It、Doxdongx

Mbwk:

Youq ranz sim mbouj caih,

Ok baihrog daeuj youz,

Youq ranz gyaeuj ngunhngouz,

Okdaeuj youz siu heiq.

Sai:

Haemhneix ronghndwen ndei,

Fwj dazsei hwnj moq,

Gyangdien rumzliengz boq,

Hai hoz daeuj fwenlangh.

Mbwk:

Haemhneix haemh gijmaz，

Roeg byaibya mbouj heuh,

Vameiz caeuq roeggeuq,

Mbouj nyi heuh saek duz.

Sai:

Youq ranz la youxdoq,

Ok lajroq daeuj caemz,

Youq ranz la youxngaenz,

Ok haenz daemz daeuj liuh.

Mbwk:

Haemhneix haemh gijmaz,

Roeg byaibya hai sing,

Coenzcoenz gyukringring,

Caen ndeidingq dahraix.

Sai:

Duzbitboh hai sing,

Mbouj ning lumj vameiz,

Sing fwen gou mbouj ndei,

Heiq(lau) vunz dawz bae lwnh.

Mbwk:

Mwngz fwen baenzlai gyuk,

Bouxnuk hix ndaejnyi,

Fwen mwngz baenzlai ndi(ndei),

Dwk vunz fiz liuxnauq.

Sai:

Gou eufwen mbouj ndei,

Gaej gangj yienghneix vah,

Sing fwen baenzlai ca,

Mbouj miz naj doiq vunz.

Mbwk:

Lauxbiuj vaiq okdaeuj,

Raeuz doxcaez raennaj,

Sing fwen gyukcaca,

Gangj vah byonj dwk raeuz.

Sai:

Danghnaeuz nuengx mbouj yiemz,

Gou cienq naj gvaqbae,

Danghnaeuz nuengx raen ndei,

Raeuz doengzcaez doiq fwen.

Mbwk:

Sing fwen beix baenz ndei,

Gaej yienghneix doeknaiq,

Fwen baenzneix leixhaih,

Gou maij gaen mwngz hag.

Sai:

Gaej gangj yienghneix gvai,

Gaej nai yienghneix vah,

Gou fwen baenzlai ca,

Bouxlawz ra daengz raeuz.

Mbwk:

Lauxbiuj dangq bouxdaeuz,

Mbouj naeuz gou cix rox,

Raen sing fwen gou yoq,

Cij gyoj yienghneix vah.

Ngeih、Raennaj

Sai:

Va a va,

Youq gungx caz hau maeq,

Fwngz iu iu mbouj ndaej,

Faex fad fad mbouj daengz.

Mbwk:

Dwgcoh duj vavengj,

Youq daegdengj gwnz go,

Gadog maj gwnz bo,

Bouxlawz goq daengz raeuz.

Sai:

Ndaejnyi nuengx hai sing,

Sim gou mbin lumj mbaj,

Ciuqmienh daeuj raennaj,

Lumj duj va sam nyied.

Mbwk:

Gyae’gyae ndaejnyi sing,

Sim gou mbin lumj yiuh,

Gou raen daengz lauxbiuj,

Sim diuq lumj max lamh.

Sai:

Vamaenj hau youh hau,

Vadauz maeq youh maeq,

Maeq mbouj gvaq vadauz,

Hau mbouj gvaq youxnoix.

Mbwk:

Coenz fwen geij coenz doq,

Mwngz rox gyoj baenzndei,

Caeuq mwngz doiq fwen geiq,

Sim gou maezriegrieg.

Sai:

Gou fwen mbouj miz lai,

Nai coenzcoenz mbouj rox,

Raen daengz mwngz le doq,

Angqfofo gvaq ngoenz.

Mbwk:

Gou vunz siengq mbouj ndei,

Aen rei hwnj comz da,

Bak mbouj rox gangj vah,

Ga mbouj rox byaij roen.

Sai:

Mwngz gangj vah yienghneix,

Gou caen ngeix lailai,

Lau mwngz sim mbouj maij,

Cij nai sam nai seiq.

Sam、Dajdamq

Sai:

Guhdoih youq lajmbwn,

Guhdoih ndwn laj liengj,

Gou siengj mwngz mbouj siengj,

Vaih bae mbiengj simdaeuz.

Mbwk:

Yienghneix fwen aujauj,

Lau yah mwngz ndaejnyi,

Gou nienzgeij lij iq,

Mbouj miz damj raen vunz.

Sai:

Yah mbouj miz gwnz ranz,

Fanz sim mwngz mbouj rox,

Caeuq mwngz caemh heuh boh,

Rox mwngz nyienh mbouj nyienh.

Mbwk:

Mwngz miz yah liux gim,

Ndaej cingj mbouj ndaej riengz,

Yah mwngz sau oengiengj,

Gou riengz mwngz vaih ciuh.

Sai:

Yah caengz miz lo gim,

Sim gou ngeix mwngz doq,

Gou ndiep mwngz ndaw hoz,

Mwngz mbouj rox daengz gou.

Mbwk:

Sou gvanbaz doxndiep,

Gang riep guhdoih ninz,

Sou gvanbaz caemh sim,

Swiq din raemx doxgonh.

Sai:

Yah mbouj miz caen ndaenq,

Ngaenz gaej gangj yiengh vah,

Nuengx mwngz raen gou vaj,

Gij maz vah cungj miz.

Mbwk:

Naemj caeuq gou gangjgoj,

Go miz maz bonjsaeh,

Ciengx bit rox ciengx gaeq,

Cij ndaej baenzlai gvengx.

Sai:

Gou mbouj dwg ciengx gaeq,

Hix mbouj ndaej ciengx mou,

Ndaem mak song cien moux,

Souhaeuj mbouj suenq lai.

Mbwk:

Mwngz ndaem mak baenzlai,

Gai bae couh ndaej ngaenz,

Lwgsau baez yawjraen,

Bouxboux naemj gaenriengz.

Sai:

Lwgsau gou mbouj maij,

Cij aiq(ndiep) mwngz boux neix,

Mwngz vunz gyaeu sim ndei,

Gou ngeix mwngz daengx ciuh.

Mbwk:

Gangj caen rox gangj gyaj,

Duzbyaj youq gwnz raen,

Miz buenq gangj naeuz gaen,

Lau mwngz faen mbouj cingh.

Sai:

Caen mbouj ndaej guh gyaj,

Sa suek mbouj ndaej feiz,

Gou ngoenz ngeix hwnz ngeix,

Ndaej mwngz sim cij net.

Seiq、Doxmieng

Mbwk:

Vah mwngz gangj baenz ndei,

Ngeix daengz gou sim baih,

Ndaej caeuq mwngz doxmaij,

Cien daih cungj vuenyungz.

Sai:

Ndaej aeu mwngz guh yah,

Gwn raemxdah hix van,

Ndaej caeuq mwngz caemh ranz,

Byaek ndaw banz did nyod.

Mbwk:

Mwngz beix caen ndaej aeu,

Raeuz doxnaeuz guhhong,

Noh mbouj miz roengz congz,

Cungj mbouj gongz coenz vah.

Sai:

Cij aeu nuengx ndaej daeuj,

Duzmou gou hix gai,

Nuengx ndaej daeuj dahraix,

Guh cai gingq diendeih.

Mbwk:

Mehmbwk dingfaz dok,

Bouxsai rog daek raemx,

Vah ciuq mbouj ciuq saem(sim),

Raeuz gaem fwngz dawzdingh.

Sai:

Ngoenz fwn doek byajraez,

Gou cungj ngeix mwngz gvai,

Gou maij mwngz dahraix,

Ndiep daengz dai mbouj cuengq.

Mbwk:

Ngoenz fwn doek byaj raez,

Gou caen ngeix dahraix,

Roen gyae gou cungj byaij,

Ndiep dai mwngz mbouj rox.

Sai:

Ngeix daengz mwngz lauxbiuj,

Sim gou diuqlinlin,

Ngeix mwngz youq ndawsim,

Hwnz mbouj ninz hix nyienh.

Mbwk:

Ngeix daengz mwngz lauxbiuj,

Sim diuq lumj byajraez,

Roen caiq gyae cix gae,

Cungj aeu bae guhdoih.

Haj、Dinghcingz

Mbwk:

Sambek caeuq Yinghdaiz,

Dai bae lij doxgoq,

Ngeix song raeuz ndaw hoz,

Rox ngoenzcog yienghlawz.

Sai:

Sambek caeuq Yinghdaiz,

Dai lij ndaej caemh moh,

Gou gangj naeuz ndaej goq,

Mbouj dwg lox mwngz nuengx.

Mbwk:

Gou ndiep mwngz lailai,

Ndiep dai mwngz mbouj rox,

Gou ndiep haemz ndiep hoj,

Ndiep gvaq ngaenz coq daeh.

Sai:

Gou ndiep mwngz lailai,

Ngaiz mbouj gwn hix imq,

Gou ndiep mwngz ringring,

Ce mingh hawj mwngz dawz.

Mbwk:

Raeuz gangj ndaej doxdeng,

Gaem gen bae gezvwnh,

Naeuz lajdeih gwnzmbwn,

Raeuz dwg vunz ranz dog.

Sai:

Ndaej coenz vah nuengx neix,

Fanhseiq mbouj ce mwngz,

Caiq geq gaem faex dwngx,

Gaem fwngz daengz gyaeuj hau.

Mbwk:

Seiz cibngeih diemj lai,

Wnggai hab bae ninz,

Byaifwj yaek hau nding,

Bae ninz lo youxnoix.

Sai:

Bae ranz lo duz a,

Maranz lo lauxbiuj,

Vah raeuz gangj mbouj liux,

Iu ngoenzcog caiq raen.

Aeu yawj: Gij cih “gim”、 “ngaenz”、 “doq”、“gvai” ndaw fwen dwg heuh bouxyoux.