Gyanghaet singhgizit, gou couh yaek aeu dauqbae hagdangz hwnj- dangz lo. Daeglwg cingq ninz ndaej ndaeknwnw, caensim mbouj nyienh swz de. Hoeng, gou lij dwg aeu naengh aen danci coh hagdangz gwih bae.

Ngamq daengz bakdou hagdangz, couh miz boux daxgoeng hagseng ndeu, byaij coh gou daeuj, lumjnaeuz raen diuz fiengz gouqmingh ndeu nei. “Lauxsae, mwngz caen daeuj lo, caj mwngz miz di nanz.” Gizsaed, gou gaenq beij bingzseiz caeux daeuj 20 faencung lo. Gou mbouj guh banh- cujyin lo, hoeng, cawjranz saeh hung saeh iq cungj gvenq daeuj ra gou.

“Dahlan gou youq neix, ngamq soengq de daeuj youh yaek caeuq gou dauqranz bae. Seizneix mwngz daeuj couh gyau hawj mwngz lo.” Gangj le, daxgoeng couh hai aen cimohdoz lizbae lo. Gou lij mbouj caengz rox dauqdaej ok maz saeh ne? Cijndei ganjgip dingz danci le, bae cam gij saeh gonqlaeng.

Cij raen Vangz Sinhvei doengz- hag ban dou ing youq bakdou hagdangz, raemxda laeboegboeg, ndaw bak lij nam naeuz:“Gou aeu bae ranz, gou aeu bae ranz……” Gou baez cimyawj de, byoem de roi ndaej cingjcaez, daenj geu vunj raiz ndeu. Youq aen singhgiz gonq gou ngamq ma hagdangz hwnj dangz, raen de daenj geu buh nanwt, lij daenj aen mauh roemj gyaeuj ndaej ndaetndet. Aenvih gwnz gyaeuj de hwnj haujlai nyan, humz lai de souh mbouj ndaej couh aeu fwngz gaeu, gaeu lot naeng bae, cat geijlai yw cungj mbouj ndei, ce biuj youq gwnz gyaeuj, miz di yakyawj.

Bohmeh de doxliz lo, daxboh youq baihrog dajgoeng, mbouj rox miz geijlai bi mbouj maranz lo, daxbuz gaenq gvaqseiq le, de itcig caeuq daxgoeng youq ndwi. De mbouj lumj gij lwgnyez wnq maij diuq maij riu, haeuj hag le gag naengh youq dieg de, mbouj gangj mbouj riu. Vih gij saeh neix gou hix caeuq daxgoeng de gangj gvaq geij baez, hoeng mbouj miz yungh. Boux geq ndeu gag youq ranz, guenj dahlan gwn daenj haeuj ninz, youh nyaengq hongranz youh nyaengq hongreihnaz, caen ganq mbouj ndaej baenzlai lo.

Haetneix gou yawj daengz neix couh singj lo, de itdingh lau gyoengq doengzhag riunyaen de. Bakdou hagdangz laebdaeb miz cawjranz wnq soengq lwgnyez daeuj hwnjdangz, miz boux geizheih cezda daeuj cim, gij lwgnyez hix comz daeuj yawj. Hwnjdangz lo, caih gou baenzlawz heuh de, de hix mbouj nyienh haeuj gyausiz, gyoengq lauxsae wnq gvaq- daeuj heuh de, hix mbouj miz yungh. Hawj doengzhag bae heuh de, cix miz boux hagseng daeuj caeuq gou gangj:“Lauxsae, Vangz Sinhvei naeuz de yaek aeu dauqranz, de mbouj daeuj hagdangz doegsaw lo……”Gou ndaej- nyi le, roxnyinh dahlwg neix miz di giengz bw! Gou gag siengj: Seizneix baenzlawz guh cij ndaej hawj de nyienh bae hwnjdangz ne? Couhsuenq de caen mbouj nyienh haeuj gyausiz, hoeng hix mbouj ndaej hawj de laebdaeb ndwn youq bakdou. Daeng- ngoenz hwngqfwdfwd, gou lau de deng cik fatsa, roxnaeuz de ndot ok rog bae ne? Gou cij ndaej dwk denva hawj daxgoeng de, heuh daxgoeng de daeuj coux de dauqbae. Hoeng daxgoeng de cix han:“Lauxsae, gou ngamq daengz ndaw reih yaek aeu byaekmou, ndaw riengh song duz mou gou lij caengz ndaej gueng ne! Mwngz couh ce de youq gizde ndwn dwk ba, mbouj youqgaenj!”

Mbouj ndaej, mbouj ndaej ce de baenzneix ndwn! Gou goq mbouj ndaej baenzlai, rag dawz de coh gyausiz byaij bae. De cukcak, hoeng mbouj beij gou miz rengz. Gvaq yaep ndeu cij rag de daengz baihnaj daizsaw de, gou hanh lae dumz ndang caez lo. Hoeng, de cix ndwn dwk mbouj nyienh naengh roengz. Gou hix mbouj dam de, byaij ok gyausiz haeuj bangungh- siz bae cozyez lo.

Roengzdangz le, couh miz hag- seng buet daeuj lwnh hawj gou:“Lauxsae, Vangz Sinhvei naengh roengz lo……” Cuengqhag le, youq gyang roen gou bungz de, unqswnh cam de:“Vangz Sinhvei, mwngz ndei lwi?” De sing iq dap:“En, ndei lo!” “Baez moq mbouj ndaej yienghneix lo, daeuj hagdangz couh aeu ndeindei doegsaw, dingqgangj, lauxsae mbouj- guenj mwngz dwg yienghlawz cungj gyaez mwngz.”Gou menhmenh son de naeuz. “En. Veiz lauxsae, gyo’mbaiq mwngz. Gou geiq youq ndawsim lo, gou bae gonq lo!” De han le couh caeuq gyoengq doengzdoih buet bae naj lo.

Ndaw ban dou miz haujlai lwgnyez, daj iq couh caeuq daxgoeng daxbuz youq ranz ndwi, bohmeh bi daengz byai youq baihrog guhhong ra cienz. Yawj gyoengqde baenzngoenz vaiqvued, byawz caen rox ndawsim gyoengqde dauqdaej siengj maz ngeix maz, guh lauxsae aeu haeujsim gyoengqde maqmuengh aeu maz.