Mboengqneix, mwh gicej bae daengz Baksaek Si Denzlinz Yen caijfangj, ciengz Heiqcuengh youz Denzlinz Yen Cwnghez veijyenz gag bien gag yienj ndeu gaenq youq gwnz daizheiq Sinhcangh Lozlij Cin caepcawq ndei lo, vunzlai dangdieg caeuxcaeux couh daeujdaengz laj daiz caj yawj biujyienj. Biujyienj youz duenh heiq Heiqcuengh《Cingz Mehbuz Caeuq Mehbawx》caeuq gofoux Bouxcuengh《Fwen Daemjrok》gapbaenz. Ndawde,《Cingz Mehbuz Caeuq Mehbawx》dwg genjaeu gij Heiqcuengh ndawbiengz,《Fwen Daemjrok》dwg gij neiyungz genjaeu heiq haidaiz ciet vwnzva “haeujgamj” Denzlinz bi 2018.

“Bi 2014 daengz seizneix, cwnghez aen yienh neix vih vatcimh、baujhoh caeuq swnjcienz ndei minz- cuz vwnzva, dajcauh ok ciet vwnzva ‘haeujgamj’ moix bi gvaq baez haenx. Moix ciengz heiq、moix hot fwen、gij diiq moix aen foux、dajveh dap buhvaq doenghgij neix cungj dwg gij goeng- rengz gyoengq lingjdauj caeuq veij- yenz yen cwnghez. Vangz Vanh boux cujsiz yen cwnghez neix gig yawjnaek gij vwnzva Heiqcuengh, moix hothoh cungj caenndang suenqveh caeuq- faenh, baizlienh heiq cungj dwg youq gyanghaemh、ngoenzsinghgiz caeuq ngoenz cuengqgyaj guh.” Huz Siuyez boux veijyenz yen cwnghez neix youq biujyienj sat le lwnh gicej.

Neix dwg gij sukingj Denzlinz Yen Cwnghez cungfaen fatok gijndei vunzcaiz caeuq dungxcaiz, haeujlaeg saedhengz aen gunghcwngz dajcauh binjbaiz vwnzva, bangdoi minzcuz vwnzva hwngfat.

Haenqrengz dajcauh yenzswnghdai vwnzva binj- baiz Bouxcuengh

Bi 2018 ndwen 5, youq gwnz aen vanjvei haidaiz ciet vwnzva “haeuj- gamj” Denzlinz, aen vanjvei aeu gij vwnzmingz dajndaem、gij fungsug deihfueng、gij dinfwngz conzdungj guh maedazyinx, doenggvaq heiq、fwen、diuqfoux doenghgij hingzsik yisuz neix aeu gij ciengzgingj guhhong、gij dinfwngz daemjrok buen hwnj daiz- heiq bae, daiq daizheiq ndeiyawj daegbied ndeu hawj bouxyawj laj daiz.

Gicej youq mwh caijfangj rox daengz, ciet “haeujgamj” dwg ngoenzciet youqgaenj ndawbiengz Gvangjsih, cezmuz cujyau dwg doiq fwen. Ciet vwnzva “haeujgamj” caemh dwg daj ngoenz ciet neix sanj okdaeuj. Bi 2006 ndwen 5 ngoenz 20, Heiqcuengh ginggvaq Gozvuyen baecinj liedhaeuj buek daih’it guek- gya gaep feihvuzciz vwnzva yizcanj mingzloeg. Denzlinz Yen dwg dieg- goek Heiqcuengh baihbaek Gvangjsih. Heiqcuengh baihbaek youq Mingzdai hainduj didnyez, youq Ciuhcingh seiz Ganghhih dang vuengzdaeq haenx baenz yiengh, daengz seizneix gaenq miz 300 lai bi lizsij lo. Guhlawz cijndaej doidoengh swnjcienz caeuq hwngfat gij minzcuz vwnzva Boux- cuengh, itcig dwg aen vwndiz cwnghez aen yienh neix hengzguh cizcwz cungdenj gvansim haenx.

Geij bi neix daeuj, cwnghez aen yienh neix cungfaen fatok gijndei vunzcaiz caeuq dungxcaiz, haenqrengz dajcauh gij vwnzva binjbaiz yenz- swnghdai Bouxcuengh baenzroix “gij raeuz” neix. Youq gwnz giekdaej bi 2015 yienjok《Haeujgamj》《Aeu Bawx》song bouh heiqfoux Bouxcuengh neix ndaej baenz, daj bi 2016 hainduj, cwnghez aen yienh neix lij giethab hengzguh sevei cujyi hwzsinh gyaciz- gvanh, haeujlaeg saedhengz gij gunghcwngz dajcauh vwnzva binjbaiz, dakbaengh aen bingzdaiz ciet Heiqcuengh “haeujgamj” Denzlinz moix bi gvaq baez neix, doiok gij vwnzva binjbaiz yenzswnghdai Boux- cuengh baenzroix “gij raeuz” neix.

Cwnghez veijyenz bae daengz gihcwngz swnjcienz hwngfat minzcuz vwnzva

Geij bi neix daeuj, cwnghez aen yienh neix youq doed ok daegsaek Denzlinz、binjbaiz Denzlinz、gojgaeq Denzlinz、vunzcaiz Denzlinz doenghgij fuengmienh neix, itloh aeu doidoengh hwngfat vwnzva dangguh gij neiyungz youqgaenj nyinhcaen guhhong, guh- ok le gungyen youqgaenj.

Daih’it dwg gyagiengz hong swnjcienz feihvuzciz vwnzva yizcanj, caeuq vwnzva bouhmonz guhsat hong cobouh genjcaz caeuq laeb dangjan 1018 hangh feihvuzciz vwnzva yizcanj, ndawde hangh ndeu liedhaeuj guekgya gaep baujhoh mingzloeg, 8 hangh liedhaeuj swcigih gaep baujhoh mingzloeg, daengx yienh gungh miz 26 vunz liedhaeuj gij vunz swnjcienz feihvuzciz vwnzva yizcanj sigaep doxhwnj. Daihngeih dwg cungfaen fatok gij cozyung cwnghez “rom lizsij、bang guenj guek、 doxgiet、son vunz”, gonqlaeng bienraiz le《Minzcuz Vwnzva Denzlinz》(bien Bouxcuengh) (bien Bouxgun) (bien Yauzcuz) sam cek saw neix, okbanj le《Sawson Heiqcuengh》《Geiqsaed Gij Hozdung Ciet Heiqcuengh “Haeujgamj”》doenghgij saw minzcuz vwnzva neix; bi 2017 ndwen 4, lij banh baenz le Aenhoih Lenzsiz Denh Genz Gvei Sam Swngj (Gih) “Sam Diuz Dah” Ngeihcib It Yienh (Si) Cwnghez, doiq guhlawz baengh gij swhyenz minzcuz vwnzva yenzswnghdai “sam diuz dah”, gyavaiq haifat lijyouz bangdoi vut gungz gunggeng caeuq hwngfat ginghci ndawbiengz doxyaeng dox- doeng. Daihsam dwg gaenxmaenx doxgyau vwnzva, cujciz doih fwen bae gak aen yanghcin guh gij hozdung soengq heiq soengq vwnzva roengz mbanj, lij caeuq Funingz、Lingzyinz doengh aen yienh henzgyawj neix doxgyau vwnzva gungh yienj heiq 30 lai ciengz(baez), hawj vunzlai dang- dieg haenhndei nyauznyauz.

“Aen hoihfwen yenzswnghdai youz cwnghez veijyenz gapbaenz neix ndawde miz cwngzyenz 80 lai vunz, moix bi cungj roengzbae daengz gak aen yanghcin banh cibgeij ciengz biujyienj, gij neiyungz fwen cungj dwg Vangz Vanh cujsiz gag bien gag daujyenj.” Denzlinz Yen Cwnghez veijyenz Cinz Senhswh dwg boux ganbu guh gij hong vwnzyi Denzlinz, haujlai bi daeuj, de caeuq haujlai cwnghez veijyenz doxcaez gaenx haeujbae daengz yanghcin gihcwngz, son bienbaiz caeuq cauhguh Heiq- cuengh, bangdoi Heiqcuengh lajmbanj hwngfat, caemhcaiq gag bien gag daujyenj gij dijcauh yinhlwd minzcuz dangdieg gagmiz daegsaek haenx, yungh gij daegsaek gofoux minzcuz dangdieg cauhbien, hawj gij vwnzva conzdungj minzcuz maenhndei youq gak aen yanghcin caeuq hagdangz cungj ndaejdaengz gvangqlangh swnj- cienz caeuq hwngfat.

Comzgiet gij rengz vwnzva doidoengh vwnzva leih lwgminz

“Dou yungh gij fuengsik gofoux conzdungj vunzlai maij yawj maij dingq haenx senhconz gij fuengcim、cwngcwz aen dangj, gyoengqde gig haengj ciepsouh. Dou yungh Vah- cuengh bienraiz sawfwen, maqmuengh yungh cungj fuengsik yienghneix aeu gij vwnzva conzdungj Bouxcuengh swnjcienz roengzbae.” Vangz Vanh naeuz.

Cwnghez aen yienh neix gaenxmaenx fatok gij cozyung minzcuj doxyaeng, doed ok gij binjbaiz “vwnzva leih lwgminz, veijyenz guh gonq”, dingjmaenh cwngfuj daiqdaeuz dazyinx、ndawbiengz caeuqfaenh、caez hwnj caez yungh, roengzrengz bae dazyinx vwnzva swhyenz ngengcoh lajmbanj, doidoengh daengx yienh gak cuz vunzlai sim doxdoengz yungjhu dangj, doxgiet buekguh baenaj.

Denzlinz Yen Cwnghez cujciz haiguh le gij hengzdoengh son cauh- guh Heiqcuengh bangrengz “vwnzva banggungz”, hwnjguh daizheiq caeuq ranzsaw bouxguhnaz lajmbanj hawj lajmbanj, caemhcaiq bang guhhung aen duenz Heiqcuengh, yungh heiq ciengqgok gij “sing’yaem ndei Denz- linz”. Seizneix, doenghgij duenz yienjheiq honghoengq daengx yienh gaenq miz daengz 114 aen, bouxyienj yienjheiq mauhgvaq 3000 vunz, caemhcaiq hwnjguh miz daizheiq lajmbanj 106 aen, Lucwngz Cunh、Dunglung Cunh doengh aen cunh neix miz buek duenz yienjheiq ndeu ndaej Swcigih Vwnzvadingh fathawj aen cwngheuh “Aen Duenzdoih Vwnzyi Lajmbanj Senhcin Daengx Gih”, daengx yienh lajmbanj gizgiz yienh’ok gij yienghsiengq hoenghhwd “mbanj- mbanj dap daizheiq”.

(Dauz Swhluz Vangz Hozfangh raiz Dahdingz hoiz)