Seizhaenx raeuz lij saeq,

Lumj lwggaeq bwnnyung,

Bohmeh ciengx raeuz hung,

Faenh cingz cungj mbouj lumz.

Gaxgonq raeuz lij saeq,

Lumj lwggaeq bwn ndoq,

Bohmeh ciengx sinhoj,

Laux aeu goq gyoengqde.

Seizde raeuz lij saeq,

Lumj lwggaeq dot rin,

Bohmeh gyaez haeujsim,

Dungx imq mbouj deng iek.

Seizde raeuz lij saeq,

Lumj lwggaeq doek mieng,

Sai geijlai rengz ciengx,

Cij baenz yiengh ngoenzneix.

Seizde raeuz lij saeq,

Lumj lwggaeq doek luengq,

Bohmeh umj mbouj cuengq,

Duengqywdywd hix nyienh.

Gaxgonq raeuz lij saeq,

Lumj lwggaeq doek boengz,

Meh bwnq hwnj bwnq roengz,

Raeuz cij noengq baenzneix.

Ngoenz guhhong dwgrengz,

Ceng aeu ciengx lwg hung,

Seizneix raeuz baenzvunz,

Vah unq doiq bohmeh.

Ngoenz bae hong ma laep,

Yaep he mbouj ndaej daengx,

Lij caengz ndaej naengh daengq,

Youh aeu nyaengq dajcawj.

Baenz saekdi gyaeujdot,

Meh got umj dajleix,

Sim in youh youheiq,

Lumj feiz coemh bwnda.

Bae haw you lwg noix,

Mbouj cawx oij couh dangz,

Caih rumzbaek rumznamz,

Ngoenz bwnq sam can haeux.

Dajleix bi youh bi,

Meh gizgiz youheiq,

Ciengx raeuz hung mbouj vei,

Mbouj ndaej soeng yaep he.

Gvaq giuz gaej lumz dwngx,

Gvaq dwngj gaej lumz so,

Bohmeh caen sinhoj,

Aeu ciuqgoq ndaej ndei.

Bohmeh sai dungx saej,

Cij ciengx ndaej raeuz hung,

Gwn raemx mbouj ndaej lumz,

Boux vunz lawz vat cingj.

Bohmeh raeuz sinhoj,

Raeuz aeu gyoh gyoengqde,

Seizneix gaenq lauxgeq,

Raeuz aeu deq gyang fwngz.

Bohmeh raeuz dwgrengz,

Deng hoj raeuz aeu geiq,

Daengz laux raeuz dajleix,

Hawj youq ndei gwn hom.

Gyaez bohmeh haeuj saej,

Coemh feiz dawz aeu boq,

Hauqgingq meh caeuq boh,

Ndaej gwn ndei rox heuh.

Gienq raeuz coenz daih’it,

Raeuz aeu cik yaemgung,

Guh vunz youq lajmbwn,

Bohmeh hung gvaq bya.

（caengz sat）