“Byasang fouz roen couh hwnjguh, bungz raemx guh giuz menh gvaq dah; banggungz banghoj rap gwnz mbaq, mbouj ndaej baenaj sim mbouj fug.” Mboengqneix, hot dem hot fwen goksasa youq aenmbanj Namzningz Si Vujmingz Gih Lingzmaj Cin Sinhlungz Cunh, doih yienjheiq cienciengz eu fwen banggungz aen singz neix yienj cezmuz ndeiyawj hawj gyoengq vunzmbanj yawj, vunz- mbanj cungj angqyangz doxcomz daeuj gizneix yawj heiq.

Gwnz daizheiq, gyoengq bouxyienj hopheux aen cawjdaez “akdaeuz dazyinx·yienjheiq banggungz”, yungh eu Fwencuengh yienj 《Bouxboux Vut Gungz Aeu Dazbyauh》《Lamzdoz Hungloet Coi Vunz Baenaj》 daengj cezmuz ndeiyawj, yungh gij fuengsik beksingq haengj dingq gyaez yawj haenx danqhaenh cwngcwz moq okhingz moq yienghsiengq moq vut gungz baenz miz, cauh’ok gij heiqfaenh vut gungz gunggeng naekgywd, vih caenh’itbouh dwkhingz ciengz ciengq vut gungz gunggeng dwk roengz giekdaej maenhsaed.

Geij bi neix daeuj, Vujmingz Gih youq guh cinjcing banggungz doengz- seiz, lij doenggvaq guh bae mbanj yienjheiq banggungz, daj cingsaenz gujli、vwnzva hwngfat、cauh’ok heiq- faenh daengj caengzmienh, fatok gij cozyung bangrengz yienjheiq youq mwh guhhong banggungz. Caemhcaiq dajveh daj bi 2018 daengz bi 2020, binaengz bued cienz caizcwng 200 fanh maenz doxhwnj, laebbaenz aen doih yienjheiq youq daengx singz 198 aen hozcozse vunzmbanj bangguenj guenjleix haenx, binaengz cunzyienj 60 ciengz doxhwnj, cungfaen fatok gij cozyung “bang ceiq” lajmbanj yienjheiq hozdung youq mwh guhhong vut gungz gunggeng, yungh gij heiq maenhndei gyalai rengzlig hawj vut gungz gunggeng, hawj vunzlai lai gaenx guh baenz miz, hawj yamqdin byaij haeuj siujgangh vunzlai engqgya rengzrwd.

(Banh Yenvaz)