Gwn caeuz liux, gou caeuq daxmeh、daxgoeng、daxbuz doengzcaez bae gaeb baeu.

Dou daeuj daengz henz haij, laep- ngaungau cungj yawj mbouj raen gijmaz. Daxmeh hai le aen dendungz, seiqlengq sikhaek rongh lo. Gou riengz gij rongh le, laebdaeb boek geij goenq rin iq, cungj mbouj raen duzbaeu. Gou simnae dangqmaz, hoeng youh mbouj fugheiq. Gou yawjyawj goenq rin hung baihnaj, dajsuenq sawq yawj. Ndaej daxgoeng daxbuz coengh gou, dou boek goenq rin hung deuz lo. Ha, haujlai duzbaeu! Gyoengqde lingzsingj dahraix, ndoj youq laj goenq rin hung lai ancienz youq laj goenq rin iq raeuh bae.“Lij mbouj rouz di gaeb, caj yaep duzbaeu couh deuz bae liux.”Daxmeh naeuz gou. Gou gumx ndang roengz, iet fwngzgvaz fwt gaemh dawz duzbaeu bizbwd ndeu. Gou aeu fwngzmeh caeuq fwngzvix baihswix baihgvaz gaemh haeuj laeng duzbaeu, yienghneix guh le caih fag gimz hung de baenzlawz ak, hix mbouj ndaej deng gou saekdi. Gou gaeb duz ndaej duz, laebdaeb gaeb ndaej geij duzbaeu lo. Daengzlaeng, gyoengqde bienq gvijgvaiq lo. Gou ngamq buen goenq rin ndeu hwnj, gyoengqde couh buet daengz laj goenq rin wnq bae lo, neix hawj gou baedauq cungj deng buen rin. Couh yiengh neix, gou baeg dwk hanh dumz gyaeuj liux, heiq conh fozfoz.

Nyaengq haujlai nanz, gaeb ndaej haujlai baeu. Geq le geq, gou gungh gaeb ndaej 15 duz baeu bw!