Ciet diuqbo dwg Lungzlinz Gak Cuz Swciyen ngoenzciet vunz Myauzcuz cojcienz hungmbwk, ndawde Dwzngoz Yangh ciet diuqbo ceiq daeuz ceiq hung. Ciet diuqbo miz haujlai nanz lo, moix bi youq seizlawz diuqbo youq gizlawz diuqbo, goxgonq couh dingh ndei cienz roengzdaeuj lo; daj cieng co’ngeih daengz cieng cibseiq gungh 13 ngoenz youq lai giz ciengzbo gawj- hengz, ndawde baez diuqbo youq cieng cogouj youq gizdieg yangh cwngfuj gawjhengz haenx ceiq hung ceiq daeuz.

Baez daengz mboengq gvaq- cieng, gyoengq beixnuengx Myauzcuz ciuq doenghgij sibgvenq cojcienz daj gak mbanj comz daengz gizdieg ciengzbo, guh hozdung caezangq youh lai youh miz daegsaek minzcuz noengzna, bouxboux langhsim angq- vauvau gvaq ciet. Doenghgij hozdung daeuz gonqlaeng miz hemq bo、bae bo、angq bo、nyingz bo、diuq ronghndwen gungh haj aen.

Ndawde gij cezmuz ciet diuqbo miz doxdax bin faex、diuq foux aenvenz、eu fwen hemq bo gingq laeuj、baijok ndangdaenj Myauzcuz daengj. Ndawde, doxdax bin faex dwg aen hozdung ceiq daeuz. Gwn ciengzbo vunzlai hemq ndei bekfwngz seizhaenx, bouxbinfaex Myauzcuz gaenq song ga gab maenh ganjfaex, dingz youq byai ganjfaex.

Ciuq cam rox, ganjfaexbo aeu faexsamoeg guh, gyuj youz coq, rongh wenj dangqmaz, sang cib lai mij. Doxdax bin ganjfaexbo dwg aen hozdung ciuhgeq vunz Myauzcuz aeu daeuj senj bouxak, hwngfat daengz seizneix baenz le aen hanghmoeg doxdax cojcienz ndeu. Mboengq bin faex, bouxbin ndang mbouj ndaej red ganjfaex, cijndaej yungh din caeuq fwngz, bin daengz byai ganjfaex ndaej gwn laeujhaeux caemhcaiq dawz nohlab roengzdaeuj, yienghneix bouxbin couh ndaej dangguh boux- haenqak, vunzlai aeueiq de, ndaej dahsau gyaezmaij.

Seizneix, aen ciet neix gaenq bienq baenz hozdung hungmbwk gak minzcuz doengzcaez guh’angq. Mboengq diuqbo lij eu doenghgij fwen diuq doenghgij foux bonjmiz, cawzle baijok doenghgij fwen foux gak nga Myauzcuz bonjmiz, vanzlij cingj gyoengq beixnuengx Yizcuz、Gwzlaujcuz、Bouxcuengh、Bouxgun daengj daeuj yienj cezmuz minzcuz; gak minzcuz beixnuengx youq ngoenzciet neix langhsim caez angq, gvaq saedceij maenhndei.

Bi 2007, Dwzngoz ciet diuqbo Myauzcuz ginggvaq Gvangjsih Boux- cuengh Swcigih Yinzminz Cwngfuj baecinj, ndaej lied haeuj daih’it buek swcigih gaep feihvuzciz vwnzva yizcanj mingzloeg.