae lo, baez ngunh couh mbouj singj dauq, riengz Daeglungz caez bae lo.

Vunzranz dawz Dahlungz hoem youq laj bya Byaronghndwen. Ngamq hwnz ndeu, aen moh Dahlungz couh bienqbaenz ndaek rin sang ndeu, ngoenzhwnz caeuq Mboqbugiuj dox- muengh. Gvaqlaeng vunzlai heuh ndaek rin neix guh Rinmuenghgvan.

Gwnz dingj bya Byaronghndwen miz aen gumh ndeu, yiengh de lumj aen gungj ronghndwen nei, aen coh Byaronghndwen couhdwg yienghneix ndaej daeuj. Riuz naeuz moix bi cungj miz haemh ndeu, aen rongh- ndwen doek youq aen gumh dingj bya Byayronghndwen Mbanjgujmeij, gyoengqvunz naeuz Daeglungz caeuq Dahlungz couhdwg youq haemhhaenx doxraen.