Nazboh ciet diuqgung Yizcuz, hix heuhguh ciet diuqgoeng, dwg ngoenzciet cojcienz youq Nazboh Yen doengh mbanj Yizcuz, doenghgij dieg cienzlah daeuz dwg Cwngz- siengh Cin Mbanjdazlaz、Mbanj- nenbiz、Mbanjcejsiengz sam aen mbanj neix caeuq Yavaz Yangh Mbanjbohvuj; aen ciet neix guh sam ngoenz.

Aen ciet diuqgung hozdung lai dangqmaz, mboengq gvaq ciet ne, gyoengq beixnuengx Yizcuz daenj ndangdaenj minzcuz, naengj haeux- naengj, ngauz laeujhaeuxyangz, gaj mou gaj bitgaeq, angq diuq foux Yizcuz, boq aen’gyoux (cungj yozgi aeu lwggyoux guhbaenz) gag cauh- baenz, roq yiengj aen gyongluengz, bouxboux cungj naj riu sim angq; doenghgij foux、doxgaiq yozgi、ndangdaenj gyoengqde cungj yienh- ok minzcuz daegsaek noengzna youh cojcienz haujlai nanz.

Gvaq aen ciet neix vunz Yizcuz aeu baiq sienbaed caeuq eu fwen diuqfoux guhdaeuz, baez ciet neix aeu guh hozdung sam ngoenz cij liux. Ngoenz daih’it, caeqbaiq cojcoeng goengboh caeuq sienbaed. Neix liuxle, vunzlai comz daengz dieg- dangz ndaw mbanj doengzcaez diuqfoux, caiq yienh’ok aen ciengz- mienh angqhoh bouxhoenxciengq ndaej hingz le dauqma, neix laeb- daeb guh daengz ngoenz daihngeih. Ngoenz daihngeih banhaemh, vunzlai youh bae daengz gak ranz gak hoh diuqfoux, doxhoh bingzonj caeuq gwn van youq ndei. Mboengq diuqfoux song ngoenz neix, ndawde lij miz doenghgij biujyienj neiyungz dinghndei youh miz daegsaek minzcuz. Ngoenz daihsam dwg guh“sam hat” , couhdwg hwnj bya hwnj ndoi bae caeq bya baiq bya, baiq bya liux le, gyoengq bouxhek cungj deng lizhai bae caez, mboujne couh deng dangguh bouxnyauzsaeh. Ngoenz haenx, caj bouxhek lizhai liux, daengxcungq vunz ndaw mbanj mbouj guenj mehmbwk bouxsai fanzdwg guh ndaej hong haenx cungj deng roengzdoengh bae guh cungj hong ndeu, neix couh gangj dwg vunz gaenx couh miz sienbaed bauj ndei, bineix dajdaem dajciengx haengj- dingh sou ndaej lai.

Ciuq cienzgangj youq ciuhgeq bouxbing Yizcuz deng vunzdig humx youq ndaw ndoeng gocukgim laep- ngungau bae, cingzgvang yungyiemj dangqmaz. Sawqmwh, miz daeg- mbauq ndeu ok geiqmaeuz, aeu faexcukgim daeuj guh gung guh naq, haenqrengz fanjhoenx vunzdig. Caen dahraix, doenghgij naqcukgim gaiq- gaiq cungj nyingz deng vunzdig, hoenxciengq mboujduenh ndaej hingz, daengzlaeng youq liggaeuq seiq nyied co daj vunzdig doiqdauq bae lo. Vunzlai gak mbanj mbouj lumz aencingz gocukgim gouq mingh, couh youq diegdangz ndaw mbanj dajndaem gocukgim dangguh doenghyiengh geiqniemh. Vunzlai roq gyongluengz, boq aenvenz, eu fwen diuq foux, angqhoh hoenx- ciengq ndaejhingz. Neix dauqlaeng bibi cungj cienz roengzdaeuj, couh baenz le“ciet diuqgung”.

Mboengq gvaq ciet diuqgung, mboujdan miz vunz beixnuengx Yizcuz doxgyawj mbanj haenx daeuj camgya, hix miz vunz Bouxcuengh、Bouxgun daengj vunz beixnuengx minzcuz daeuj angqhoh, doengz gvaq caez angq, neix cauhbaenz minzcuz doxgiet ndei dangqmaz bae.

Bi 2007, Nazboh ciet diuqgung Yizcuz ginggvaq Gvangjsih Boux- cuengh Swcigih Yinzminz Cwngfuj baecinj, ndaej senj haeuj daih’it buek swcigih gaep feihvuzviz vwnzva yizcanj mingzloeg.