Gyanghaet singgeizit, gou couh deng dauqbae hagdangz hwnjdangz lo. Daeglwg cingq ninz ndaej ndaeknwnw, caensim mbouj nyienh ndek de. Hoeng, lijdwg deng naengh aen danci gou bae coh hagdangz.

Ngamq daengz bakdou hagdangz, couh miz boux daxgoeng ndeu, byaij daeuj coh gou, lumj naeuz raen geu fiengz gouqmingh ndeu.“Lauxsae, mwngz caen daeuj lo, caj mwngz miz di nanz lo.”Gizsaed, gou gaenq beij bingzseiz daeuj lai rouz(vaiq) 20 faencung lo. Gou mbouj dwg banh- cujyin lo, hoeng, gyoengq gyahcangj saeh hung saeh iq cungj sibgvenq ra gou lwnh gou nyi.“Dahlan gou youq neix, ngamq soengq de daengz hag- dangz de youh yaek caeuq gou dauq bae ranz. Seizneix mwngz daeuj couh gyau hawj mwngz lo.”Gangj le, daxgoeng de couh hai aen mohdoz dauqbae lo. Gou lij mbouj caengz rox dauqdaej fatseng gijmaz saeh ne, cijndei ganjgip dingz aen danci gou, camcam yawj dwg yiengh lawz ba.

Cijraen dahhagseng ban dou Vangz Sinhvei ing youq bakdou hagdangz, raemxda doekboegboeg, ndaw bak lij namnam dwk naeuz：“Gou aeu bae ranz, gou aeu bae ranz……”Gou baez sijsaeq yawj de, haet neix byoemgyaeuj roi ndaej cingjcaez, daenj geu vunj va ndeu, yienghneix ndangdaenj yaek lumj dwg mwh seizhah. Youq aen singgeiz gonq gou ngamq ma hagdangz hwnjdangz, raen de daenj geu buh nanwt, lij yungh aen mauh goemq aen gyaeuj de hwnjdaeuj ndaetndwt. Neix dwg aenvih gwnz gyaeuj de hwnj miz haujlai aen baez, aenvih humz lai, de yungh fwngz gaeu naeng lot lo, mboujrox cat geijlai yw, cungj mbouj ndei, miz di yakyawj. Bohmeh de lizvwnh lo, daxboh baenz bi youq baihrog dajgoeng, mboujrox miz geijlai bi mbouj maranz lo, daxbuz gaenq gvaqseiq lo, de itcig caeuq daxgoeng youq. De mbouj lumj gij lwgnyez wnq saetdiuq、angqyangz. Haeujhag le couh dwg boux vunz dog naengh youq dieg de, mbouj gangj mbouj riu. Vih gij saeh neix gou hix caeuq daxgoeng de gangj gvaq geij baez, hoeng mbouj miz yungh. Boux geq ndeu gag youq ranz, guenj song boux lan gwn daenj haeuj ninz, youh hong ranz youh hong reihnaz, gig mbouj yungzheih. Haet neix gou yawj daengz neix couh singj lo, Vangz Sinhvei itdingh dwg lau gyoengq doengzhag riunyaen de. Bakdou hagdangz laebdaeb miz gyahcangj soengq lwgnyez daeuj hag, miz boux geizgvaiq dwk humx gvaq daeuj cam, gyoengq lwgnyez hix comz daeuj yawj. Hwnjdangz lo, mboujguenj gou baenzlawz daeuh de, de hix mbouj nyienh haeuj gyausiz, doenghboux lauxsae wnq mboujrox fatseng gijmaz saeh, gvaq daeuj ndaq de hix mbouj- miz yungh. Hawj doengz ban hagseng bae heuh de,“lauxsae,de naeuz de yaek aeu bae ranz, de mbouj daeuj hag doegsaw lo……”Baenzlawz guh ne, dahlwg neix miz di giengx! Gou miz di hojlienz de hwnjdaeuj, simsiengj: Danghnaeuz bohmeh de youq ranz geijlai ndei ha! Seizneix baenzlawz guh ne? Hoeng, youh mboujndaej hawj de cungj ndwn youq bakdou, daengngoenz hwngfwtfwt, roxnaeuz de liuq ok bae……Danghnaeuz oksaeh ne couh mboujndei lo. Cij ndei youh dwk denva hawj daxgoeng de. “Mwngz couh louz de ndwn giz haenx ba, de mboujmiz saeh, gou ngamq daengz ndaw reih yaek aeu byaekmou gonq!” Daxgoeng de naeuz.

Mbouj ndaej, mbouj ndaej louz de youq bakdou dak ndit! Gou mbouj guenj sam caet ngeih cib it, rag dawz de byaij coh gyausiz dou bae. De cengq gou rag, haujlai nanz cij daengz aen dieg naengh de, gou hix hanh lae dumz ndang lo. Hoeng de couh ndwn dwk mbouj nyienh naengh roengz, danhseih cungj suenq dawz de ma daengz ndaw gyausiz lo. Roengz dangz le, couh miz hagseng buet daengz ndaw bangunghsiz lwnh gou:“Lauxsae, Vangz Sinhvei naengh roengz lo……”Cuengqhag le, youq gyang roen gou bungz de,“Vangz Sinhvei, mwngz ndei lwi?” “En, ndei lo!”“Baez laeng mboujndaej yienghneix guh lo, mboujne lauxsae couh mbouj gyaez mwngz lo.”(Gyoengq hagseng ceiq lau gou naeuz mbouj gyaez gyoengqde)“En!”Han le couh caeuq gyoengq baengzyoux angqvauvau buet baenaj lo.

Ndaw ban dou miz haujlai lwgnyez, daj iq couh caeuq daxgoeng daxbuz youq ranz, bohmeh baenz bi youq baihrog guhhong ra cienz. Yawj gyoengqde baenz ngoenz vaiqvued, byawz caen rox ndaw sim gyoengqde dwg siengj gijmaz, dingqdingq gyoengqde yaek aeu gijmaz.