Haujlai bi daeuj, doenghgij gojgaeq riuzgangj aencaw miz baenz bak baenz cien, daih dem daih cienz roengzdaeuj, aen beij aen ndei. Ndawde aengoj ceiq mizmingz youh cienzlah ceiq lai ceiq gyae haenx dwg aen gojgae ndawbiengz gvendaengz caw Hozbuj dauq moq.

Youq gwnzbiengz Cungguek, gaxgonq miz gienh saeh “caw Hoz- buj dauq moq”dahraix. Ciuq bonj saw lizsij《Sawgeiq Dunghhan·Goj Mung Cangz》ndawde geiq, youq Ciuzdunghhan, Hozbuj Gin henz haij miz caw ok ndaw haij daeuj lai. Vunz bonjdieg cungj dwk lwgcaw gwn, aeu lwgcaw lawh haeuxgwn. Dwk lwgcaw souhaeuj lai dangqmaz, mizdi boux- hakguen couh gaemhdawz cungj saeh neix gag oet cienzngaenz haeuj daeh, gag cauh gak cungj gvidingh gvet bouxdwkcaw. Vihliux gvet ndaej engq lai, doengh ndaek hakguen yakrwix haenx mbouj guenj duzbangx seizlawz ok lwgcaw, cungj bik boux- dwkcaw bae lauz duzbangx. Yiengh- neix ne, miz ok lwgcaw noix lo, souhaeuj couh gemjnoix haujlai, gyoengqvunz dwkcaw couh mbouj miz cienz cawx haeuxgwn lo, neix dingzlai vunz deng daiiek.

Bouxvuengzdaeq Hansundi Liuz Bauj dang vuengzdaeq le, couh heuh Mung Cangz bae Hozbuj dang Daisouj. Mung Cangz daengz Hozbuj dangguen le, gig vaiq couh rox vihmaz vunz dwk bangx mbouj miz ngaiz gwn lo. Neix le de ok gvidingh gaij doenghgij guhfap mbouj hab- ngamj haenx, cawz doenghgij gvi- dingh mbouj hab faplwd, caemh- caiq mbouj hawj doenghboux dwk bangx luenh roengz haij dwk duz- bangx lai, yienghneix guh couh henhoh ndei duzbangx hawj duz- bangx miz lai. Yienghneix guh mbouj daengz bi ndeu, duzbangx youh miz haujlai lo, Hozbuj youh baenz ranghdieg ok lwgcaw lailai haenx.

Daj neix dauqlaeng, couh miz aen goj cwngzyij heuhguh“caw Hozbuj dauq moq”, aen goj neix dwg lwnh vunzraeuz rox haenq- rengz guh le, doeksat doenghyiengh ndei cungj dauq daengz ndaw fwngz bouxcawj roxnaeuz vunz youh dauq daengz gizdieg gaeuq.

Doenghgij gojgaeq ndawbiengz gvendaengz caw Hozbuj dauq moq miz lai aen, aen mbouj doengz aen, ndawde aen gojgaeq ceiq mizmingz haenx dwg: Youq ciuhgeq, vuengz- daeq baiq ndaek Daigenh ndeu bae guenj singz Hozbuj, apbik bouxdwk- bangx roengz haij bae aeu aen cawronghhaemh. Bonjdieg miz boux dwkbangx ak haenx heuhguh Haij- swngh deng heuh bae aeu lwgcaw. Haijswngh vihliux aeundaej caw- ronghhaemh gouq gyoengqvunz dwk- caw, mbouj lau dai bae daengz Vaengzrinhoengz dwk lwgcaw. Giz- haenx miz song duz sahyiz youh yak youh hung dawz aen caw- ronghhaemh. Haijswngh mbouj lau yungyiemj, mbeihung dahraix, caeuq duz sahyiz hung yak doxhoenx, ndang deng sieng le lwed lae mbouj daengx, caeklaiq ndaej Dahgungh- cujcaw cienz rengz gouq coengh, couh ndaej lix dauq. Dahgunghcuj vihliux gouq gyoengqvunz dwkcaw, sim ndei hawj aen cawronghhaemh hawj Haijswngh. Haijswngh ndaej cawronghhaemh le, dauq daengz gwnz mboek.

Ndaek Daigenh rox le, angq yaek dai bae, aeu cawronghhaemh daeuj, gipmuengz dawz aen caw- ronghhaemh cang roengz ndaw habfaex bae, haemh haenx couh heuh gyoengq bing baujhoh aencaw- bauj neix bae gingsingz. Danhseih gyoengq bing de caengz ok ranghdieg Byameizlingj doxgyawj haenx, sawq- mwh gwnz haij miz benq ronghhau ndeu, liuxle aen cawronghhaemh ndaw habfaex haenx gaenq mbouj raen ngaeuz lo. Ndaek Daigenh doeksaet baenz ngawz lo, gipmuengz dauq ndawsingz heuh bing bae apbik gyoengqvunz dwkcaw caiq roengz ndaw haij bae ra cawronghhaemh. Neix Haijswngh youh deng roengz laj haij bae, ginggvaq haujlai hojnanz youq laj haij ra bae ra dauq, youq caiq raen Dahgunghcujcaw. Dah- gunghcujcaw sim maij Haijswngh, mbouj nyienh hawj Haijswngh youq laj haij deng yungyiemj, caiq hawj aen cawronghhaemh hawj Haijswngh. Haijswngh angq dangqmaz bae, bak naeuz gyo’mbaiq mbouj daengx. De got cawronghhaemh hwnj daengz gwnz mboek lo. Ndaek Daigenh caiq ndaej cawronghhaemh le, gietdingh heuh bouxvunzhoiq de bag nohgumq le, soed cawronghhaemh haeuj ndaw noh bae. Caj giz sieng fukdauq ndei liux, caiq hwnj roen bae gingsingz. Mbouj ngeix daengz ranghdieg gyawj Byameizlingj, sawqmwh mbwn ndaem deih laep, seiq henz byaj bag mbouj daengx, duzmax ndaek Daigenh gwih haenx deng doeksaet le haenq buet mbouj daengx, ndaek Daigenh deng doek roengz max le gyaeuj ngunh bae, cij raen miz diuz rongh hausaksak ndeu yap coh gwnz haij. Ndaek Daigenh singj le heuh vunz bag giz sieng bouxhoiq de, mbouj raen aen cawronghhaemh nauq, ndaw singz vunz dwkcaw cungj deuz liux bae. Ndaek Daigenh rox langh bae gingsingz couh deng vuengzdaeq dingh coih lo, coj deng gaj, cij simnae dangqmaz deng gag gyan ndaek gim dai bae.

Bi 2007 nienz, Doenghgij goj- gaeq ndawbiengz gvendaengz caw Hozbuj dauq moq ginggvaq Gvangj- sih Bouxcuengh Swcigih Yinzminz Cwngfuj doengzeiq, ndaej liedhaeuj daih’it buek swcigih gaep feih- vuzciz vwnzva yizcanj mingzloeg.