Youq haetromh seizcin raeujrubrub, gou youh yamq haeuj rangh ndoengfaex mwncupcup neix. Ngoenzneix, gou yaek daeuj doxraen boux baengz- youx ndeu——duz noucoengz dwggyaez lingzgiuj he.

Gou caeuq noucoengz doxnyangz caen dwg dingjlingz. Haenx dwg haetromh seizhah bi’gvaq. Gyanghaet, daengngoenz daj baihdoeng bin hwnjdaeuj, lumj aen batgim luenzlulu, ronghsagsag, raemxraiz ringx youq gwnz mbawnywj riunyumnyum. Gou doq byaij doq seiqcawq yawjyawj、mupmup, yawj goreiz sangvidvid, nyefaex iet fwngz doxgaem; yawj duzroeg youq byonghmbwn mbinfofo, heuh- ceuceu ciengq go; mup heiqnywj heiqva rangfwdfwd. Sawqmwh, ngafaex gwnz sang doenghyubyub, mbawfaex yiengjbyabya. Gou hai da muengh bae, mumjgyumq yawjraen duz cinglingz bwnnyumnyum he raih youq gwnz faex. Gou sikhaek dawzyinx sisi.

Duz cinglingz rag diuz rieng mboengfoengx he, youq gwnz nyefaex riengjret benzraih. De baez bongh, yat bae geij meij gyae, mbaeu lumj rumzsaeq, baez yaep da gaenq raen de doek daengz goreiz baihhaenx lo.

Doenghduz neix dwg duz maz ni? Gou dogdog najbyak, yaephe, cij ngeix hwnjdaeuj, neix dwg duz noucoengz, gaenq geijcib bi mbouj ndaej raen doenghduz neix lo. Bi’haenx doeg cuhcungh, hagdangz cujciz lauxsae hagseng bae lajmbanj hag guhhong gvej haeux. Gwn ringz sat, gou caeuq geij boux doengzhag hwnj ndoeng bae ra lwgnim gwn. Youq ndaw ndoeng neix, gou baez daih’it ndaej yawjraen noucoengz, hoeng, aenvih baezhaenx guhhong dwgrengz naetnaiq, youh gwn mbouj imq, hix mbouj miz sim bae ngahyawj de, yienghneix, youq ndaw uk couh geiq mbouj laeg. Ngoenzneix lak raen noucoengz, itseiz lij fanjying mbouj gvaqdaeuj.

Duz noucoengz caen dwggyaez. Youq gwnz naj iqet de, miz fouq da ronghndaem ndindi ndeu, fouq rwz iq yienghsamgak daengj youq gwnz gyaeuj soemsedsed, diuz rieng raez gvaq aen ndang de ceiq dwggyaez, mboengfoengx gutgungj. Seiz de dinghyouq, diuz rieng mboengfoengx de cix ndiengq baenz duj va’em; seiz de saet doxroengz, youh lumj rag aen gyanglozsanj. De hengzdoengh seuqdangq、lingzsingj, lumj duj fwjndaem youq gwnz nyefaex biufubfub. De yaep he benz hwnj byaifaex, yaep he naengh youq ngafaex, ganaj gop dawz gijgwn oet haeuj conghbak, nyaij dwk feihsubsub. De mizseiz daengj rwz ngeng dingq, mizseiz lwgda baenq- loekloek ngeux yawj seiqhenz, gij yiengh de gig vadgei dwggyaez. Gou yaengx hwnj soujgih, siengj ingj gij yienghgyaeu de roengzdaeuj, hoeng raen fwngz gou baez ning, de sikhaek singjsag, baez fanndang, lienz ringx geij baez, yaepyet couh mbouj raen ngaeuz lo. Neix mbouj ndaej gvaiq de, dou mbat daih’it doxraen, de daihgaiq nyinhnaeuz ndaw fwngz gou dwg gaem aen cungqdinj yaek nyingz de nei, de mbouj ndaej mbouj buet ho.

Duznou miz lai cungj, gak cungj gag miz gij singqheiq de. Nouranz nounaz hawj vunz haemzhuj, noucoengz cix hawj vunz gyaezmaij. Vahsug naeuz “duznou gvaq haw, bouxboux hemq hoenx”, coenz vah neix couhdwg naeuz nouranz. Dwen daengz nouranz, gou seizneix lij ndang dit naenggaeq. Seiz iq, ndawranz duznou goenj lumj duzmaet. Gwnz bam goxdou, buetyatyat, hemqcitcit. Gaet dawh gaet vanj, gaet rip gaet buh, raen maz haeb maz, doxgaiq ndawranz cungj vauqvauq veuqveuq caez. Duz noucoengz ne, gou caengz raen de gaet gij haeux gij byaek vunzraeuz gvaq, lienz dingq cungj caengz dingqnyi noucoengz haih vunz gij vah neix gvaq. Noucoengz youqdingh ndoengfaex, baengh gwn gijceh gijmbaw doenghgo gvaq saedceij, daegbied gyaez gwn cehcoengz, ndigah heuhguh noucoengz. Caiqnaeuz gij yienghceij de dwggyaez lai lo, vunzraeuz cungj gyaezmaij noucoengz, noucoengz hix mbouj lau vunz, miz vunz lij dawz noucoengz maranz ciengx dem. Youq ndawsim gou, noucoengz caen dwg doiq vunz miz ik mbouj miz haih lo.

Byawz liuh, youq gwnz dennauj baez cazyawj, hawj gou doeksaetyat: Noucoengz hix haih vunz. Gij saeh neix fatseng youq Swconh Swngj. Miz aen linzcangz ndeu, gofaex deng noucoengz gaet gwn, ndoengfaex reuq bae baenz dingzlai. Yawj daengz baihlaeng, gou cij singjsag. Yienzlaiz dwg vunz haih noucoengz gaxgonq, noucoengz haih vunz riengzlaeng. Saehcingz dwg yienghneix: Nungzcangz vih ndaem faex gai cienz, couh raemjrak faexcab caeuq gooen gogut, cij ndaem go faexsang. Yienghneix, baenz ndoeng cungj dwg faexsang daengjgatat, mwncupcup, hoeng baihlaj cix ndoqndadndad. Aenvih doenghgo dandog, gijgwn noucoengz noix lo, de cij ndaej gaet naengfaex guhdonq. Caiqnaeuz, doenghgo noix lo, gijgwnz mbouj miz lo, duzyiuh、duzngwz doenghduz vunzdig noucoengz deuz lo, gag noucoengz ciemq ndoeng guh vuengz, couh buekmingh seng lwg seng lan. Duz lai gijgwn noix, de mbouj gaet naengfaex lij rox gwn maz? Mbouj ndaej gvaiq noucoengz ndwi, yaek gvaiq hix aeu gvaiq vunz ndi.

Ngoenz singhgiz banhaet, gou caiq baez daeuj daengz laj goreiz, maqmuengh lij ndaej raen noucoengz. Seiqhenz, mbawfaex caemrwgrwg, gova dinghsaesae, lumjbaenz dingq ndaej nyi gij sing baenz sei baenz sei nditrongh vanq roengz ndoengfaex nei. Gou naemj, youq ndaw gunghyenz deng laeuz sang suijniz gvaengxhumx neix, duz noucoengz okdaeuj aiq dwg dingjlingz la. Mwngz ngeix ho, gunghyenz seiqhenz cungj dwg laeuz sang ranz hung, gwnz maxloh ci bae ci dauq. Ndaw gunghyenz miz vunz ciengq go diuqfoux, ndwet- yauyau, noucoengz baenzlawz ndaej an’onj gvaq saedceij? Caiqnaeuz, gunghyenz hix mbouj miz saek go faexcoengz, noucoengz gwn maz ciengx mingh? Cingq siengj baenq ndang coh gizwnq byaij bae, noucoengz couh loh naj lo. De haxbaenh caegcaeg cazyawj gou ne, raen gou doiq de mbouj miz maz yakeiq, yienghneix couh habseiz yienh ndang lo.

“Vei, hujgeiq, dou youh doxraen lo.” Gou doiq de naeuz. Noucoengz lumjbaenz dingq rox gij vah gou, daegdaengq youq dangqnaj gou saetyatyat, nyefaex lumj deng rumz bongj bibuengq fubfub. O! Gou rox lo, gizneix dauqcawq nywj nya faex mwn. Gwnz sang, miz goreiz、gorungz、gosandauz sangvidvid yaek daemx mbwn; cungqgyang, miz govagveiq、govalanz、go’gyoij heusuemsuem; giz daemq, miz gogut、 gogaeu、gohaz deihyaenyaen. Daj gwnznamh daengz byonghmbwn cungj dwg nyasaegsaeg、mwncumcum, cw mbwn goemq deih. Miz lwgmak, miz mbaw oiq, miz nywj, lij miz raet. Ndigah, noucoengz daeuj youq lo, youq le couh mbouj siengj deuz lo.

Gou gipmuengz yaengx hwnj soujgih, hoeng caengz deq gou naenx fwngz, noucoengz youh lumj geu hoenz ndeu ndoj haeuj mbawfaex deihyaenyaen bae lo. Gou rox de, de lau gou sienghaih de.

Daeuh ndat saz lwgsawz, aen ndip bienq aen cug. Doeklaeng gou caeuq de doxraen geij baez le, noucoengz doiq gij simndei gou menhmenh ciepsouh lo. Daj najseng daengz sawqdamq, daj ngeizvaeg daengz najsug, dou baenz le baengzyoux ndei. Gou ne, hix ingj dawz gij yienghceij dwggyaez lingzgiuj de lo.

Gvaq ciengciet mbouj geij nanz, seizcin Nanzningz couh dazfwngz doenghva daeuj daengz lo. Gou ngeix, noucoengz gaenzyouq ndaw rongz buenq bi lo, wnggai okdaeuj dak ndit luba. Yienghneix nyig coh ndit haet, gou youh yamq daengz rangh ndoengfaex neix. Lumjbaenz doxduenq gvaq nei, gou ngamq ndwn yaep he, noucoengz couh yienh ndang lo. Engq hawj gou angqbuepbuep dwg, de lij daiq daeuj duz doih ndeu, lauheiq dwg duz youx de ba. Gou daj ndawsim hohfuk songde baenz sueng baenz doiq. Song duz noucoengz duz gonq duz laeng, saet hwnj saet roengz, angqfwngfwng, nauhyied dangqmaz. Buenq bi mbouj raen, duz iqet dwggyaez neix hix caengz lumz gou. Gou ngiengxgyaeuj coh noucoengz sing mbaeu dongx de, noucoengz ne, ndiengq diuz rieng mboengfoengx de, suenq dwg caeuq gou hoizlaex lo.

Gou caemrwgrwg cim de, mbouj bae yoekyau, caih de ciuq gij bonjsingq de ra gwn、guh’angq, youq gwnz nyefaex saetdiuq、benzraih, yiengjsouh gij seizcin raeujrubrub neix.

Vunz caeuq doenghduz doxgyaez caemhyouq, caezgya huzndei onjdingh.